QAYUʼAM JOʼ AJ PAABʼANEL
Anihebʼ wankebʼ choʼq aawamiiw saʼ internet?
Jun li amiiw aʼan li naxkʼutbʼesi naq naxra li jun chik. Laj David ut laj Jonatán keʼok chi wank saʼ amiiwil naq laj David ak kixkamsi laj Goliat (1Sa 18:1). Keʼril li xchaabʼilal xnaʼlebʼ chiribʼilebʼ ribʼ, ut aʼin kixbʼaanu naq teʼwanq tzʼaqal saʼ amiiwil. Joʼkan bʼiʼ, re naq tqataw junaq li tzʼaqal amiiw, tento naq tqanaw ru chiʼus, ut naʼajmank hoonal ut naq tqakʼe qachʼool chirix aʼin. Abʼanan, saʼ internet saʼ junpaat naru natawmank li nekeʼxbʼaanu ribʼ naq teʼwanq choʼq aawamiiw. Saʼ internet moko chʼaʼaj ta chiruhebʼ xmuqbʼal anihebʼ tzʼaqal, xbʼaan naq naru nekeʼxsikʼ li nekeʼraj naq teʼril ut teʼxnaw ebʼ li junchʼol. Joʼkan naq, us naq tqakʼubʼ li naʼlebʼ re xnawbʼal anihebʼ tqakʼulubʼa choʼq qamiiw saʼ internet. Matxuwak wi inkʼaʼ taakʼulubʼa junaq li kristiʼaan li naraj wank choʼq aawamiiw li inkʼaʼ nakaanaw ru chiʼus xbʼaan naq taakʼoxla naq tpoʼq aawikʼin. Saʼ xkʼabʼaʼ naq wank naabʼal li chʼaʼajkilal, wankebʼ inkʼaʼ nekeʼraj roksinkil li internet re xtawbʼalebʼ li ramiiw. Abʼan, wi nakaawaj roksinkil, kʼaru raj us naq taajultika?
NAQ AK XAAWIL LI BʼIDEO CHIWANQ AANAʼLEBʼ NAQ TAAWOKSI EBʼ LI REDES SOCIALES!, TAASUME EBʼ LI PATZʼOM AʼIN:
Kʼaru tento wanq saʼ laachʼool naq toj maajiʼ nakaataqsi junaq li jalam u ut li esil?
Kʼaʼut tento taasikʼ chiʼus anihebʼ teʼwanq choʼq aawamiiw saʼ internet?
Kʼaʼut tento taaxaqabʼ jarubʼ hoonal taawoksi saʼ internet? (Ef 5:15, 16).