Ma yook xchʼaʼajkinkil laawalal laakʼajol li Kʼanjelobʼaal re Aatinak saʼ Internet? | Chanru naxtenqʼahebʼ li naʼbʼej yuwaʼbʼej li naʼlebʼ li wank saʼ li Santil Hu

Jun laj bʼanonel kixye saʼ jun li hu: «Jwal aajel ru xkʼambʼal rikʼin laj bʼanonel ebʼ li saaj li qʼaxal rahebʼ saʼ xchʼool, qʼaxal yookebʼ xkʼaʼuxl malaj nekeʼraj xkamsinkil ribʼ. Ut jun rehebʼ li xnimal ru xyaalal kʼaʼut nekeʼrekʼa ribʼ chi joʼkan ebʼ li saaj, aʼan li Kʼanjelobʼaal re Aatinak saʼ Internet»a (Vivek Murthy, director general de Salud Pública de Estados Unidos. New York Times, 17 re junio 2024).

Chanru teʼruuq li naʼbʼej yuwaʼbʼej xkolbʼalebʼ li ralal xkʼajol chiru li Kʼanjelobʼaal re Aatinak saʼ Internet? Taawil li naʼlebʼ li naxkʼe li Santil Hu chirix aʼin.

Li teʼruuq xbʼaanunkil ebʼ li naʼbʼej yuwaʼbʼej

Kʼe reetal li naʼlebʼ aʼin li naxkʼe li Santil Hu.

«Li wank xnaʼlebʼ naxkʼe reetal bʼar yo chi xik» (Prov 14:15, Li Santil Hu, Sociedad Bíblica de Guatemala).

Maakʼoxla naq ebʼ laawalal aakʼajol tento teʼroksi li Kʼanjelobʼaal re Aatinak saʼ Internet xbʼaan naq li kʼanjelobʼaal aʼin naxkʼam chaq wiibʼ oxibʼ li chʼaʼajkilal. Abʼanan, wi taakanabʼebʼ chi roskinkil, tento teʼxpaabʼ li hoonal li taaye rehebʼ, inkʼaʼ teʼwanq choʼq ramiiw li maaʼusebʼ xnaʼlebʼ ut inkʼaʼ teʼril li yibʼ aj naʼlebʼ.

• Wi nakaawaj xnawbʼal xkomon li naʼlebʼ chirix aʼin, taawil ebʼ li tzolom «¿Deberían mis hijos usar redes sociales?» ut «Enséñele a su hijo adolescente a usar con seguridad las redes sociales.»

«Oksimaq chiʼus li hoonal» (Efesios 5:16).

Wi taakanabʼebʼ chi roksinkil li Kʼanjelobʼaal re Aatinak saʼ Internet, ye rehebʼ chanru tento teʼroksi ut chʼolobʼ chiruhebʼ naq li naʼlebʼ aʼin tkoloq rehebʼ. Ajʼajaq aawu chi rilbʼal li xnaʼlebʼebʼ ut aʼin taxtenqʼa chi xnawbʼal ma tento taaram chiruhebʼ roksinkil li Kʼanjelobʼaal re Aatinak saʼ Internet.

• Taawil li bʼideo li wank saʼ li juchʼbʼil eetalil li naxkʼabʼaʼi Chiwanq aanaʼlebʼ naq taawoksi ebʼ li redes sociales! re xtenqʼankilebʼ laawalal aakʼajol chi xtawbʼal ru kʼaʼut aajel ru xxaqabʼankil wiibʼ oxibʼ li naʼlebʼ chirix chanru t-oksimanq li Kʼanjelobʼaal re Aatinak saʼ Internet.

Xkomon li naʼlebʼ

Li Santil Hu naxye naq saʼ xraqikʼ ebʼ li kutan «kawaq li wank ut qʼaxal chʼaʼajkaq xnumsinkil» (2 Timoteo 3:1-5). Abʼan naxkʼe ajwiʼ qe li naʼlebʼ li junelik nakʼanjelak ut nokooxtenqʼa chi xnumsinkil li chʼaʼajkilal aʼin. Saʼ li tzolom aʼin li naʼaatinak chirixebʼ li saaj li qʼaxal rahebʼ saʼ xchʼool, qʼaxal yookebʼ xkʼaʼuxl malaj nekeʼraj xkamsinkil ribʼ taataw numenaq junmay li tzolom ut ebʼ li bʼideo li isinbʼil chaq saʼ li Santil Hu choʼq rehebʼ li naʼbʼej yuwaʼbʼej ut ebʼ li ralal xkʼajol.