Kʼaru nekeʼxkʼut chiqu ebʼ li propeet chirix li Yos?
Saʼ najter qʼe kutan, li Yos kiroksihebʼ li propeet re xyeebʼal li esil li wank xwankil rehebʼ li poyanam. Ma naxkʼut chiqu ebʼ li esil aʼin li tento tqabʼaanu re xtawbʼal li rosobʼtesihom li Yos? Joʼkan, qilaq kʼaru naqatzol chirix li keʼxye oxibʼ li propeet.
LAJ ABRAHÁN
Li Yos inkʼaʼ nasikʼok u ut naraj qosobʼtesinkil.
Li Yos kixye re li propeet Abrahán: «Osobʼtesinbʼilaqebʼ saʼ laakʼabʼaʼ chixjunil li tenamit saʼ ruuchichʼochʼ» (Génesis 12:3).
Kʼaru naqatzol? Li Yos nokooxra ut naraj rosobʼtesinkil (ebʼ li winq, ixq ut kokʼal) li nekeʼabʼink chiru.
LAJ MOISÉS
Li Yos natoqʼobʼank u ut narosobʼtesihebʼ li nekeʼxkʼe xqʼe chi xnawbʼal ru.
Li Nimajwal Yos kixkʼe xwankil li propeet Moisés re xbʼaanunkil ebʼ li sachbʼachʼoolej. Usta joʼkan, laj Moisés kixtzʼaama re li Yos: «Kʼe chinnaw laawajom re naq kʼojkʼooq linchʼool chawix ut junelik tintaw usilal chawu» (Éxodo 33:13). Li Yos kixkʼulubʼa li kixye laj Moisés, kixkʼe xnaʼlebʼ ut kixtenqʼa chi xnawbʼal chanru nakʼoxlak ut nanaʼlebʼak. Laj Moisés kixkʼe reetal naq laj Yobʼtesinel aʼan jun li «Yos aj uxtaan ut tuulan» (Éxodo 34:6, 7).
Kʼaru naqatzol? Li Yos trosobʼtesihebʼ (li winq, ixq ut kokʼal) wi nekeʼxkʼe xqʼe chi xnawbʼal ru. Li Santil Hu naxye qe chanru tqaloqʼoni ru re naq toorosobʼtesi.
LI JESÚS
Li Jesús kitoqʼobʼank u ut kixkʼirtasi yalaq kʼaru li yajel.
Li Yos toorosobʼtesi chi junelik wi naqatzol li kixbʼaanu ut kixkʼut li Jesús.
Li Santil Hu naʼaatinak chirix li xyuʼam ut li xkʼutum li Jesús. Li Yos kixkʼe xwankil li Jesús re xkʼirtasinkil li mutzʼ, li tzʼap xik ut li yeq roq. Kixwaklesihebʼ wi chik chi yoʼyo wiibʼ oxibʼ li kamenaq. Chi joʼkan li Jesús kixkʼutbʼesi li tixbʼaanu li Yos saʼ li kutan chalk re. Aʼan kixye kʼaru tento tqabʼaanu re xtawbʼal li osobʼtesihom aʼin: «Aʼan aʼin li junelik yuʼam: naq teʼxnaw aawu laaʼat li junat chi tzʼaqal Yos ut li xataqla chaq, li Jesus aʼ li Kriist» (Juan 17:3).
Li Jesús natoqʼobʼank u, tuulan ut chaabʼil. Ebʼ li winq ut ixq keʼxkʼulubʼa li xbʼoqom li Jesús: «Tzolomaq eeribʼ wikʼin, xbʼaan naq tuulanin ut qʼun linchʼool, ut sa texwanq» (Mateo 11:29). Li Jesús us kirilebʼ li ixq, kiroxloqʼihebʼ ut inkʼaʼ kixtzʼeqtaanahebʼ joʼ keʼxbʼaanu wiibʼ oxibʼ li winq.
Kʼaru naqatzol? Li Jesús qʼaxal kixrahebʼ li qas qiitzʼin ut kixkanabʼ jun chaabʼil eetalil chirix chanru tqara qibʼ chiqibʼil qibʼ.
LI JESÚS MOKO AʼAN TA LI YOS
Li Santil Hu naxye naq «jun ajwiʼ chi Yos wank» ut li Jesús yal aj kʼanjel chiru (1 Corintios 8:6). Li Jesús kixye naq li Yos nim xwankil chiru ut aʼan kitaqlank chaq re saʼ Ruuchichʼochʼ (Juan 11:41, 42; 14:28).a