Cheekʼam eere rikʼinebʼ li propeet: laj Habacuc
1. Kʼaʼut naqataw ru li kirekʼa chaq laj Habacuc?
1 Naq naqil chanru yook chi numtaak li maaʼusilal arin saʼ li ruuchichʼochʼ, maare nokooʼok rekʼankil qibʼ joʼ laj Habacuc, naq kixpatzʼ re li Jehobʼa kʼaʼut inkʼaʼ narisi li maaʼusilal (Hab. 1:3; 2 Tim. 3:1, 13). Wi naqakʼe qachʼool chi xkʼoxlankil li kixye chaq laj Habacuc ut xkʼoxlankil li xkawil xpaabʼal naru nokooxtenqʼa chi roybʼeninkil li raqok aatin li tixkʼam chaq li Jehobʼa (2 Ped. 3:7).
2. Chanru tqabʼaanu re naq junelik kawaq li qapaabʼal joʼ laj Habacuc?
2 Junelik kawaq li qapaabʼal. Laj Habacuc moko kixchunubʼ ta ribʼ chi xkʼoxlankil li xrahilal, ajʼo ru junelik ut yook chaq chi kʼanjelak chiru li Yos (Hab. 2:1). Li Jehobʼa kixye re laj Habacuc, li xpropeet, naq li Raatin ttzʼaqloq ru saʼ xqʼehil ut li kawebʼ xpaabʼal teʼkoleʼq (Hab. 2:2-4). Ut anaqwan naq wanko saʼ xqʼehil li rosoʼjik, kʼaru naraj xyeebʼal aʼin choʼq qe joʼ aj paabʼanel? Naraj xyeebʼal naq jwal oxloqʼ xnawbʼal naq twulaq li rosoʼjik chiru xnawbʼal joqʼe twulaq li rosoʼjik. Li xkawil li qapaabʼal tooxtenqʼa re naq ajʼoq qu ut re naq tqakʼe xbʼeenwa li puktesink saʼ li qayuʼam (Heb. 10:38, 39).
3. Kʼaʼut junelik tookʼanjelaq chi sa saʼ qachʼool chiru li Jehobʼa?
3 Sa li qachʼool chi kʼanjelak chiru li Jehobʼa. Tyaleʼq rix li qapaabʼal naq laj Gog re Magog tixrahobʼtesi li xtenamit li Jehobʼa (Ezeq. 38:2, 10-12). Rajlal naq nawank li nimla yalok, nachalk li chʼaʼajkilal, ut joʼkan ajwiʼ nekeʼril li nekeʼelk chi ubʼej saʼ li yalok u. Nekeʼsach xjunkabʼlal ebʼ li qas qiitzʼin, namaakʼaʼoʼk li tzakahemq ut wank sut naterqʼuuk chixjunil. Kʼaru tqabʼaanu naq tqil li chʼaʼajkilal aʼin? Laj Habacuc ak naxnaw naq twanq li chʼaʼajkilal, joʼkan naq kixkawresi ribʼ chi kʼanjelak chiru li Jehobʼa chi sa saʼ xchʼool (Hab. 3:16-19). «Li sahil chʼoolej li nachalk rikʼin li Qaawaʼ [Jehobʼa]» tooxtenqʼa ajwiʼ chi xkuybʼal li aaleek (Neh. 8:10; Heb. 12:2).
4. Kʼaru nokooruuk xbʼaanunkil anaqwan ut saʼ li kutan chaalel?
4 Li Jehobʼa maajunwa tixkanabʼ xtzolbʼalebʼ li teʼkoleʼq saʼ xkutankil li raqbʼa aatin (Hab. 2:14). Li teʼwakliiq wiʼ chik chi yoʼyo teʼxtzol ajwiʼ ani li Jehobʼa. Ut saʼebʼ li qakutan, qakʼehaq qachʼool chi aatinak rikʼin chixjunilebʼ li qas qiitzʼin chirix li Yos ut chirix li xnimal ru bʼaanuhom (Sal. 34:2 [Sal. 34:1, Wy]; 71:17).