NAʼLEBʼ RE TZOLOK 34
Choobʼeeq saʼ li yaal
«Aʼan aʼin li xnimal xsahil linchʼool: naq laaʼin nawabʼi naq ebʼ li walal inkʼajol yookebʼ chi bʼeek saʼ li yaal» (3 JUAN 4).
BʼICH 111 Li xyaalal li xsahil qachʼool
RUʼUJIL LI TZOLOMa
1. Kʼaʼut us naq tooʼaatinaq chirix chanru xqanaw «li yaal»?
«CHANRU xaanaw li yaal?». Maare ak naabʼal sut xqasume li patzʼom aʼin. Nakʼulmank aʼin naq naqanawebʼ ru jalan chik li qechpaabʼanel. Qʼaxal nawulak chiqu rabʼinkil chanru ebʼ li qech aj paabʼanel xeʼxnaw ut xeʼxra li Jehobʼa. Joʼkan ajwiʼ nawulak chiqu aatinak chirix kʼaʼut wanko joʼ aj testiiw re li Jehobʼa (Rom. 1:11). Naq nokooʼaatinak chirix aʼin naxjultika chiqu naq wank jun li qanimla maatan wank choʼq aj testiiw re li Jehobʼa. Joʼkan ajwiʼ nokooxtenqʼa re naq tqayal qaqʼe «chi bʼeek saʼ li yaal», aʼin naraj xyeebʼal xyalbʼal qaqʼe wank joʼ chanru nawulak chiru li Jehobʼa re naq toorosobʼtesi (3 Juan 4).
2. Kʼaru tqil saʼ li tzolom aʼin?
2 Saʼ li tzolom aʼin tqil wiibʼ oxibʼ xyaalal kʼaʼut xooʼok joʼ aj testiiw re li Jehobʼa. Joʼkan ajwiʼ tqil chanru tqakʼutbʼesi naq oxloqʼ chiqu li maatan aʼin. Ut aʼin tixbʼaanu naq tqabʼanyoxi chiru li Jehobʼa naq xooxkʼam chaq saʼ li yaal (Juan 6:44). Aʼin tooxtenqʼa re naq tooʼaatinaq chirix li yaal rikʼinebʼ li junchʼol chi maakʼaʼ qaxiw.
KʼAʼUT NAQARA «LI YAAL»
3. Kʼaʼut qʼaxal naqara li Jehobʼa?
3 Wank naabʼal xyaalalil kʼaʼut nawulak chiqu li yaal. Li qʼaxal wank xwankil aʼan naq naqara li Jehobʼa, xbʼaan naq rikʼin chalenaq li yaal. Saʼ li Santil Hu, xqatzol naq aʼan li Nimajwal Yos li kiyiibʼank re li choxa ut li Ruuchichʼochʼ. Aʼan li qachoxahil Yuwaʼ, joʼkan naq, nokooxra ut naxkʼe xchʼool chiqix (1 Ped. 5:7). Naqanaw naq aʼan jun «Yos aj uxtaan ut tuulan, li nabʼayk chi josqʼoʼk ut makachʼin li xrahom ut li xtiikilal xchʼool!» (Éx. 34:6). Kʼajoʼ nawulak chiru li tiikilal (Is. 61:8). Narahoʼk saʼ xchʼool li Jehobʼa rilbʼal naq naqakʼul li rahilal ut chi anchal xchʼool naraj xsachbʼal chixjunil aʼin saʼ li kutan li ak xaqabʼanbʼil xbʼaan (Jer. 29:11). Kʼajoʼ naqaj rilbʼal li kutan aʼan! Joʼkan peʼ naq qʼaxal naqara li Jehobʼa.
Li yaal li wank saʼ li Santil Hu chanchan… jun li ankla
Joʼ jun li ankla naxbʼaanu naq moko t-ekʼanq ta saʼ xnaʼaj jun li jukubʼ li naxyeechiʼi li Santil Hu choʼq re li kutan chalkebʼ re nokooxtenqʼa re xkuybʼal li chʼaʼajkilal. Li yaal li wank saʼ li Santil Hu naxbʼaanu naq tooʼaatinaq chirix li qoybʼenihom. (Chaawil li raqal 4 toj 7).
4, 5. Kʼaʼut naq li apóstol Pablo kixye naq li qoybʼenihom chanchan jun li ankla?
4 Jun chik xyaalal kʼaʼut naq naqara li yaal aʼan naq jwal nokooxtenqʼa saʼ li qayuʼam. Qilaq jun li eetalil. Saʼ xyanq li xqatzol saʼ li Santil Hu wank li naxyeechiʼi li Yos choʼq re li kutan chalkebʼ re. Re xkʼutbʼesinkil naq wank xwankil aʼin li apóstol Pablo kixye: «Li qoybʼenihom, aʼan kamaʼ jun li ankla choʼq re li qaanm, kaw ribʼ ut inkʼaʼ naʼekʼank saʼ xnaʼaj» (Heb. 6:19). Joʼ chanru jun li ankla naxbʼaanu naq moko t-ekʼanq ta saʼ xnaʼaj jun li jukubʼ, li naxyeechiʼi li Santil Hu choʼq re li kutan chalkebʼ re nokooxtenqʼa re xkuybʼal li chʼaʼajkilal.
5 Naq li apóstol Pablo kixye li aatin aʼin, yook chi aatinak chirix ebʼ li yulbʼilebʼ ru rikʼin santil musiqʼej li teʼxik saʼ choxa. Abʼan aʼin natzʼaqlok ru ajwiʼ rikʼinebʼ li teʼwanq chi junelik arin saʼ li Ruuchichʼochʼ (Juan 3:16). Chʼolchʼo naq, li xyeechiʼom li Jehobʼa naxkʼe xyaalal li qayuʼam.
6, 7. Kʼaru rusilal kixtaw xYvonne naq kixnaw li yaal chirix li kutan chalk re?
6 Qilaq li kixkʼul li xYvonne jun li qech aj paabʼanel. Aʼan moko xkʼiik ta saʼ li yaal ut chalen saʼ li xkachʼinal naxxuwa chaq li kamk. Jultik we naq kiwil jun li aatin saʼ jun li hu li kixtochʼ inchʼool: «Saʼ jun kutan chixjunil t-osoʼq». Aʼan naxye: «Ebʼ li aatin aʼin inkʼaʼ xinxkanabʼ chi wark chiru li qʼoqyink xbʼaan naq naxik inchʼool chirix li kutan chalk re. Ninye: “Moko naru ta kaʼajwiʼ aʼinaq li yuʼam. Kʼaru aj e naq wankin arin? Moko nawaj ta kamk!”».
7 Naq ak saaj chik, li xYvonne kixnawebʼ ru ebʼ laj testiiw re li Jehobʼa. Aʼan naxye: «Xinʼok xpaabʼankil naq naru tinwanq saʼ jun li chʼinaʼusil naʼajej arin saʼ Ruuchichʼochʼ». Xnawbʼal li yaal kitenqʼank re, naxye: «Inkʼaʼ chik ninyoʼlek chi xkʼoxlankil rix li tkʼulmanq saʼ li kutan chalk re ut li kamk». Qʼaxal oxloqʼ chiru li xYvonne li yaal, ut aʼan nawulak chiru aatinak chirix aʼin rikʼinebʼ li kristiʼaan (1 Tim. 4:16).
Li yaal li wank saʼ li Santil Hu chanchan… jun li tertokil pek
Kʼanjelak chiru li Jehobʼa anaqwan ut xnawbʼal naq tookʼanjelaq chi junelik rubʼel li Xʼawabʼejilal chanchan jun li tertokil pek. Maakʼaʼ naxye li xqakanabʼ chi ixbʼej. (Chaawil li raqal 8 toj 11).
8, 9. a) Chanru kixkʼutbʼesi li winq li kiʼaatinak wiʼ li Jesús naq qʼaxal oxloqʼ chiru li tertokil pek li kixtaw? b) Kʼaru nakaawekʼa chirix li yaal?
8 Li chaabʼil esilal chirix li Xʼawabʼejilal li Yos wank saʼ xyanq li yaal li wank saʼ li Santil Hu. Li Jesús kixjuntaqʼeeta aʼin rikʼin jun li tertokil pek li muqmu. Naxye: «Li xnimajwal wankilal li choxa chanchan jun nimla bʼihomal muqmu saʼ chʼochʼ li kitaweʼk xbʼaan jun li winq. Aʼan kixmuq wiʼ chik ut, xbʼaan xsahil li xchʼool, koho, koxkʼayi chaq chixjunil li kʼaru wank re ut kixloqʼ li chʼochʼ aʼan» (Mat. 13:44). Li winq aʼin moko yook ta xsikʼbʼal li tertokil pek. Abʼanan, naq kixtaw, kixkʼayi chixjunil li kʼaru wank re. Kʼaʼut kixbʼaanu aʼin? Xbʼaan naq qʼaxal terto xtzʼaq chiru chixjunil li kʼaru wank re.
9 Ma Joʼkan ajwiʼ nakaawekʼa chirix li yaal? Chʼolchʼo naq joʼkan! Maakʼaru li naxyeechiʼi qe li ruuchichʼochʼ aʼin naru naqajuntaqʼeeta rikʼin li sahil chʼoolejil naxkʼam chaq kʼanjelak chiru li Jehobʼa ut roybʼeninkil naq toowanq chi junelik rubʼel li Xʼawabʼejilal li Yos. Jwal oxloqʼ li qamiiwil rikʼin li Jehobʼa chiru chixjunil li naqakanabʼ chi ixbʼej. Wank choʼq ramiiw li Jehobʼa aʼan jun nimla maatan. Ut maakʼaʼ naxsahobʼresi qachʼool joʼ xsahobʼresinkil xchʼool li Jehobʼa (Col. 1:10).
10, 11. Kʼaru kitenqʼank re laj Michael chi xjalbʼal li xyuʼam?
10 Naabʼalebʼ laj paabʼanel xeʼxkanabʼ naabʼal li kʼaʼaq re ru chi ixbʼej re xsahobʼresinkil xchʼool li Jehobʼa. Wankebʼ xeʼxkanabʼ li kʼanjel. Junchʼol chik inkʼaʼ nekeʼxsikʼ li bʼihomal. Ut wankebʼ ajwiʼ nekeʼxjal li xyuʼam naq nekeʼxnaw ru li Jehobʼa. Aʼin kixbʼaanu laj Michael, li moko kikʼiik ta saʼ li yaal. Naq toj saaj chaq, kixtzol li karate. Naxye: «Ninnimobʼresi wibʼ xbʼaan naq kaw wibʼ. [...] Nawekʼa naq maaʼani naru naqʼaxok wu». Abʼan xʼok xtzolbʼal li Santil Hu ut xtzol naq moko nawulak ta chiru li Jehobʼa li raaxiikʼ (Sal. 11:5). Abʼan naq naʼaatinak chirix li sumal li xtzolok re, naxye: «Majunwa xeʼxye we naq tinkanabʼ li karate. Junelik bʼan nekeʼxkʼut li yaal li wank saʼ li Santil Hu».
11 Naq laj Michael naxkʼe xchʼool xnawbʼal ru li Jehobʼa, mas wiʼ chik naxra. Jun li naʼlebʼ li kitochʼok re li xchʼool aʼan xnawbʼal naq li Yos naxtoqʼobʼa ruhebʼ laj kʼanjel chiru. Laj Michael kixkʼe reetal naq tento tixjal li xyuʼam chi junajwa. Naxye: «Ninnaw naq tchʼaʼajkoʼq chiwu xkanabʼankil li karate. Abʼan wi ninbʼaanu, tinsahobʼresi li xchʼool li Jehobʼa ut chʼolchʼo chiwu naq oxloqʼ kʼanjelak chiru». Oxloqʼ chiru laj Michael naq kixtaw li yaal ut aʼin kitenqʼank re chi xjalbʼal li xyuʼam (Sant. 1:25).
Li yaal li wank saʼ li Santil Hu chanchan… li xaml li nalemtzʼunk
Li xaml li nalemtzʼunk nokooxtenqʼa rilbʼal qabʼe saʼ li qʼoqyink. Joʼkan ajwiʼ nakʼulmank rikʼin li Santil Hu, naxkʼut qabʼe usta wanko saʼ li ruuchichʼochʼ li naxjolomi laj Tza. (Chaawil li raqal 12 ut 13).
12, 13. Chanru kitenqʼaak li xMayli xbʼaan li Santil Hu?
12 Re xkʼutbʼesinkil li xwankil li yaal, li Santil Hu naxjuntaqʼeeta rikʼin li xaml li nalemtzʼunk saʼ li qʼoqyink (Sal. 119:105; Efes. 5:8). Li xMayli, li wank Azerbaiyán, qʼaxal naxbʼanyoxi naq li Santil Hu kikʼutuk xbʼe. Xbʼaan naq li xyuwaʼ aj musulmán ut li xnaʼ aj judiiy. Li xMayli naxye: «Chʼolchʼo chaq chiwu naq wank li Yos, abʼan wank junjunq li naʼlebʼ li inkʼaʼ nintaw ru. Ninkʼoxla: “Kʼaʼut naq xooxyobʼtesi li Yos? Kʼaru xyaalal naq junaq tixkʼul li rahilal ut moqon chik trahobʼtesiiq saʼ xbʼalbʼa?”. Wankebʼ nekeʼxye naq li Yos nakʼamok chaq re li rahilal, ut aʼin naxbʼaanu naq tinkʼoxla: “Ma yal bʼatzʼulo saʼ ruqʼ li Yos? Ma nawulak chiru naq nokoorahobʼtesiik?”».
13 Li xMayli xʼok xsikʼbʼal xsumenkil li xpatzʼom. Moqon, kiʼok xtzolbʼal li Santil Hu ut kiʼok joʼ aj testiiw re li Jehobʼa. Aʼan naxye: «Saʼ xkʼabʼaʼ li naxye li Santil Hu, anaqwan ninnaw li yaal ut wank tuqtuukilal saʼ linyuʼam ut qʼaxal sa chik linchʼool». Joʼ li xMayli, naqaloqʼoni ru li Jehobʼa «li kibʼoqoq chaq [...] [qe] chi xkanabʼankil li akʼabʼ re ok saʼ li xchaqʼalil ru saqenk» (1 Ped. 2:9).
14. Kʼaru tooruuq xbʼaanunkil re xraabʼal li yaal? (Chaawil ajwiʼ li kaaxukuut «Jalan chik ebʼ li eetalil»).
14 Ebʼ li eetalil li ak xqil saʼebʼ li raqal naxkʼutbʼesi chiqu naq qʼaxal wank xwankil li yaal. Nachalk tana saʼ qachʼool naabʼal chik ebʼ li eetalil. Kʼaʼut inkʼaʼ naqasikʼ jalan chik li xyaalal re xraabʼal li yaal? Naq qʼaxal naqara li yaal, naqakʼutbʼesi rikʼin li qabʼaanuhom.
CHANRU NAQAKʼUTBʼESI NAQ NAQARA LI YAAL
15. Kʼaru jun chik li naʼlebʼ tqabʼaanu re xkʼutbʼesinkil naq naqara li yaal?
15 Jun chik li naʼlebʼ li tqabʼaanu re xkʼutbʼesinkil naq naqara li yaal aʼan xtzolbʼal rajlal li Santil Hu ut ebʼ li qatasal hu. Maakʼaʼ naxye, jarubʼ chihabʼ qokik saʼ li yaal, junelik naqaj xkomon li qanaʼlebʼ. Li xbʼeen Laj Kʼaakʼalehom li kiʼelk saʼ inglés kixye: «Li yaal, chanchan jun li chʼina uutzʼuʼuj saʼ li chaqichʼochʼ, numtajenaq li tikʼtiʼ saʼ ruuchichʼochʼ ut qʼaxal nachʼaʼajkoʼk rilbʼal bʼar wank li yaal. Ut wi nakaawaj xtawbʼal, tento naq twutzubʼ aawibʼ re xsikʼbʼal. Ma kʼojobʼ aachʼool rikʼin jun ajwiʼ ruutzʼuʼujil li yaal. [...] Tento naq taayal aaqʼe chi xsikʼbʼal xkomon chik». Wi naqabʼaanu relik chi yaal naq us tooʼelq.
16. Kʼaru li naʼlebʼ nakaawoksi re xtzolbʼal li Santil Hu? (Proverbios 2:4-6).
16 Moko chiqajunilo ta nawulak chiqu rilbʼal ut xtzʼilbʼal rix li Santil Hu. Abʼanan, li Jehobʼa naxye qe naq tento tqasikʼ xkomon li qanaʼlebʼ re naq tqataw ru chiʼus li yaal (taayaabʼasi Proverbios 2:4-6). Wi naqayal qaqʼe chi xbʼaanunkil, us tooʼelq. Laj Corey naxye, naq naxtzol li Santil Hu, naxkʼe xchʼool chirix jun ajwiʼ li xraqal li Santil Hu. Naxye: «Naq nawil li raqal li naxkʼe xkomon li naʼlebʼ ut xtzʼaqobʼ ebʼ li naʼlebʼ saʼ xraqik li perel, ninʼok ajwiʼ xtzʼilbʼal rix. [...] Ut chi joʼkan us ninʼelk». Maakʼaʼ naxye wi naqabʼaanu chi joʼkaʼin malaj inkʼaʼ, wi naqakʼe qahoonal ut naqayal qaqʼe re rilbʼal li Santil Hu, chi joʼkan tqakʼutbʼesi naq naqoxloqʼi li yaal (Sal. 1:1-3).
17. Kʼaru naraj xyeebʼal xyuʼaminkil li yaal? (Santiago 1:25).
17 Li xyaalal aʼan naq, moko kaʼaj tawiʼ tqanaw li yaal. Re xtawbʼal rusilal, aajel ru naq tqayuʼami, kaʼajwiʼ chi joʼkan sahaq saʼ qachʼool (taayaabʼasi Santiago 1:25). Ut chanru tqakʼutbʼesi naq yooko xyuʼaminkil li yaal? Jun li hermaan naxye tento naq tqatzʼil qix kʼaru li us yooko xbʼaanunkil ut kʼaru chik tqabʼaanu. Li apóstol Pablo kixchʼolobʼ chi joʼkaʼin: «Toj bʼarwiʼ xoowulak, xikaqo chi tiik chi uubʼej» (Filip. 3:16).
18. Kʼaʼut naqayal qaqʼe «chi bʼeek saʼ li yaal»?
18 Qakʼoxlaq chixjunil li chaabʼil naʼlebʼ li naqataw naq naqayal qaqʼe «chi bʼeek saʼ li yaal». Ut moko kaʼaj tawiʼ naʼusaak li qayuʼam, naqasahobʼresi xchʼool li Jehobʼa ut ebʼ li hermaan (Prov. 27:11; 3 Juan 4). Maakʼaʼ chik junaq xyaalal kʼaʼut naqara ut naqayuʼami li yaal!
BʼICH 142 Qachapaq qibʼ rikʼin li qoybʼenihom
a Naq nokooʼaatinak chirix li qapaabʼal ut li qayuʼam, naqoksi li aatin «li yaal». Maakʼaʼ naxye jarubʼ chihabʼ qokik saʼ li yaal xkʼoxlankil rix aʼin tooxtenqʼa re xjultikankil kʼaʼut naqara, joʼkan ajwiʼ tooxtenqʼa re naq t-alaaq saʼ qachʼool xsahobʼresinkil xchʼool li Jehobʼa.