1 | Li tij: Qʼaxtesihomaq «chixjunil li kʼaʼuxl wiʼ eechʼool»

LI SANTIL HU NAXYE: «Qʼaxtesihomaq saʼ ruqʼ li Yos chixjunil li kʼaʼuxl wiʼ eechʼool, xbʼaan naq Aʼan naʼilok eere» (1 PEDRO 5:7).

Kʼaru naraj xyeebʼal?

Li Jehobʼa naraj naq tqaye re yalaq kʼaru chi chʼaʼajkilal malaj li nakʼehok qakʼaʼuxl (Salmo 55:23). Wi wank xwankil chiqu jun li naʼlebʼ, wank ajwiʼ xwankil chiru li Jehobʼa xbʼaan naq aʼan naxkʼe xchʼool chirix chanru naqekʼa qibʼ. Li tijok aʼan li xbʼeen naʼlebʼ li tento xbʼaanunkil re naq tqataw wiʼ chik xtuqtuukilal li qakʼaʼuxl (Filipenses 4:6, 7).

Chanru nokooxtenqʼa?

Naq moko us ta wank li qakʼaʼuxl, maare naqekʼa qibʼ qajunes. Ak re aʼin, xbʼaan naq wank sut ebʼ li junchʼol inkʼaʼ nekeʼxtaw ru li yooko xnumsinkil (Proverbios 14:10). Abʼan, saʼ xkʼabʼaʼ naq li Yos naxtaw qu ut naxkʼe xchʼool chi qabʼinkil naru naqaye re chanru naqekʼa qibʼ. Li Jehobʼa naxkʼe xchʼool chiqix, yoʼon wank chi qatenqʼankil chirix li qarahilal ut naxnaw li yooko xnumsinkil, joʼkan naq naraj naq tootijoq chirix yalaq kʼaru chi chʼaʼajkilal li naxkʼe qakʼaʼuxl (2 Crónicas 6:29, 30).

Naq nokootijok chiru li Jehobʼa, qʼaxal chik naqakʼojobʼ qachʼool chirix naq aʼan tooxtenqʼa. Tooruuq ajwiʼ xyeebʼal li kixye jun li kitzʼiibʼank re li Santil Hu. Aʼan kixye re li Yos: «Laaʼat xawil naq qʼaxal xtoqʼobʼaal wu ut xanaw chixjunil li xrahil li waanm» (Salmo 31:8). Xnawbʼal naq li Jehobʼa naxkʼe xchʼool chirix li naqakʼul naru naxkʼe qametzʼew re xnumsinkil li chʼaʼajkilal. Abʼan moko kaʼaj tawiʼ naxkʼe reetal li rahilal li naqakʼul. Kaʼajwiʼ aʼan naxtaw ru chiʼus li yooko xnumsinkil ut nokooxtenqʼa re xtawbʼal xkʼojobʼankil qachʼool saʼ li Santil Hu.

Chanru kitenqʼaak xbʼaan li Santil Hu laj Julián

Chanru ninxchʼiʼchʼiʼi li xkʼaʼuxl wiʼ inchʼool

«Ninyal inqʼe chi xqʼaxbʼal ru li naxkʼe xkʼaʼuxl wiʼ inchʼool ut jun li yajel li naxbʼaanu naq junelik chʼiʼchʼiʼi twekʼa wibʼ (trastorno obsesivo compulsivo). Wank sut sa nawekʼa wibʼ abʼan chi maakʼaʼ saʼ inchʼool naʼok inkʼaʼuxl. Aʼin tzʼaqal ninkʼul naq wankin saʼ xyanqebʼ li kristiʼaan. Ninxutaanak chirix li teʼxye chiwix.

»Ebʼ li wamiiw li nekeʼxnaw li ninkʼul, nekeʼxbʼaanu chixjunil li wank saʼ ruqʼebʼ re intenqʼankil, abʼan wank sut nekeʼxye junaq li naʼlebʼ li inkʼaʼ nikinxtenqʼa. Usta joʼkan, ninbʼanyoxi naq nekeʼxyal intenqʼankil.

»Saʼ xkʼabʼaʼ li yajel aʼin qʼaxal nachʼaʼajkoʼk chiwu tijok. Tento naq tinyal inqʼe re naq inkʼaʼ tchalq txik linkʼaʼuxl naq yookin chi aatinak rikʼin li Jehobʼa. Saʼ junpaat ninʼok xkʼoxlankil jalan chik li kʼaʼaq re ru ut aʼin naxbʼaanu naq inkʼaʼ tinkʼe inchʼool chirix li yookin xyeebʼal saʼ lintij. Naq inkʼaʼ tuqtuuq ru linkʼaʼuxl, qʼaxal nachʼaʼajkoʼk chiwu xyeebʼal re li Jehobʼa li nawekʼa ut li ninkʼoxla».

Chanru nikinxtenqʼa li Santil Hu

«Saʼ li Santil Hu xintzol naq moko aajel ta ru naq nimaq roq lintij malaj tinsikʼ li chʼinaʼusil aatin re naq li Yos tinrabʼi. Wank sut, naq inkʼaʼ ninruuk xyeebʼal chanru nawekʼa wibʼ kaʼajwiʼ ninye: “Jehobʼa, bʼaanu usilal, tenqʼahin”. Usta kaʼajwiʼ aʼan ninruuk xyeebʼal, nawekʼa naq li Jehobʼa naxtaw wu ut naxkʼe we li naʼajmank saʼ li hoonal aʼan. Moko kaʼaj tawiʼ nintijok, ninsikʼ ajwiʼ intenqʼ rikʼinebʼ laj bʼanonel. Qʼaxal sa saʼ linchʼool, xbʼaan naq saʼ xkʼabʼaʼ li wiibʼ chi naʼlebʼ aʼin yookin chi usaak. Usta nachʼaʼajkoʼk chiwu nachʼok rikʼin linchoxahil Yuwaʼ, ninbʼaanu xbʼaan naq chʼolchʼo chiwu naq aʼan nikinxra ut naraj intenqʼankil».