Ebʼ li bʼich chirix li Xʼawabʼejilal li Yos naxkawresi qachʼool

Laj Pablo ut laj Silas keʼbʼichank chiru li Jehobʼa naq wankebʼ chaq saʼ tzʼalam (Hch 16:25). Saʼebʼ li qakutan, ebʼ li qech aj paabʼanel keʼxbʼicha ajwiʼ ebʼ li bʼich chirix li Xʼawabʼejilal li Yos naq keʼwank Sachsenhausen Alemania nazi ut naq keʼkʼameʼk saʼ li tenamit Siberia chi preexil. Ebʼ li eetalil aʼin naxkʼutbʼesi naq wank xwankil ebʼ li bʼich re xkawresinkil xchʼool ebʼ li qech aj paabʼanel li yookebʼ xnumsinkil ebʼ li aaleek.

Li akʼ bʼichlebʼaal, li naxkʼabʼaʼi Cantemos con gozo a Jehová, chi seebʼ twanq saʼ naabʼal chi aatinobʼaal. Naq ak wanq qikʼin li tasal hu aʼin, qatzolaq naabʼal sut ebʼ li bʼich aʼin naq yooqo xloqʼoninkil li Jehobʼa joʼ junkabʼal re naq tkanaaq chiqu li naxye (Ef 5:19). Ut chi joʼkan, naq tchalq junaq li chʼaʼajkilal saʼ qabʼeen, li santil musiqʼej tooxtenqʼa chi xjultikankil kʼaru naxye li bʼich. Ebʼ li bʼich chirix li Xʼawabʼejilal li Yos nokooxtenqʼa chi xkʼebʼal qachʼool chirix li qoybʼenihom. Ebʼ li bʼich nekeʼxkʼe qametzʼew naq naqakʼul junaq li aaleek. Ut tooxtenqʼa ajwiʼ naq sa wanqo, li xchʼinaʼusal li bʼich naxbʼaanu naq toobʼichanq chi anchal qachʼool (1Cr 15:16; Sl 33:1-3). Joʼkan naq, qakʼehaq qachʼool chi xtzolbʼal chiʼus ebʼ li bʼich chirix li Xʼawabʼejilal li Yos.

IL LI BʼIDEO UNA CANCIÓN QUE ROMPIÓ LAS CADENAS UT CHIRIX CHIK AʼAN TAASUME EBʼ LI PATZʼOM AʼIN:

• Saʼ kʼaru li rahilal wank li hermaan Frost naq kixbʼaanu jun li bʼich?

• Chanru naq li bʼich aʼin kixkawresi xchʼoolebʼ li hermaan li keʼwank chi preexil Sachsenhausen?

• Joqʼe naru naxkʼe xkawilal laachʼool ebʼ li bʼich chirix li Xʼawabʼejilal li Yos?

• Bʼar wank rehebʼ li bʼich chirix li Xʼawabʼejilal li Yos taawaj xtzolbʼal re naq tkanaaq chaawu?