Kawaq laawoybʼenihom

1. Kʼaru li qoybʼenihom kixkʼe li Jehobʼa?

LI JEHOBʼA kixkʼe qe li chʼinaʼusil oybʼenihom chirix li junelik yuʼam. Wiibʼ oxibʼ laj kʼanjel chiru nekeʼroybʼeni wank saʼ choxa chi junelik (1 Cor. 15:50, 53). Abʼanan li xkʼihalebʼ nekeʼroybʼeni wank chi junelik arin saʼ li Ruuchichʼochʼ bʼarwiʼ teʼxyal xsahil li wank ut inkʼaʼ chik teʼyajerq (Apoc. 21:3, 4). Chiqajunilo naqoxloqʼi chi anchal qachʼool li chʼinaʼusil oybʼenihom aʼin, maakʼaʼ naxye bʼar toowanq chi junelik, ma saʼ choxa malaj saʼ Ruuchichʼochʼ.

2. Kʼaru nakawubʼresink re li qoybʼenihom ut kʼaʼut?

² Naq li Santil Hu naʼaatinak chirix li oybʼenihom, naru nachalk saʼ qachʼool naq tkʼulmanq ebʼ li chaabʼil naʼlebʼ. Chʼolchʼo chiqu naq tixbʼaanu, xbʼaan naq nachalk rikʼin li Jehobʼa (Rom. 15:13). Naqanaw li naxyeechiʼi qe ut li naxye junelik natzʼaqlok ru (Núm. 23:19). Chʼolchʼo chiqu naq li Jehobʼa naraj ut naru xbʼaanunkil li naxkʼoxla. Joʼkan naq li qoybʼenihom moko yal kʼoxlanbʼil ta naqanaw naq tkʼulmanq.

3. Kʼaru tqil saʼ li tzolom aʼin? (Salmo 27:14).

³ Li qachoxahil Yuwaʼ qʼaxal nokooxra ut naraj naq kʼojkʼooq qachʼool rikʼin (taayaabʼasi Salmo 27:14). Wi li qoybʼenihom chirix li Jehobʼa qʼaxal kaw naru nokooxtenqʼa xnumsinkil ebʼ li chʼaʼajkilal ut aʼin naxkʼe li qakawilal ut xsahil qachʼool. Saʼ li tzolom aʼin tqil chanru nokooxkol li qoybʼenihom. Xbʼeenwa tqil kʼaʼut nayemank naq li qoybʼenihom chanchan jun li ankla ut jun li punit chʼiichʼ. Moqon tqil chanru tooruuq xkawresinkil li qoybʼenihom.

LI QOYBʼENIHOM CHANCHAN JUN LI ANKLA

4. Kʼaʼut naq li qoybʼenihom chanchan jun li ankla? (Hebreos 6:19).

⁴ Saʼ li xʼesilhu li kixtzʼiibʼa rehebʼ laj Hebreo, li apóstol Pablo kixjuntaqʼeeta li qoybʼenihom rikʼin jun li ankla (taayaabʼasi Hebreos 6:19). Rajlal nabʼihajik chiru li palaw, ut naxnaw naq li ankla naxbʼaanu naq li jukubʼ inkʼaʼ t-ekʼanq saʼ xnaʼaj. Jun sut, naq yook chi bʼihajik saʼ li jukubʼ, kichalk jun li kaqsut-iqʼ. Ut saʼ li hoonal aʼan, ebʼ laj chʼeʼol jukubʼ keʼxkut li ankla saʼ li haʼ re naq inkʼaʼ tixpikʼa ribʼ chiruhebʼ li pek (Hech. 27:29, 39-41). Li qoybʼenihom chanchan ajwiʼ li ankla, nokooxkol re naq inkʼaʼ tqanajtobʼresi qibʼ rikʼin li Jehobʼa naq naqanumsi ebʼ li chʼaʼajkilal li chanchanebʼ li kaqsut-iqʼ. Li qoybʼenihom naxbʼaanu naq inkʼaʼ yooq qaxiw naq tqakʼul ebʼ li chʼaʼajkilal xbʼaan naq naqanaw naq saʼ jun kutan tchaabʼilobʼresiiq ru. Jultikaq qe naq li Jesús kixye naq tooʼeʼxrahobʼtesi (Juan 15:20). Joʼkan bʼiʼ, xkʼoxlankil rix li qoybʼenihom li naxkʼe li Jehobʼa nokooxtenqʼa re naq inkʼaʼ tchʼinaaq qachʼool saʼ li xkʼanjel li Yos.

5. Chanru kitenqʼaak li Jesús xbʼaan li oybʼenihom naq kikamk?

⁵ Qilaq chanru li oybʼenihom kixtenqʼa li Jesús re naq inkʼaʼ tixtzʼeqtaana li Yos usta naxnaw naq chi seebʼ jwal ra tixkʼul naq tkamsiiq. Saʼ Pentecostés re li chihabʼ 33, li apóstol Pedro kixyaabʼasi jun li propesiiy li natawmank saʼ jun rehebʼ li Salmo, chʼinaʼus li naxye chanru li Jesús kiroybʼeni chi anchal xchʼool: «Linchʼochʼel sululel taahilanq rikʼin xnimal oybʼenink, xbʼaan naq inkʼaʼ tinaakanabʼ saʼ xnaʼajebʼ li kamenaq chi moko taakʼe chi qʼaak laj santil kʼanjel chawu. […] Tinaanujobʼresi chi sahil chʼoolejil chawe chawu» (Hech. 2:25-28; Sal. 16:8-11). Usta li Jesús naxnaw naq tkamsiiq, abʼanan kaw chaq li roybʼenihom rikʼin li Yos naq twaklesiiq chi yoʼyo ut naq sahaq saʼ xchʼool xbʼaan naq txik wiʼ chik saʼ choxa rikʼin li Xyuwaʼ (Heb. 12:2, 3).

6. Kʼaru kixye jun li hermaan chirix li oybʼenihom?

⁶ Naabʼalebʼ li hermaan xeʼxkuy li rahilal, xbʼaan naq wank li roybʼenihomebʼ. Qilaq li kixkʼul laj Leonard Chinn li tiik xchʼool chiru li Jehobʼa, li kiwank Inglaterra. Naq kiwank li xbʼeen li nimla yalok u, xeʼxkʼe saʼ tzʼalam xbʼaan naq inkʼaʼ kiraj ok joʼ aj puubʼ. Xeʼxkʼe xjunes chiru wiibʼ po ut moqon xeʼxmin ru chi kʼanjelak. Moqon, kixye: «Aʼin kixkʼut chiwu naq aajel ru naq wanq qoybʼenihom re xkuybʼal li rahilal. Li reetalil li Jesús, ebʼ li apóstol ut ebʼ li propeet, joʼ ajwiʼ li yeechiʼom li wank saʼ li Santil Hu naxkʼe qoybʼenihom choʼq re li kutan chalkebʼ re, ut re xkuybʼal yalaq kʼaru chi rahilal». Choʼq re laj Leonard, li oybʼenihom chanchan jun li ankla ut joʼkan ajwiʼ choʼq qe.

7. Chanru nakawuuk li qoybʼenihom naq naqanumsi ebʼ li chʼaʼajkilal? (Romanos 5:3-5; Santiago 1:12).

⁷ Naq naqakuy xnumsinkil ebʼ li chʼaʼajkilal ut naqil chanru li Jehobʼa nokooxtenqʼa ut naqataw rusilal, aʼin naxkawresi li qoybʼenihom (taayaabʼasi Romanos 5:3-5; Santiago 1:12). Joʼkan naq anaqwan qʼaxal kikawuuk li qoybʼenihom chiru naq xooʼok xnawbʼal ru li yaal. Laj Tza naraj naq tchʼinaaq qachʼool, abʼanan naq li Jehobʼa nokooxtenqʼa rajlal nokooruuk xqʼaxbʼalebʼ ru li junjunq chi chʼaʼajkilal.

LI QOYBʼENIHOM CHANCHAN JUN LI PUNIT CHʼIICHʼ

8. Kʼaʼut naqaye naq li oybʼenihom chanchan punit chʼiichʼ? (1 Tesalonicenses 5:8).

⁸ Li Santil Hu naxye naq li qoybʼenihom chanchan jun li punit chʼiichʼ (taayaabʼasi 1 Tesalonicenses 5:8). Jun li soldaad naxkʼam jun li xpunit chʼiichʼ re xkolbʼal li xjolom chiruhebʼ li xikʼ nekeʼilok re. Naq nayaleʼk rix li qapaabʼal, tento naq tqakol rix li qakʼaʼuxl chiru laj Tza. Xbʼaan naq aʼan naxkʼe li naʼlebʼ li naru nokooxtʼan saʼ li qapaabʼal ut naxpoʼ ru li qakʼaʼuxl re naq inkʼaʼ chik us tookʼoxlaq. Joʼ li punit chʼiichʼ naxkol laj puubʼ, li qoybʼenihom naxkol rix li qakʼaʼuxl re naq tiikaq li qachʼool chiru li Jehobʼa.

9. Kʼaru nakʼulmank naq ebʼ li kristiʼaan maakʼaʼ nekeʼroybʼeni?

⁹ Li qoybʼenihom chirix li junelik yuʼam tooxtenqʼa re naq us toonaʼlebʼaq. Wi junes chirix li naqaj naxik li qakʼaʼuxl, aʼin tooxkʼe saʼ rahilal. Qakʼoxlaq li xeʼxkʼul wiibʼ oxibʼ laj paabʼanel li wankebʼ chaq saʼ li najtil tenamit re Corinto. Inkʼaʼ chik nekeʼxpaabʼ li xyeechiʼom li Yos li qʼaxal wank xwankil, chirix li wakliik chi yoʼyo (1 Cor. 15:12). Laj Pablo kixye naq ebʼ li inkʼaʼ nekeʼxpaabʼ li kʼutum aʼin, kaʼajwiʼ li us nekeʼxsikʼ choʼq rehebʼ (1 Cor. 15:32). Joʼkan ajwiʼ nakʼulmank sahebʼ li qakutan, naabʼalebʼ li qas qiitzʼin inkʼaʼ chik nekeʼxpaabʼ li naxye li Yos joʼkan naq kaʼajwiʼ nekeʼxkʼoxla li naru teʼxbʼaanu anaqwan ut xyalbʼal xsahil li wank saʼ li ruuchichʼochʼ. Kʼojkʼo qachʼool chirix li naxyeechiʼi qe li Yos. Joʼkan naq li qoybʼenihom chanchan li punit chʼiichʼ naxkol li qakʼaʼuxl ut nokooxtenqʼa re naq inkʼaʼ tqabʼaanu li nawulak chiqu li naru nokooxkʼe saʼ chʼaʼajkilal rikʼin li Jehobʼa (1 Cor. 15:33, 34).

10. Chanru nokooxtenqʼa li qoybʼenihom chi risinkil li yibʼru aj kʼaʼuxl?

¹⁰ Li qoybʼenihom chanchan li punit chʼiichʼ li naxkol li qakʼaʼuxl re naq inkʼaʼ tqakʼoxla naq maakʼaʼ xyaalal naq tqasahobʼresi xchʼool li Jehobʼa. Maare, junaq tixkʼoxla: «Laaʼin maajunwa tintaw li junelik yuʼam. Moko chaabʼilin ta. Maajunwa tinruuq xbʼaanunkil chi tzʼaqal re ru li naxpatzʼ li Yos rehebʼ laj kʼanjel chiru». Qajultikaq naq laj Elifaz, li naxkʼe ribʼ choʼq ramiiw laj Job, kixye: «Chiru li Yos maajun poyanam saq ru li xchʼool». Ut moqon kixye: «Inkʼaʼ ajwiʼ kʼojkʼo xchʼool li Yos chirixebʼ li xʼánjel; chi moko li choxa chʼajobʼresinbʼil chiru Aʼan» (Job 15:14, 15). Qʼaxal yibʼru li tikʼtiʼ aʼin! Qajultikaq naq laj Tza naraj naq tookʼoxlaq chi joʼkaʼin. Laj Tza naraj naq naabʼal sut tqakʼoxla rix aʼin ut chi joʼkan, inkʼaʼ chik kawaq li qoybʼenihom. Joʼkan bʼiʼ qayalaq qaqʼe chi xtzʼeqtaanankil li tikʼtiʼ aʼin ut qakʼehaq qachʼool chirix li naxyeechiʼi qe li Jehobʼa. Relik chi yaal naq aʼan naraj naq ebʼ laj kʼanjel chiru teʼwanq chi junelik ut naq tooxtenqʼa chi xtawbʼal li qoybʼenihom (1 Tim. 2:3, 4).

KʼAʼUT NAQ KAWAQ LI QOYBʼENIHOM

11. Kʼaʼut naq wanq qakuyum naq yooqo roybʼeninkil li kutan naq li Jehobʼa tixbʼaanu li naxyeechiʼi qe?

¹¹ Maare nachʼaʼajkoʼk chiqu naq junelik kawaq li qoybʼenihom. Maare wank sut tchʼinaaq li qachʼool roybʼeninkil naq li Yos tixbʼaanu li naxyeechiʼi. Abʼanan li Jehobʼa wank chi junelik ut inkʼaʼ naril li hoonal joʼ naqil laaʼo (2 Ped. 3:8, 9). Ut aʼan tixbʼaanu chiʼus li kʼaru kixye, maare moko tixbʼaanu saʼ li hoonal li naqoybʼeni. Kʼaru tooxtenqʼa re naq kawaq li qoybʼenihom ut wanq qakuyum chi roybʼeninkil naq li Jehobʼa toj maajiʼ naxbʼaanu li naxyeechiʼi? (Sant. 5:7, 8).

12. Joʼ naxye Hebreos 11:1, 6, chanru naxchap ribʼ li oybʼenihom rikʼin li paabʼal?

¹² Li qoybʼenihom tkawuuq wi nachʼ wanko chixkʼatq li Jehobʼa xbʼaan naq aʼan nayehok re naq tixbʼaanu li naxyeechiʼi. Joʼkan bʼiʼ, li Santil Hu naxjuntaqʼeeta li oybʼenihom rikʼin xpaabʼankil naq wank li Jehobʼa ut naq «naxqʼajkamuhebʼ li nekeʼsikʼok re» (taayaabʼasi Hebreos 11:1, 6). Wi naqapaabʼ naq wank li Jehobʼa, tqapaabʼ ajwiʼ naq tixbʼaanu li xyeechiʼom. Qilaq kʼaru tooruuq xbʼaanunkil re naq tkawuuq li qamiiwil rikʼin ut naq junelik kawaq li qoybʼenihom.

13. Chanru toowanq choʼq ramiiw li Jehobʼa?

¹³ Chootijoq chiru li Jehobʼa ut qilaq li Raatin. Yaal naq inkʼaʼ nokooruuk rilbʼal ru li Jehobʼa, abʼanan nokooruuk chi wank joʼ ramiiw. Nokooʼaatinak rikʼin naq nokootijok chiru, ut kʼojkʼo qachʼool naq aʼan nokoorabʼi (Jer. 29:11, 12). Ut nokooruuk ajwiʼ rabʼinkil naq naqil ut naqakʼoxla rix li naxye li Santil Hu. Nakawuuk li qoybʼenihom chirix li Jehobʼa naq naqil chanru kixtenqʼahebʼ chaq ebʼ laj kʼanjel chiru. Chixjunil li wank saʼ li Santil Hu aʼan «re qatzolbʼal naq kitzʼiibʼaak chaq, re naq rikʼin li xkawubʼ qachʼool ut li xkʼojobʼankil li qaanm naxkʼe li Santil Hu chiwanq xnimal qoybʼenihom» (Rom. 15:4).

14. Kʼaʼut naq us tqakʼoxla rix li kixbʼaanu li Jehobʼa choʼq rehebʼ li junchʼol?

¹⁴ Xkʼoxlankil rix naq li Jehobʼa junelik naxbʼaanu li naxyeechiʼi. Qakʼoxlaq rix li kixbʼaanu chirix laj Abrahán ut xSara. Saʼ xkʼabʼaʼ naq ak cheekebʼ chik, inkʼaʼ naru nekeʼwank li ralal xkʼajol, abʼanan li Yos kixye rehebʼ naq twanq jun li ralal (Gén. 18:10). Chanru kirekʼa ribʼ laj Abrahán? Li Santil Hu naxye: «Kixpaabʼ li Yos […] kikanaak choʼq “xyuwaʼebʼ li kʼiila tenamit”» (Rom. 4:18). Choʼq rehebʼ li kristiʼaan inkʼaʼ chik naru, abʼanan chiru laj Abrahán chʼolchʼo naq li Jehobʼa tixbʼaanu li naxyeechiʼi. Laj Abrahán moko kichʼinaak ta xchʼool, aʼan ut li rixaqil keʼwank jun li ralalebʼ (Rom. 4:19-21). Li naʼlebʼ aʼin naxkʼut chiqu naq naru naqakʼojobʼ qachʼool rikʼin li naxye li Jehobʼa, usta chʼaʼaj li yooko xnumsinkil.

15. Kʼaʼut naq tento tqakʼoxla rix li ak kixbʼaanu li Jehobʼa chiqix?

¹⁵ Qakʼoxlaq rix kʼaru ak kixbʼaanu li Jehobʼa choʼq qe. Ma ak xaakʼoxla chanru li Jehobʼa kixbʼaanu saʼ laayuʼam wiibʼ oxibʼ li xyeechiʼom li natawmank saʼ li Santil Hu? Li Jesús kixye naq li Xyuwaʼ tixkʼe qe li naʼajmank chiqu (Mat. 6:32, 33). Joʼkan ajwiʼ naq tixkʼe qe li santil musiqʼej wi naqatzʼaama re (Luc. 11:13). Li Jehobʼa ak kixbʼaanu li xyeechiʼom aʼin. Maare ajwiʼ nachalk saʼ qachʼool xkomon li xyeechiʼom li ak xqakʼul, naq naxkuy qamaak, naxkʼojobʼ qachʼool, naxkawresi li qapaabʼal (Mat. 6:14; 24:45; 2 Cor. 1:3). Ut wi naqanaʼlebʼa rix li ak kixbʼaanu tkawuuq ajwiʼ li qoybʼenihom chirix li tixbʼaanu saʼebʼ li kutan chalkebʼ re.

CHISAHOʼQ QACHʼOOL XBʼAAN LI QOYBʼENIHOM

16. Kʼaʼut naq li qoybʼenihom aʼan jun chaabʼil maatan?

¹⁶ Li qoybʼenihom chirix li junelik yuʼam aʼan jun li chʼinaʼusil maatan li naxkʼe qe li Yos. Naqaj ta raj naq ak xqakʼul ut relik chi yaal naq joʼkan tkʼulmanq. Li qoybʼenihom chanchan jun li ankla xbʼaan naq nokooxtenqʼa naq naqanumsi ebʼ li yalbʼaʼix, li rahobʼtesiik joʼ ajwiʼ li kamk. Nakʼanjelak ajwiʼ joʼ li punit chʼiichʼ xbʼaan naq naxkol rix li qakʼaʼuxl ut nokooxtenqʼa re xtzʼeqtaanankil li yibʼru ut xbʼaanunkil li us. Li qoybʼenihom li naxye li Santil Hu nokooxnachʼobʼresi rikʼin li Yos ut aʼin naxkʼutbʼesi chiqu naq qʼaxal nokooxra. Wi kaw li qoybʼenihom naqataw rusilal.

17. Kʼaʼut nasahoʼk saʼ qachʼool xbʼaan li qoybʼenihom?

¹⁷ Li kixtzʼiibʼa li apóstol Pablo saʼ li xʼesilhu rehebʼ laj Roma kixye: «Chisahoʼq saʼ eechʼool saʼ xkʼabʼaʼ leeroybʼenihom» (Rom. 12:12). Laj Pablo nasahoʼk chaq saʼ xchʼool xbʼaan naq chʼolchʼo chaq chiru naq twanq xyuʼam chi junelik saʼ choxa wi inkʼaʼ naxtzʼeqtaana li Jehobʼa. Laaʼo ajwiʼ nasahoʼk saʼ qachʼool xbʼaan li qoybʼenihom, xbʼaan naq chʼolchʼo chiqu naq li Jehobʼa tixbʼaanu li naxyeechiʼi. Joʼ kixye jun rehebʼ li kitzʼiibʼank re li salmo: «Us xaq re […] li xaqxo li roybʼenihom rikʼin li Qaawaʼ li xYos […] li Qaawaʼ wank saʼ tiikilal chi junelik» (Sal. 146:5, 6).