Sahaq laachʼool!: ebʼ li akʼ kʼanjelobʼaal re xkʼutbʼal li yaal

Kʼajoʼ nasahoʼk saʼ qachʼool naq wank jun akʼ tasal hu ut folleto re xtzolbʼalebʼ li kristiʼaan chirix li Santil Hu! Naqatzʼaama re li Jehobʼa naq chi rosobʼtesihaq li kʼanjel li naqabʼaanu re xkʼebʼalebʼ li kristiʼaan choʼq xtzolom li Jesús (Mt 28:18-20; 1Co 3:6-9). Chanru tooruuq roksinkil ebʼ li akʼ kʼanjelobʼaal aʼin?

Naʼajmank naq tqajal chanru tookʼutuq xbʼaan naq anaqwan wank naabʼal li kʼanjel bʼarwiʼ laj kʼutunel ut li yookebʼ chi tzolok teʼtzʼaqonq. Joʼkan naq, chaabʼaanu aʼin naq tkawresi aawibʼ ut naq taatzol junaq li poyanam:a

• Yaabʼasi ebʼ li naʼlebʼ ut tzʼil rix ebʼ li patzʼom.

• Yaabʼasi ebʼ li xraqal li Santil Hu li nayeemank ut tenqʼa laatzolom re naq tixtaw ru.

• Kʼe ebʼ li bʼideo ut bʼaanu ebʼ li patzʼom li natawmank saʼ li tasal hu.

• Naq taatzol jun li poyanam, yal xkʼebʼal chixjunil li tzolom.

Naq tatpuktesinq, yeechiʼi xbʼeenwa li folleto re rilbʼal wi li poyanam naraj xnawbʼal xkomon li naʼlebʼ (chaawil li kaaxukuut «Chanru xyeechiʼinkil li folleto Sahaq laachʼool! naq tat-aatinaq xbʼeen sut?». Wi teechoy xtzolbʼal li folleto ut li kristiʼaan naraj xnawbʼal xkomon li naʼlebʼ, yeechiʼi re li tasal hu ut teetikibʼ saʼ li tzolom 4. Wi li poyanam ak yook xtzolbʼal jun rehebʼ li qatasal hu, anaqwan taawoksi li tasal hu Sahaq laachʼool! Ut laaʼat yaal aawe saʼ kʼaru tzolom taatikibʼ.

NAQ AK XAAWIL LI BʼIDEO NASAHOʼK SAʼ QACHʼOOL AAKʼULBʼAL RE XTZOLBʼAL LI SANTIL HU, TAASUME EBʼ LI PATZʼOM AʼIN:

• Kʼaru teʼxtzol ebʼ li tzolom saʼ li akʼ tasal hu?

• Kʼaʼut naq taakʼut li bʼideo aʼin rehebʼ li xeʼxtikibʼ tzolok?

• Kʼaru li naʼlebʼ naru taaye re laatzolom naq truuq xbʼaanunkil? (Chaawil li kaaxukuut «Li xnimal ru naʼlebʼ ut li rajom li junjunq chi tasal»).