Tzʼaama re li Yos naq tatrosobʼtesi

Li Yos kixkʼe qe jun li nimla maatan: tooruuq chi aatinak rikʼin ut tqaye re li naqekʼa. Li propeet David kixye re li Yos: «Xbʼaan naq laaʼat nakawabʼi li qatij. Chakʼatq laaʼat nekeʼjilok chixjunilebʼ li xeʼtawak saʼ li maak» (Salmo 65:3). Chanru tootijoq re naq li Yos toorabʼi ut toorosobʼtesi?

TE LAACHʼOOL UT KUBʼSI AAWIBʼ

Salmo 62:9 naxye: «Tehomaq leechʼool chiru». Naq nokootijok chiru li Yos naru naqaye re chixjunil li wank saʼ qachʼool. Li Nimajwal Yos oxloqʼ chiru naq nokootijok chi anchal qachʼool.

OKSI XKʼABʼAʼ LI YOS NAQ TATTIJOQ

Usta li Yos wank naabʼal ruuchil xkʼabʼaʼ abʼan jun ajwiʼ xkʼabʼaʼ. «Laaʼin li Qaawaʼ [«Jehobʼa», TNM]. Aʼin tzʼaqal linkʼabʼaʼ» (Isaías 42:8). Li kʼabʼaʼej Jehobʼa, kitawmank wuqubʼ mil sut saʼ li Santil Hu. Naabʼalebʼ li propeet keʼroksi xkʼabʼaʼ li Yos. Li propeet Abrahán kixye re li Jehobʼa: «Chakuy inmaak [...] tinpatzʼoq wiʼ chik aawe» (Génesis 18:30, Li Santil Hu, Wycliffe Bible Translators, [Wy]). Aajel ajwiʼ ru naq tqoksi xkʼabʼaʼ li Yos, Jehobʼa, naq tootijoq.

TIJON SAʼ LAAWAATINOBʼAAL

Li Yos naxtaw ru li naqekʼa ut li naqakʼoxla maakʼaʼ naxye kʼaru li qaatinobʼaal. Li Santil Hu naxye qe: «Li Yos juntaqʼeet narilebʼ chixjunil ut sa naxkʼul chixjunilebʼ li nekeʼpaabʼank re ut nekeʼxbʼaanu li tiikilal, aʼ yaal kʼaʼ chi tenamitul yoʼlajenaqebʼ wiʼ» (Hechos 10:34, 35).

Abʼan re naq li Yos toorosobʼtesi moko kaʼaj tawiʼ tootijoq chiru. Saʼebʼ li tzolom li tqil tqakʼe reetal kʼaru chik tqabʼaanu.