Chanru tatxtenqʼa li tijok?
Li xPamela nim li xyajel ut xkoho rikʼin laj bʼanonel. Kitijok ajwiʼ chiru li Jehobʼa ut kixtzʼaama xmetzʼew re xkuybʼal li yajel. Ma kitenqʼaak xbʼaan li tij?
Aʼan naxye: «Naq yookebʼ xbʼanbʼal linkanser, jwal yook chaq inxiw. Abʼan, naq xintijok chiru li Jehobʼa, kituqlaak ru inchʼool ut ninruuk chik chi kʼoxlak chiʼus. Toj wank inrahilal, abʼan li tijok nikinxtenqʼa chi rilbʼal naq wank rusilal linyuʼam. Naq nekeʼraj xnawbʼal chanru wankin, ninye: “Yajin, abʼan sa inchʼool”».
Moko kaʼaj tawiʼ tootijoq chiru li Yos naq wanqo saʼ chʼaʼajkilal. Chiqajunilo wank qachʼaʼajkilal usta nim malaj kachʼin, abʼan naqaj naq tooʼeʼxtenqʼa re xnumsinkil. Ma truuq qatenqʼankil li tijok?
Li Santil Hu naxye: «Chaqʼaxtesi saʼ ruqʼ li Qaawaʼ li kʼaʼux wiʼ laachʼool, ut aʼan taakuutunq aawe; maajoqʼe tixkanabʼ li tiik xchʼool chi osoʼk chi junajwa» (Salmo 55:23). Aʼin naxwaklesi qachʼool. Chanru tooxtenqʼa li tijok? Naq nokootijok joʼ chanru naraj li Yos, aʼan tooxtenqʼa re xqʼaxbʼal ru li qachʼaʼajkilal (chaawil li kaaxukuut «Kʼaru rusilal naqataw naq nokootijok?»).