Kʼutumaq chiruhebʼ leekokʼal xraabʼal li Jehobʼa

1, 2. Kʼaʼut wank sut najalaak chanru naqil junjunq xraqal li Santil Hu?

XWULAK xkutankil li sumlajik ut li okebʼ re chi sumlaak tiqtokebʼ chiʼus ut nekeʼxkʼe xchʼool chi rabʼinkil li seeraqʼ. Ak nekeʼxnaw chiʼus li naʼlebʼ aʼin. Abʼan, chalen aran, wank xwankil li nekeʼrabʼi xbʼaan naq teʼoq xyuʼaminkil saʼ li xsumlajikebʼ.

² Joʼkan ajwiʼ nakʼulmank rikʼin xkʼiresinkilebʼ li kokʼal. Maare li sumsukebʼ ak xeʼrabʼi naabʼal li seeraqʼ chirix aʼin. Abʼan, najalaak chixjunil naq nekeʼwank xkokʼal. Wank chik xyaalal chiruhebʼ li nekeʼrabʼi. Jwal nim li kʼanjel tenebʼanbʼil saʼ xbʼeenebʼ! Naq najalaak li qawanjik, najalaak ajwiʼ chanru naqil li naʼlebʼ li naxkʼe li Santil Hu li naqanaw chiʼus. Joʼkan naq, joʼ aj kʼanjel chiru li Yos naqil xsaʼ li Santil Hu ut naqakʼoxla rix «rajlal kutan», joʼ tento raj teʼxbʼaanu ebʼ li awabʼej re Israel (Deut. 17:19).

3. Kʼaru tqil saʼ li tzolom aʼin?

³ Ex naʼbʼej yuwaʼbʼej, kʼebʼil eere jun xnimal ru maatan joʼ aj paabʼanel: xtenqʼankilebʼ leeralal eekʼajol chi xnawbʼal ru li Jehobʼa. Abʼan, moko kaʼaj tawiʼ teeye rehebʼ li naxye li Santil Hu chirix li Yos; tento bʼan teetenqʼahebʼ chi xraabʼal li Jehobʼa chi anchalebʼ xchʼool. Chanru texruuq xbʼaanunkil? Li tzolom aʼin tixtzʼil rix kaahibʼ li naʼlebʼ li tkʼanjelaq cheeru (2 Tim. 3:16). Tixkʼut ajwiʼ kʼaru rusilal keʼxtaw wiibʼ oxibʼ li naʼbʼej yuwaʼbʼej naq xeʼxyuʼami li naxye li Santil Hu.

KAAHIBʼ LI NAʼLEBʼ CHOʼQ REHEBʼ LI NAʼBʼEJ YUWAʼBʼEJ

4. Kʼaru li naʼlebʼ tixtenqʼahebʼ li naʼbʼej yuwaʼbʼej chi xkʼutbʼal chiruhebʼ li ralal xkʼajol xraabʼal li Jehobʼa? (Santiago 1:5).

⁴ Xbʼeen: sikʼomaq xtenqʼ li Jehobʼa. Re naq texruuq xtenqʼankilebʼ leekokʼal chi xraabʼal li Jehobʼa, tento naq teesikʼ leenaʼlebʼ. Joʼkan naq patzʼomaq re li Jehobʼa (taayaabʼasi Santiago 1:5). Kaʼajwiʼ li Jehobʼa naxnaw kʼehok naʼlebʼ. Wank naabʼal xyaalalil kʼaʼut naqaye aʼin. Jun rehebʼ, li Jehobʼa aʼan li yuwaʼbʼej li jwal naabʼal xnawom saʼ chixjunil li choxachʼochʼ (Sal. 36:10). Ut li jun chik, naq li chaabʼil naʼlebʼ li naxkʼe junelik nokooxtenqʼa (Is. 48:17).

5. a) Kʼaru li tenqʼ naxkʼe li xmolam li Jehobʼa rehebʼ li naʼbʼej yuwaʼbʼej? b) Kʼaru xaatzol saʼ li bʼideo chirixebʼ li hermaan Amorim?

⁵ Li Jehobʼa naroksi li Santil Hu ut li xmolam re xkʼebʼal naabʼal li naʼlebʼ re naq teetenqʼa leeralal eekʼajol chi xraabʼal (Mat. 24:45). Saʼ jw.org texruuq xtawbʼal li chaabʼil naʼlebʼ bʼarwiʼ naxye LI NAXKʼUT LI SANTIL HU > LI SUMLAAK UT LI JUNKABʼAL. Aran teetaw ajwiʼ ebʼ li bʼideo chirix li xeʼxkʼul wiibʼ oxibʼ li poyanam, joʼ ajwiʼ ebʼ li kʼutbʼesink li ttenqʼanq eere chi xyuʼaminkil li naxye li Jehobʼa re xkʼiresinkilebʼ leekokʼal (Prov. 2:4-6).b

6. Kʼaru naxye jun li yuwaʼbʼej chirix li tenqʼ li nekeʼxkʼul saʼ li xmolam li Jehobʼa?

⁶ Naabʼalebʼ li naʼbʼej yuwaʼbʼej nekeʼxbʼanyoxi li tenqʼ li naxkʼe li Jehobʼa saʼ xkʼabʼaʼ li xmolam. Laj Joseph, jun li yuwaʼbʼej naxye: «Chʼaʼaj xkʼiresinkilebʼ oxibʼ li qakokʼal saʼ li yaal. Rochbʼen li wixaqil naqatzʼaama re li Jehobʼa naq tooxtenqʼa. Ut wank sut naʼelk jun li naʼlebʼ malaj jun li bʼideo saʼ li hoonal li naʼajmank chiqu. Xsikʼbʼal xtenqʼ li Jehobʼa qʼaxal nokooxtenqʼa». Laj Joseph ut li rixaqil nekeʼxkʼe reetal naq ebʼ li naʼlebʼ ut ebʼ li bʼideo naxtenqʼahebʼ li xkokʼal re naq teʼwanq choʼq ramiiw li Jehobʼa.

7. Kʼaʼut naq chaabʼil teʼnaʼlebʼaq ebʼ li naʼbʼej yuwaʼbʼej? (Romanos 2:21).

⁷ Xkabʼ: chexkʼutuq rikʼin li nekeebʼaanu. Ebʼ li kokʼal nekeʼxkʼe reetal li nekeʼxbʼaanu li xnaʼ xyuwaʼ ut nekeʼxkʼam ajwiʼ re rikʼinebʼ. Relik chi yaal, ebʼ aʼan nekeʼpaltoʼk ajwiʼ (Rom. 3:23). Abʼan li naʼbʼej yuwaʼbʼej li wankebʼ xnaʼlebʼ nekeʼxyal xqʼe chi xkʼutbʼal chiruhebʼ li xkokʼal naq us nekeʼnaʼlebʼak (taayaabʼasi Romanos 2:21). Jun li yuwaʼbʼej kixye aʼin chirixebʼ li alal kʼajolbʼej: «Chanchanebʼ li espoonj; nekeʼxxok chixjunil». Naxye ajwiʼ: «Wi teʼril naq inkʼaʼ yooko xyuʼaminkil li naqakʼut chiruhebʼ, teʼxye ajwiʼ qe». Joʼkan bʼiʼ, wi naqaj naq ebʼ li qakokʼal teʼxra li Jehobʼa, tento naq tqakʼutbʼesi naq qʼaxal naqara.

8, 9. Kʼaru naqatzol rikʼin li naxye laj Andrew ut li xʼEmma?

⁸ Ebʼ li naʼbʼej yuwaʼbʼej naru nekeʼxbʼaanu naabʼal li naʼlebʼ re xkʼutbʼal chiruhebʼ li xkokʼal xraabʼal li Jehobʼa. Qilaq li kixye laj Andrew, li kubʼenaq xhaʼ ut wank 17 chihabʼ re: «Linnaʼ linyuwaʼ junelik xeʼxkʼut chiwu naq wank xwankil li tijok. Linyuwaʼ junelik natijok wikʼin naq ok we chi wark, usta ak xintijok chik. Linnaʼ ut linyuwaʼ junelik nekeʼxye qe: “Naru nekextijok aʼ yaal jarubʼ sut chiru li Jehobʼa”. Joʼkan naq jwal wank xwankil li tijok chiwu. Anaqwan sa nawekʼa wibʼ naq nintijok chiru li Jehobʼa ut nawil joʼ jun li Yuwaʼbʼej li jwal nikinxra». Ex naʼbʼej yuwaʼbʼej, misach saʼ leechʼool naq leerahom chirix li Jehobʼa naru tixtenqʼahebʼ leeralal eekʼajol.

⁹ Qilaq li naxye li xʼEmma. Naq xeʼkanabʼaak xbʼaan li xyuwaʼ, naabʼal li kʼas kikanaak saʼ xbʼeen li xnaʼ. Li xʼEmma naxjultika: «Inkʼaʼ natzʼaqlok li tumin chiru linnaʼ. Abʼan junelik naxye qe naq li Jehobʼa naxkʼe rehebʼ li nekeʼloqʼonink re li naʼajmank chiruhebʼ. Ut rikʼin li naxbʼaanu, ninkʼe reetal naq chʼolchʼo chiru aʼin. Linnaʼ xooxtzol rikʼin li xbʼaanuhom». Kʼaru naqatzol chirix aʼin? Usta ebʼ li naʼbʼej yuwaʼbʼej wankebʼ xchʼaʼajkilal, naru teʼxtzol li ralal xkʼajol rikʼin li nekeʼxbʼaanu (Gál. 6:9).

10. Joqʼe nekeʼruuk ebʼ laj Israel aatinak rikʼinebʼ li ralal xkʼajol? (Deuteronomio 6:6, 7).

¹⁰ Rox: aatinan rikʼinebʼ laawalal aakʼajol. Li Jehobʼa kixye rehebʼ laj Israel naq teʼaatinaq chirix aʼan, rikʼinebʼ li ralal xkʼajol wulaj wulaj (taayaabʼasi Deuteronomio 6:6, 7). Chiru li kutan, nekeʼruuk chi aatinak rikʼinebʼ li xkokʼal ut xkʼutbʼal chiruhebʼ xraabʼal li Jehobʼa. Ebʼ li chʼinaʼal naru nekeʼxnumsi naabʼal li hoonal re xtenqʼankil li xyuwaʼ chi awk malaj qʼolok. Ebʼ li ixqaʼal nekeʼruuk xtenqʼankil li xnaʼ chi xbʼaanunkil li kʼanjel saʼ li ochoch, joʼ bʼojok malaj kemok. Naq nekeʼxbʼaanu aʼin, nekeʼruuk chi aatinak chirix li naʼlebʼ li wank xwankil. Joʼ xkʼoxlankil rix li xchaabʼilal li Jehobʼa ut chanru kixtenqʼa ebʼ li xjunkabʼal.

11. Joqʼe naru nekeʼaatinak li naʼbʼej yuwaʼbʼej rikʼinebʼ li xkokʼal?

¹¹ Moko joʼkan ta nakʼulmank saʼebʼ li qakutan. Saʼ naabʼal chi tenamit ebʼ li naʼbʼej yuwaʼbʼej raachisa nekeʼwank rikʼinebʼ li ralal xkʼajol xbʼaan naq wankebʼ saʼ li xkʼanjel ut li kokʼal saʼ li tzolebʼaal. Joʼkan naq, tento naq teʼxsikʼ xhoonal re naq teʼwanq rikʼinebʼ li ralal xkʼajol ut teʼaatinaq rikʼinebʼ (Efes. 5:15, 16; Filip. 1:10). Teʼruuq xbʼaanunkil aʼin naq teʼxloqʼoni li Jehobʼa joʼ junkabʼal. Laj Alexander jun li saaj al, naxye: «Linyuwaʼ naxkʼubʼ chixjunil re loqʼonink joʼ junkabʼal ut inkʼaʼ naxkanabʼ naq maakʼaʼ tramoq chiqu wank saʼ komonil. Naq nokooraqeʼk chi tzolok, nokooʼok chi seeraqʼik».

12. Kʼaru tento tixjultika li najolomink re li junkabʼal naq nekeʼxloqʼoni li Yos?

¹² Kʼaru naru tixbʼaanu li najolomink re li junkabʼal re naq ebʼ li kokʼal teʼwulaq chiru li loqʼonink joʼ junkabʼal? Teʼruuq xtzolbʼal li akʼ tasal hu Sahaq laachʼool! Wi teetzol li tasal hu aʼin, maare aʼin ttenqʼanq eere re naq sa texʼaatinaq. Saʼ xkʼabʼaʼ naq nekeeraj naq teʼxseeraqʼi eere li nekeʼrekʼa ut li nekeʼok wiʼ xkʼaʼuxl leeralal eekʼajol, meeroksi li loqʼonink joʼ junkabʼal re chʼilank. Ut wi nekeʼxye junaq li naʼlebʼ li inkʼaʼ naxkʼulubʼa li Santil Hu, mexpoʼk. Teebʼanyoxi bʼan naq xeʼxye li kʼaru wank saʼ xchʼoolebʼ ut teeye rehebʼ naq inkʼaʼ teʼxkanabʼ xbʼaanunkil. Wi ebʼ leeralal eekʼajol nekeʼxye eere li nekeʼrekʼa, moko tchʼaʼajkoʼq ta cheeru xtenqʼankilebʼ.

13. Joqʼe chik teʼruuq xtenqʼankilebʼ li xkokʼal chi nachʼok chixkʼatq li Jehobʼa?

¹³ Ex naʼbʼej yuwaʼbʼej, sikʼomaq li hoonal re xtenqʼankilebʼ leeralal eekʼajol chi nachʼok chixkʼatq li Jehobʼa. Moko aajel ta ru naq texchunlaaq chi xtzolbʼal li Santil Hu re naq texʼaatinaq rikʼinebʼ chirix li Yos, li jwal nokooxra. Li xLisa, jun li naʼbʼej naxye: «Nokooʼaatinak chirix li yobʼtesihom re xtenqʼankilebʼ li qakokʼal chi xnawbʼal ru chiʼus li Jehobʼa. Naq ebʼ li tzʼiʼ nekeʼxkʼe chi seʼek ebʼ li qakokʼal, naqoksi aʼin re xkʼutbʼal chiruhebʼ naq li Jehobʼa aʼan jun li Yos li jwal sa saʼ xchʼool ut naraj naq sahaq ajwiʼ saʼ qachʼool ut twulaq chiqu chixjunil li naqil».

14. Kʼaʼut aajel ru naq teʼxtenqʼa ebʼ li xkokʼal chi xtawbʼalebʼ li chaabʼil amiiw? (Proverbios 13:20).

¹⁴ Xka: tenqʼahomaq leekokʼal re naq teʼxtaw ebʼ li chaabʼil amiiw. Chʼolchʼo naxye li Santil Hu naq ebʼ li amiiw naru nekeʼtenqʼank malaj inkʼaʼ (taayaabʼasi Proverbios 13:20). Ma nekeenaw ani wankebʼ choʼq ramiiw leekokʼal? Ma nekeenaw ruhebʼ ut nekexʼaatinak rikʼinebʼ? Kʼaru texruuq xbʼaanunkil re naq teʼwanq choʼq ramiiwebʼ li nekeʼxra li Jehobʼa? (1 Cor. 15:33). Naq texwanq rikʼin leejunkabʼal, naru teebʼoq li wankebʼ choʼq ramiiw li Jehobʼa (Sal. 119:63).

15. Kʼaru teʼruuq xbʼaanunkil re xtenqʼankilebʼ li xkokʼal chi xtawbʼal ebʼ li chaabʼil amiiw?

¹⁵ Qilaq jun li eetalil. Laj Tony, jun li yuwaʼbʼej, naxchʼolobʼ kʼaru kixbʼaanu rochbʼen li rixaqil re xtenqʼankilebʼ li xkokʼal chi xtawbʼal ebʼ li chaabʼil amiiw: «Chiru naabʼal chihabʼ xqabʼoqebʼ saʼ qochoch li hermaan li jalan jalanq xchihabʼebʼ. Nokoowaʼak ut nokooloqʼonink joʼ junkabʼal. Naqakʼe reetal naq aʼin jun chaabʼil hoonal re xnawbʼalebʼ ru li nekeʼxra li Jehobʼa ut nekeʼkʼanjelak chiru chi sa saʼ xchʼoolebʼ. Naqakʼulebʼ saʼ qochoch ebʼ li nekeʼulaʼanink chʼuut, li taqlanbʼilebʼ chi puktesink saʼ jalan chik tenamit ut jalanebʼ chik li hermaan. Chi joʼkan ebʼ li qakokʼal keʼxtzol naabʼal li chaabʼil naʼlebʼ chirix chanru xeʼxkʼe xchʼool chi kʼanjelak chiru li Jehobʼa. Chixjunil aʼin kixtenqʼahebʼ re naq teʼjiloq chixkʼatq li Jehobʼa». Tenqʼahomaq leekokʼal re naq teʼxtaw ebʼ li chaabʼil amiiw.

MICHʼINAAK EECHʼOOL!

16. Kʼaru chʼolchʼooq chiruhebʼ li naʼbʼej yuwaʼbʼej wi jun rehebʼ li ralal xkʼajol naxkanabʼ li Jehobʼa?

¹⁶ Kʼaru teebʼaanu wi jun rehebʼ leekokʼal inkʼaʼ chik naraj kʼanjelak chiru li Jehobʼa usta ak xeeyal eeqʼe chi xtenqʼankil? Meekʼoxla naq inkʼaʼ us xeebʼaanu leekʼanjel. Li Jehobʼa naxkanabʼ naq chiqajunilo, joʼ ajwiʼ ebʼ li kokʼal, tqasikʼ ma tookʼanjelaq chiru malaj inkʼaʼ. Wi jun rehebʼ leeralal eekʼajol naxkanabʼ li Jehobʼa, meekʼoxla naq inkʼaʼ chik tsutqʼiiq saʼ junaq kutan. Cheejultikaq li naxye li Santil Hu chirix li alalbʼej li kixsach chixjunil (Luc. 15:11-19, 22-24). Usta inkʼaʼ us kinaʼlebʼak, abʼan moqon kixjal xnaʼlebʼ. Abʼan, maare taaye: «Aʼin yal jun eetalil. Moko nakʼulmank ta aʼin». Li kixkʼul laj Elie naxkʼutbʼesi naq nakʼulmank aʼin.

17. Chanru nakatxtenqʼa li kixkʼul laj Elie?

¹⁷ Laj Elie naxye aʼin chirix li xnaʼ xyuwaʼ: «Keʼxyal xqʼe chi xkʼutbʼal chiwu xraabʼal li Jehobʼa ut li Raatin. Abʼan saʼ linsaajilal, inkʼaʼ chik us xinnaʼlebʼak». Laj Elie kiʼok xyuʼaminkil li yibʼru aj naʼlebʼ ut inkʼaʼ chik naxkʼulubʼa li naxbʼaanu li xnaʼ xyuwaʼ re xtenqʼankil saʼ li xpaabʼal. Kixkanabʼ li rochoch ut inkʼaʼ chik naxyuʼami li naxye li Jehobʼa. Usta joʼkan, wank sut naʼaatinak chirix li Santil Hu rikʼin jun li ramiiw. Laj Elie naxjultika: «Naq junelik ninʼaatinak chirix li Jehobʼa rikʼin li wamiiw, laaʼin ajwiʼ ninkʼoxla li Jehobʼa. Chi joʼkan li riyajil li yaal li wank saʼ linchʼool li xeʼraw linnaʼ linyuwaʼ, kiʼok wiʼ chik chi kʼiik». Saʼ xnumikebʼ li kutan, laj Elie kisutqʼiik wiʼ chik rikʼin li Jehobʼa.c Kʼajoʼ tana xeʼsahoʼk saʼ xchʼool li xnaʼ xyuwaʼ laj Elie naq xeʼxkʼut chiru chalen chaq saʼ xkachʼinal xraabʼal li Jehobʼa! (2 Tim. 3:14, 15).

18. Kʼaru nakaakʼoxla chirixebʼ li nekeʼxyal xqʼe chi xkʼutbʼal chiruhebʼ li ralal xkʼajol xraabʼal li Jehobʼa?

¹⁸ Ex naʼbʼej yuwaʼbʼej, li Jehobʼa ak kixkʼe eere li chaabʼil maatan: xkʼiresinkilebʼ li teʼkʼanjelaq chiru (Sal. 78:4-6). Naqanaw naq chʼaʼaj xbʼaanunkil aʼin, joʼkan naq naqaj xyeebʼal eere naq chaabʼil li kʼanjel li yookex xbʼaanunkil. Meekanabʼ xkʼutbʼal chiruhebʼ leekokʼal xraabʼal li Jehobʼa ut kʼutumaq chiruhebʼ xpaabʼankil (Efes. 6:4). Wi joʼkan teebʼaanu, chʼolchʼooq cheeru naq li Jehobʼa, li jwal nokooxra, sahaq saʼ xchʼool eerikʼin.