QAYUʼAM JOʼ AJ PAABʼANEL
Taw xsahil aachʼool chi xpuktesinkil li chaabʼil esilal
Peʼyaal naq wank sut nachʼaʼajkoʼk chaawu elk chi puktesink? Wi joʼkan, moko kaʼaj tawiʼ laaʼat nakaakʼul aʼin, naabʼal qe naqakʼul ajwiʼ. Maare naqakʼul aʼin xbʼaan naq wank sut moko sa ta nokooʼeʼxkʼul malaj yiibʼebʼ ru xnaʼlebʼ, malaj nachʼaʼajkoʼk chiqu aatinak rikʼinebʼ li inkʼaʼ naqanawebʼ ru. Ebʼ li naʼlebʼ aʼin naru naxchʼina qachʼool, abʼan naqaloqʼoni jun li Yos li sa saʼ xchʼool, ut aʼan naraj naq tookʼanjelaq chiru chi sa saʼ qachʼool (Sl 100:2; 1Ti 1:11, TNM). Joʼkan naq, bʼar wank li oxibʼ chi naʼlebʼ li naxkʼe xsahil qachʼool saʼ li puktesink?
Li xbʼeen, naqayeechiʼi jun li esil li nakʼehok oybʼenihom. Usta ebʼ li poyanam moko naabʼal ta roybʼenihomebʼ, tooruuq xkʼebʼal xsahilebʼ xchʼool rikʼin li «chaabʼil esilal» (Isa 52:7). Joʼkan ajwiʼ, li chaabʼil esilal chirix li Xʼawabʼejilal li Yos naru naxkʼe ajwiʼ xsahil qachʼool. Naq toj maajiʼ nakatxik chi puktesink, kʼe aachʼool chi xkʼoxlankil ebʼ li osobʼtesink li tixkʼam chaq li Xʼawabʼejilal li Yos arin saʼ Ruuchichʼochʼ.
Li xkabʼ, li esil li naqapuktesi naxtenqʼa ebʼ li poyanam saʼebʼ li xyuʼam ut re naq teʼxnaw ru li Yos, xbʼaan naq nekeʼruuk xkanabʼankil li yiibʼru aj naʼlebʼ ut naru nekeʼxtaw ajwiʼ li junelik yuʼam (Isa 48:17, 18; Ro 1:16). Naru tqakʼoxla naq laaʼo jun rehebʼ laj kolol rehebʼ li poyanam, usta wanqebʼ inkʼaʼ teʼraj naq teʼkoleʼq, inkʼaʼ tqakanabʼ xsikʼbʼalebʼ toj reetal tqatawebʼ li nekeʼraj tzʼaqal koleʼk (Mt 10:11-14).
Li rox, jwal wank tzʼaqal xwankil: li puktesink li naqabʼaanu naxkʼe xloqʼal li Jehobʼa. Oxloqʼ chiru li kʼanjel aʼin (Isa 43:10; Heb 6:10). Ut moko kaʼaj tawiʼ aʼin, naxkʼe qe chi anchal xchʼool li xsantil musiqʼej re naq tooruuq xbʼaanunkil li kʼanjel aʼin. Joʼkan bʼiʼ, qatzʼaamaq re li sahil chʼoolejil li naxkʼe li ru li musiqʼej (Gal 5:22). Wi wank li Jehobʼa chiqakʼatq, tooruuq xnumsinkil li qakʼaʼuxl ut toopuktesinq chi maakʼaʼ qaxiw (Hch 4:31). Joʼkan naq, maakʼaʼ naxye chanru tooʼeʼxkʼul ebʼ li poyanam saʼ li qateep, sahaq saʼ qachʼool chi xbʼaanunkil li kʼanjel li tenebʼanbʼil saʼ qabʼeen (Eze 3:3).
Kʼaru raj twulaq chaawu rekʼankil naq tatpuktesinq? Chanru tatruuq xkʼutbʼesinkil xsahil aachʼool?
NAQ AK XAAWIL LI BʼIDEO CHANRU XINTAW WIʼ CHIK XSAHIL LINCHʼOOL KʼANJELAK CHIRU LI JEHOBʼA, TAASUME EBʼ LI PATZʼOM AʼIN:
Kʼaʼut tento tqakʼe xwankil xtzolbʼal qibʼ re xkawresinkil li qapaabʼal usta toopuktesinq naabʼal hoonal chiru li po?
Chanru tooruuq xkʼambʼal qe rikʼin xMaria?
Joqʼe nakaakʼe aahoonal re xkʼoxlankil li naxye li Raatin li Yos?
Kʼaru jwal nawulak chaawu chirix xpuktesinkil li chaabʼil esilal?