Xpatzʼom ebʼ laj ilol hu
Naq li Jesús kixxaqabʼ xnimankil li xkamik, bʼar wankebʼ li 70 chi xtzolom li kixtaqlahebʼ chi puktesink? Ma xeʼxtzʼeqtaana?
Inkʼaʼ tooruuq xyeebʼal naq li 70 chi xtzolom li Jesús moko wankebʼ ta rikʼin naq kixxaqabʼ xnimankil li xkamik chi moko naq xeʼxtzʼeqtaana malaj inkʼaʼ chik sa xchʼool rikʼinebʼ. Saʼ li hoonal aʼin, li Jesús kaʼajwiʼ kiraj wank rochbʼeenebʼ li xʼapóstol.
Li Jesús sa xchʼool rikʼinebʼ li kabʼlaju ut li 70 chi xtzolom. Xbʼeenwa kixsikʼ kabʼlaju chi winq saʼ xyanq ebʼ li xtzolom ut kixkʼabʼaʼi apóstol (Luc. 6:12-16). Wank Galilea naq «kixchʼutubʼ li Kabʼlaju» ut «kixtaqlahebʼ chi xkʼebʼal chi naweʼk li Xʼawabʼejilal li Yos ut chi xkʼirtasinkilebʼ li yaj» (Luc. 9:1-6). Moqon, aran Judea «kixsikʼ 70 chik li xtzolom, kixkʼehebʼ saʼ kaʼkabʼ ut kixtaqlahebʼ chiʼubʼej» (Luc. 9:51; 10:1). Joʼkan naq saʼ li jalan jalanq chi teep bʼarwiʼ nakʼemank chi naweʼk li chaabʼil esil, xeʼwank ebʼ li xtzolom.
Ebʼ laj judiiy li nekeʼxtaqe li Jesús moko xeʼxkanabʼ ta xninqʼehinkil li Paswa rajlal chihabʼ, maare rochbʼeenebʼ li xjunkabʼal (Éx. 12:6-11, 17-20). Naq jayeʼq ma nakamk li Jesús, kibʼihajik Jerusalén rochbʼeenebʼ li xʼapóstol. Abʼan moko kixye ta rehebʼ chixjunilebʼ li xtzolom li wankebʼ Judea, Galilea ut Perea naq teʼxninqʼehi li Paswa rochbʼeen. Chanchan naq saʼ li hoonal aʼan yal kiraj wank rochbʼeenebʼ li xʼapóstol. Joʼkan naq kixye: «Kʼajoʼ ninrahi ru xwaʼbʼal li Paswa eerochbʼeen anaqwan naq toj maajiʼ natiklaak li rahilal saʼ inbʼeen» (Luc. 22:15).
Kʼaʼut li Jesús kiraj wank xjunes rikʼinebʼ? Wank jun xyaalal. Chi seebʼ tkamq joʼ «li Xkarneer li Yos li naxkuy ut naxsach xmaak li ruuchichʼochʼ» (Juan 1:29). Tkamq Jerusalén, bʼarwiʼ junxil nayeechiʼimank li mayej choʼq re li Yos. Li karneer li nayeechiʼimank saʼ li Paswa kixjultika rehebʼ laj Israel naq li Jehobʼa kirisihebʼ aran Egipto. Abʼan, saʼ xkʼabʼaʼ li xkamik li Jesús naabʼalebʼ teʼkoleʼq chiru li maak ut li kamk (1 Cor. 5:7, 8). Saʼ xkʼabʼaʼ li mayej li kixyeechiʼi li Jesús ebʼ li kabʼlaju chi apóstol teʼwanq joʼ li xbʼeen xtzolom li Jesús bʼarwiʼ txaqabʼamanq li chʼuut (Efes. 2:20-22). Saʼ li hu Apocalipsis naxye naq li tenamit Jerusalén wank «kabʼlaju chi pek ut chiruhebʼ li pek tzʼiibʼanbʼil li kabʼlaju chi kʼabʼaʼej re li kabʼlaju chi apóstol li nekeʼxtaqe li Karneer» (Apoc. 21:10-14). Ebʼ li apóstol li tiikebʼ xchʼool teʼwanq jun xnimal ru kʼanjel saʼ xtzʼaqlojik li rajom li Yos. Joʼkan naq wank xyaalal naq tqaye naq li Jesús kiraj wank rochbʼeenebʼ naq tixnima li Paswa li maajunwa chik tbʼaanumanq ut naq tixxaqabʼ li xnimankil li xkamik.
Li 70 chi xtzolom ut ebʼ li junchʼol chik inkʼaʼ xeʼwank rochbʼeen li Jesús saʼ li hoonal aʼan, abʼan chixjunilebʼ li xtzolom li tiikebʼ xchʼool teʼxtaw rusilal saʼ xkʼabʼaʼ li xkamik. Kʼaʼut? Xbʼaan naq saʼ xnumikebʼ li kutan, ebʼ laj paabʼanel li yulbʼilebʼ ru teʼokenq saʼ li sumwank chirix li Awabʼejihom, li kixye li Jesús rehebʼ li xʼapóstol saʼ li qʼoqyink aʼan (Luc. 22:29, 30).