Bʼar tatruuq xtawbʼal li naʼlebʼ re naq us tat-elq saʼ laayuʼam?

Joʼ ak xqil rubʼelaj, naabʼalebʼ li kristiʼaan nekeʼxkʼoxla naq chaabʼilaq ebʼ li xyuʼam, wi nekeʼxkʼojobʼ xchʼool rikʼin li ak xaqabʼanbʼil naq tkʼulmanq saʼ li qayuʼam, li tzolok, li tumin malaj chaabʼilaqebʼ xnaʼlebʼ. Xbʼaanunkil aʼin chanchan roksinkil jun li hu li naxkʼut reetalil li tenamit li moko usta. Abʼanan, aʼin moko naraj ta xyeebʼal naq maakʼaʼ junaq li naʼlebʼ li truuq qatenqʼankil re naq chaabʼilaq li qayuʼam.

LI TENQʼ LI NACHALK RIKʼIN LI JWAL WANK XNAʼLEBʼ

Naq naqaj xbʼaanunkil junaq li naʼlebʼ, naqasikʼ qatenqʼankil rikʼin junaq li wank xnawom ut tiix chiqu. Joʼkan bʼiʼ, wi naqaj naq chaabʼilaq li qayuʼam tqakʼulubʼa li xtenqʼ li wank xnawom chiqu. Tooruuq xtawbʼal li tenqʼ aʼin saʼ li Santil Hu li kitzʼiibʼamank chaq numenaq 3,500 chihabʼ anaqwan.

Kʼaʼut tatruuq xpaabʼankil li wank saʼ li Santil Hu? Xbʼaan naq laj echal re wank li xchoxahil naʼlebʼ saʼ chixjunil li choxachʼochʼ. Aʼan «li Tiixil Wiinq» li wank «junqʼe junqʼe kutan!» (Daniel 7:9, Wy; Salmo 90:2). Aʼan «laj yoobʼtesihom re li choxa, Aʼan tzʼaqal Yos, li kikʼuubʼank ut kiyiibʼank re li ruuchichʼochʼ» (Isaías 45:18). Aʼan naxye qe naq li xkʼabʼaʼ aʼan: Jehobʼa (Salmo 83:18, TNM).

Saʼ xkʼabʼaʼ naq li Santil Hu chalenaq rikʼin laj Yobʼtesinel, inkʼaʼ naxye naq junaq li tenamit jwal chaabʼil chiru li jun chik. Ak naabʼal li kristiʼaan xeʼxkʼe reetal naq ebʼ li naʼlebʼ aʼin nekeʼkʼanjelak ut nekeʼtenqʼank. Li hu aʼin ak kijalmank saʼ naabʼal chi aatinobʼaal ut yook chi kijekʼimank saʼ chixjunil li Ruuchichʼochʼ.a Joʼkan naq yalaq ani naru xtawbʼal ru li wank chisaʼ ut roksinkil re xbʼeresinkil li xyuʼam. Joʼkan naq li Santil Hu naxye:

«Li Yos juntaqʼeet narilebʼ chixjunil ut sa naxkʼul chixjunilebʼ li nekeʼpaabʼank re ut nekeʼxbʼaanu li tiikilal, aʼ yaal kʼaʼ chi tenamitul yoʼlajenaqebʼ wiʼ» (HECHOS 10:34, 35).

Joʼ naq junaq li yuwaʼbʼej naxra ut naxtenqʼa ebʼ li xkokʼal, li Jehobʼa Yos jwal nokooxra ut nokooxtenqʼa rikʼin li Santil Hu (2 Timoteo 3:16). Paabʼajel li naxye li Raatin li Yos. Aʼan xooxyobʼtesi ut naxnaw li kʼaru us choʼq qe.

PAABʼAJEL LI NAXYE LI SANTIL HU

Tooruuq xpaabʼankil li naxye li Santil Hu chirix ebʼ li kutan chalk re xbʼaan naq yook chi tzʼaqlok ru saʼebʼ li qakutan li kiyeemank chaq numenaq 2,000 chihabʼ anaqwan.

LI TKʼULMANQ

«Teʼwaklijeʼq chi xkamsinkil ribʼebʼ li tenamit rikʼin jalan chik tenamit, ut li awabʼej rikʼin jalan chik awabʼej. Talajeʼwanq ninqi hiik ut, saʼ naabʼal chi naʼajej, taawanjeʼq weʼej ut yajel» (LUCAS 21:10, 11).

EBʼ LI KRISTIʼAAN

«Saʼ rosoʼjikebʼ li kutan wank honal qʼaxal chʼaʼajkaq xnumsinkil. Ebʼ li winq junes rehebʼ teʼraj, teʼxrahi ru li tumin, teʼxnimobʼresihatq xwankilebʼ, teʼxqʼetqʼeti ribʼebʼ, aj majewanelaqebʼ, aj qʼetolaqebʼ raatin xnaʼ xyuwaʼ, maakʼaʼ chik teʼxnaw xyoxinkil ut teʼxtzʼeqtaana li paabʼank. Inkʼaʼ chik teʼxrahatq ribʼ, maakʼaʼaq chik usilal rikʼinebʼ, aj yoobʼanelaqebʼ aatin, inkʼaʼ teʼxkuy ribʼ, qʼaxal josqʼaqebʼ, xikʼ teʼril li chaabʼilal, aj bʼalaqʼaqebʼ ut kawaqebʼ ribʼ chi xbʼaanunkil li inkʼaʼ us. Taanumtaaq li xqʼetqʼetilebʼ, aʼ chik li xsahilal li ruuchichʼochʼ teʼrataw chiru li xraabʼal li Yos» (2 TIMOTEO 3:1-4).

Saʼ xkʼabʼaʼ naq yook chi tzʼaqlok ru ebʼ li propesiiy li wank saʼ li Santil Hu usta kitzʼiibʼamank chaq junxil, kʼaru naxkʼut chaawu aʼin? Maare nakaakʼoxla joʼ laj Leung li wank Hong Kong. Aʼan naxye: «Junxil kitzʼiibʼamank chaq ebʼ li propesiiy aʼin, joʼkan naq maajun junaq kristiʼaan kiruuk raj xyeebʼal ebʼ li aatin aʼin chi chʼolchʼo ru. Aʼin naxkʼutbʼesi naq qʼaxal wank xnaʼlebʼ laj echal re li Santil Hu chiqu laaʼo».

Saʼ li Santil Hu natawmank chi siʼeent ebʼ li propesiiy li ak xeʼtzʼaqlok ru.b Aʼin naxkʼutbʼesi naq aʼan tzʼaqal li Raatin li Yos. Li Jehobʼa naxye: «Laaʼin li Qaawaʼ, ut maajun juntaqʼeetin wiʼ. Laaʼin ninye chi rubʼelaj li taakʼulmanq moqon» (Isaías 46:9, 10). Joʼkan naq naru naqapaabʼ li naxye li Santil Hu chirix ebʼ li kutan chalk re.

JUN LI NAʼLEBʼ LI TATXTENQʼA ANAQWAN UT CHI JUNELIK

Wi nakaayuʼami li naʼlebʼ li wank saʼ li Santil Hu us tat-elq. Qilaq wiibʼ oxibʼ li eetalil.

LI TUMIN UT LI KʼANJEL

«Abʼanan qʼaxal us li hilank junpaataq chiru li kawil kʼanjelak, xbʼaan naq aʼin chanchan li chapok iqʼ» (ECLESIASTÉS 4:6).

LI JUNKABʼAL

«Li junjunq saʼ eeyanq chixra li rixaqil joʼ naq naxra ribʼ; ut li ixaqilbʼej chiroxloqʼi li xbʼeelom» (EFESIOS 5:33).

CHANRU NAKAAKʼAM AAWIBʼ RIKʼINEBʼ LI JUNCHʼOL

«Matpoʼk, chakanabʼ laajosqʼil; wi yal chʼinpoʼaqat, ra taachalq saʼ aabʼeen» (SALMO 37:8).

Wi nakaayuʼami li naʼlebʼ li wank saʼ li Santil Hu sahaq aachʼool anaqwan ut chi junelik. Li Santil Hu naxye chanruhaq li qayuʼam saʼebʼ li kutan chalk re.

TEʼWANQ SAʼ TUQTUUKILAL

«Kʼajoʼ xnimal li tuqtuukil usilal teʼxyal chi junelik!» (SALMO 37:11).

TEʼWANQ ROCHOCH UT XTZEKEMQ

«Ebʼ li poyanam teʼkabʼlaq ut teʼwanq chisaʼ; teʼawq uubʼ ut teʼxtzeka li ru» (ISAÍAS 65:21).

MAAʼANI CHIK TYAJERQ CHI MOKO TKAMQ

«Inkʼaʼ chik taawanq kamk, chi moko yaabʼak, chi moko japok e malaj rahilal» (APOCALIPSIS 21:4).

Kʼaru taabʼaanu re naq joʼkanaq laayuʼam? Taataw xsumenkil saʼ li jun chik tzolom.

a Saʼ li tasal 5 re li hu Sahaq laachʼool chi junelik! taataw ebʼ li tzolom ut ebʼ li bʼideo li tixchʼolobʼ chanru najalmank ut najekʼimank li Santil Hu. Sik saʼ www.pr418.com ut pitzʼ bʼarwiʼ naxye EBʼ LI KʼANJELOBʼAAL > JALAN CHIK LI HU.

b Re xtawbʼal xkomon li naʼlebʼ, il li tasal 3 re li hu Sahaq laachʼool chi junelik! li wank saʼ www.pr418.com. Sikʼ bʼarwiʼ naxye EBʼ LI KʼANJELOBʼAAL > JALAN CHIK LI HU.