Qoksihaq chiʼus li tasal hu Kʼaru naxchʼolobʼ?

Naq ebʼ li qatzolom nekeʼok xtzolbʼal ut xyuʼaminkil li naxye li Santil Hu, naʼok chi kʼutunk naq yook chi kʼiik xpaabʼalebʼ (Sal. 1:1-3). Wi naqoksi chiʼus li jalan jalanq chi naʼlebʼ li naxkʼam chaq li tasal hu Kʼaru naxchʼolobʼ?, tooruuq xtenqʼankilebʼ re naq teʼkʼiiq saʼ xpaabʼalebʼ.

Ebʼ li patzʼom li wank saʼ xtiklajik. Li junjunq chi tzolom natiklaak rikʼinebʼ li patzʼom li wank xsumenkil saʼ li tzolom. Naqayaabʼasi ebʼ li patzʼom re naq t-alaaq saʼ xchʼool tzolok ut maawaʼ re naq tixsume ebʼ li patzʼom. Jun chik li naʼlebʼ li naru xbʼaanunkil, tqaye re, naq tixsume rikʼin wiibʼ oxibʼ li aatin li junjunq chi patzʼom. Ut wi inkʼaʼ naxsume chiʼus junaq li patzʼom, moko aajel ta ru naq tqaye re, naq xpaltoʼk, xbʼaan naq rikʼin li tixsume tqakʼe reetal bʼar naʼajmank xtenqʼankil naq tqakʼe xtzolbʼal (Prov. 16:23; 18:13).

Xkomon li naʼlebʼ. Wi xtaw ru chiʼus li yook xtzolbʼal, us raj naq tqaye re, naq tixtzol xjunes li xkomon li naʼlebʼ li wank saʼ xraqik li tasal hu. Naq tootzoloq wiʼ chik rikʼin, tqabʼaan wiibʼ oxibʼ chik li patzʼom re rilbʼal ma toj wank inkʼaʼ naxtaw ru. Ut wi joʼkan, tqoksi wiibʼ oxibʼ li kʼasal re xtzʼilbʼal rikʼin li xkomon li naʼlebʼ malaj wiibʼ oxibʼ ajwiʼ li xraqal. Naru naqayaabʼasi ebʼ li raqal ut tqabʼaanu wiibʼ oxibʼ li patzʼom li ak xqakʼubʼ chaq.

Li kaaxukuut re xjultikankil li ak xtzolmank. Li junjunq chi tzolom naraqeʼk rikʼin jun li kaaxukuut re xjultikankil li ak xtzolmank ut aran wank xsumenkil ebʼ li patzʼom li wank saʼ xtiklajik li tzolom. Wi naqatzʼil li kaaxukuut rikʼin li qatzolom, tqakʼe reetal ma naxtaw ru li xninqal ru naʼlebʼ ut ma naxnaw xchʼolobʼankil. Naq ak xqayaabʼasi saʼ wiibʼal li xsumenkil ebʼ li patzʼom ut ebʼ li xraqal li Santil Hu, qayehaq re, naq roksihaq ebʼ li raqal aʼin re xchʼolobʼankil kʼaʼut yaal li naʼlebʼ li wank saʼ li kaaxukuut (Hech. 17:2, 3).