Tzol chiʼus li puktesink: Kʼut chiru laatzolom xkawresinkil ribʼ

KʼAʼUT US XBʼAANUNKIL. Wi li qatzolom naxkawresi ribʼ, inkʼaʼ chʼaʼajkaq chiru xtawbʼal ru ut xjultikankil li tqakʼut chiru. Aʼin ttenqʼanq re chi kʼiik saʼ junpaat saʼ xpaabʼal. Naq ak xsubʼ ribʼ saʼ haʼ, t-ajmanq ajwiʼ naq tixkawresi ribʼ choʼq rehebʼ li chʼutam ut choʼq re li puktesink re naq ajʼooq ru (Mt 25:13). Joʼkan bʼiʼ, xnawbʼal chanru ttzoloq ut xtzolbʼal ribʼ chi rajlal aʼan ttenqʼanq re saʼ chixjunil li xyuʼam. Chalen saʼ xtiklajik, tento tqakʼut chiruhebʼ li qatzolom naq teʼxtzol xkawresinkil ribʼ chirix li naʼlebʼ li teʼxtzol qikʼin.

CHANRU XBʼAANUNKIL:

• 

  Teʼxkʼam re aawikʼin (Ro 2:21). Kawresi aawibʼ chirix li junjunq chi naʼlebʼ li taakʼut ut naq taabʼaanu taakʼoxla laatzolom re naq tixtaw ru (km 11/15 perel 3). Taakʼut chiru laahu re naq tril naq tzolbʼil xsaʼ.

• 

  Taaye re, naq tixkawresi ribʼ. Naq ak naabʼal sut xatwulak chi xtzolbʼal, taaye re, naq xkawresinkil ribʼ aʼan ajwiʼ wank saʼ xyanq li tzolok li nakaakʼe re ut taachʼolobʼ chiru li rusilal li natawmank. Tenqʼa rikʼin wiibʼ oxibʼ li naʼlebʼ chirix bʼar trisi xhoonal re xbʼaanunkil. Wankebʼ laj paabʼanel nekeʼxtoʼoni li xhu li ak tzolbʼil xsaʼ rehebʼ li xtzolom saʼ xhoonalil li tzolok re naq teʼxkʼe reetal li rusilal li natawmank. Taawaklesi xchʼool naq tixkawresi ribʼ.

• Kʼut chiru chanru tixkawresi ribʼ. Wankebʼ laj puktesinel nekeʼroksi ebʼ li xbʼeen tzolok re xkʼutbʼal chiruhebʼ li xtzolom chanru teʼxkawresi ribʼ chirix junaq rehebʼ aʼin.