Li aatin aʼin tento naq wanq saʼ laachʼool
Naru naqajuntaqʼeeta li naʼbʼej yuwaʼbʼej rikʼin junaq laj kʼaakʼalenel karneer. Joʼ chanru naq laj kʼaakʼalenel naril li xkokʼ karneer, ebʼ li naʼbʼej yuwaʼbʼej tento teʼril ebʼ li xkokʼal. Maare tsachq junaq ut tixkʼul li rahilal (Prov. 27:23). Chanru teʼxkʼam rehebʼ li naʼbʼej yuwaʼbʼej rikʼin laj kʼaakʼalenel karneer? Aajel ru naq wulaj wulaj teʼxkʼe xhoonal re aatinak rikʼinebʼ li xkokʼal. Ut wiʼ joʼkan teʼxbʼaanu, teʼxnaw kʼaru wank saʼ xchʼoolebʼ ut saʼ xkʼaʼuxebʼ (Prov. 20:5). Tento ajwiʼ, teʼxkawresi xpaabʼalebʼ li xkokʼal re naq teʼxkuy xnumsinkil junaq li aaleek (1 Cor. 3:10-15). Li bʼideo Estas palabras tienen que estar en tu corazón naxkʼut naq aajel ru naq rajlal tqaloqʼoni li Yos saʼ junajil joʼ junkabʼal. Ilomaq saʼ komonil ut chirix chik aʼan teetzʼil rix ebʼ li patzʼom aʼin.
1) Kʼaʼut naq ebʼ laj Roman moko wankebʼ ta xchʼool chirix li xkʼanjel li Yos? 2) Kʼaʼut naq li yuwaʼbʼej moko us ta kiʼelk naq kixyal xloqʼoninkil li Yos saʼ junajil joʼ junkabʼal? 3) Joʼ naxchʼolobʼ li Santil Hu, kʼaru tzʼaqal natenqʼank re xkʼirisinkilebʼ li kokʼal? (Deut. 6:6, 7.) 4) Kʼaru us xbʼaanunkil re naq wanq li seeraqʼik saʼ li junkabʼal? 5) Kʼaru teʼxkanabʼ xbʼaanunkil ebʼ li naʼbʼej yuwaʼbʼej re naq us teʼkʼiiq ebʼ li xkokʼal? 6) Kʼaru keʼxbʼaanu ebʼ laj Vargas re xtenqʼankilebʼ laj Roman? (Prov. 27:17.) 7) Chanru tento tixkawresi ribʼ li yuwaʼbʼej wi naraj naq us t-elq li xkʼanjel chirix xloqʼoninkil li Yos saʼ junajil joʼ junkabʼal? 8) Kʼaru kixbʼaanu li yuwaʼbʼej re naq t-oq chi usaak li xjunkabʼal? 9) Kʼaʼut tento naq junelik twanq xloqʼoninkil li Yos joʼ junkabʼal? (Efes. 6:4.) 10) Ye wiibʼ oxibʼ li naʼlebʼ li naru nakʼanjelak re xloqʼoninkil li Yos saʼ junajil joʼ junkabʼal. 11) Naq laj Tomas kiʼaatinak rikʼin laj Marcos, li ralal, chirix xbʼaanunkil li us, kʼaʼut us naq kaw kiʼaatinak abʼan inkʼaʼ kichalk xjosqʼil? (Jer. 17:9.) 12) Naq li xRebeca kiʼok xnawbʼal ru laj Justin, kʼaru kixbʼaanu li naʼbʼej yuwaʼbʼej re naq li xrabʼin tkʼoxlaq chiʼus? (Mar. 12:30; 2 Tim. 2:22.) 13) Naq laj Tomas ut xMonica keʼxjal xwanjikebʼ, kʼaʼut naru nakaaye naq kiʼok chi kawuuk xpaabʼalebʼ? (Mat. 6:33.) 14) Chanru natenqʼank li bʼideo aʼin re naq ebʼ li nekeʼjolomink re li junkabʼal teʼxkʼe reetal naq aajel ru naq teʼxkawresi xpaabʼal li xjunkabʼal? (1 Tim. 5:8.) 15) Kʼaru tento teʼxbʼaanu ebʼ li nekeʼjolomink re li junkabʼal?
CHOʼQ REHEBʼ LI NEKEʼJOLOMINK RE LI JUNKABʼAL: Naq xkʼutbʼesimank li eetalil aʼin saʼ li nimla chʼutam re oxibʼ kutan re li chihabʼ 2011, ma xaakʼe reetal naq naru naʼusa laakʼanjel chirix xloqʼoninkil li Yos saʼ junajil joʼ junkabʼal? Ut naq ak xaawil li bʼideo, ma xaakʼe reetal naq toj wank naru nakaabʼaanu? Tijon chiru li Jehobʼa re naq tatxtenqʼa chi xbʼaanunkil li naʼajmank re naq laajunkabʼal truuq chi koleʼk (Efes. 5:15-17).