Seʼseʼ ru naq kirilebʼ!

WIIBʼ li saaj ixq yookebʼ chi bʼeek bʼarwiʼ naabʼal li kʼayibʼaal saʼ li teep Baguio (Filipinas). Tojaʼ naq xeʼril jun li kʼanjelobʼaal re puktesink, abʼan inkʼaʼ xeʼnachʼok chixkʼatq. Li xHelen, aʼ li hermaan li yook chi puktesink rikʼin li kʼanjelobʼaal aʼan, seʼseʼ li ru naq kirilebʼ. Yaal naq ebʼ li ixq tik xeʼnumeʼk, abʼan sachso xchʼool xeʼkanaak naq xeʼril naq li xHelen kiseʼek rikʼinebʼ.

Chirix chik aʼan, naq yookebʼ chaq chi qʼajk saʼ rochochebʼ saʼ jun li bʼelebʼaal chʼiichʼ, xeʼril jun li eetalil li wank chiru jun li Chʼutlebʼaal Kabʼl li naxye jw.org. Xnaq saʼ xchʼoolebʼ naq aʼan peʼ li tzʼiibʼ li xeʼril naq xeʼnumeʼk chiru jun li kʼanjelobʼaal re puktesink. Xeʼkubʼeek saʼ li bʼelebʼaal chʼiichʼ ut xeʼril jarubʼ hoor nawank li xchʼutam li junjunq chi chʼuut saʼ li Chʼutlebʼaal Kabʼl aʼan.

Ebʼ li wiibʼ chi ixq xeʼwulak saʼ jun li chʼutam. Ut, ani xeʼril naq xeʼok saʼ li Chʼutlebʼaal Kabʼl? Aʼ li xHelen! Saʼ junpaat kijultikoʼk rehebʼ naq aʼan peʼ li ixq li kiseʼek rikʼinebʼ. Li xHelen naxye: «Naq xeʼnachʼok chaq wikʼin, xʼok bʼayaq inkʼaʼuxl. Xinkʼoxla naq maare wank kʼaru inkʼaʼ us xinbʼaanu». Abʼan ebʼ li ixq xeʼxchʼolobʼ chiru li xHelen li kikʼulmank.

Ebʼ li wiibʼ chi ixq aʼan kʼajoʼ naq kiwulak chiruhebʼ li chʼutam ut wank saʼ komonil rikʼinebʼ li hermaan: xeʼrekʼa naq chanchan tawiʼ naq wankebʼ rikʼinebʼ li xjunkabʼal. Naq xeʼxkʼe reetal naq ebʼ li hermaan xeʼok xsaabʼesinkil li Chʼutlebʼaal Kabʼl naq ak xraqeʼk li chʼutam, xeʼxyeechiʼi ribʼ chi tenqʼank. Yaal naq jun rehebʼ li ixq xkoho saʼ jalan chik tenamit, abʼan li jun chik nawulak saʼebʼ li chʼutam ut kiʼok xtzolbʼal li Santil Hu... ut chixjunil aʼin kikʼulmank yal saʼ xkʼabʼaʼ naq seʼseʼ ru naq kirilebʼ!