Ma nekeʼxkanabʼ ebʼ laj testiiw re li Jehobʼa raatinankil li poyanam li inkʼaʼ chik natzʼaqonk saʼ xyanqebʼ?
Inkʼaʼ naqakanabʼ raatinankilebʼ li poyanam li xeʼkubʼeek xhaʼ joʼ aj testiiw re li Jehobʼa wi xeʼxkanabʼ puktesink ut chʼutlaak qikʼin. Naqakʼe bʼan qaqʼe re xkawresinkil wiʼ chik li xpaabʼal re naq tsutqʼiiq.
Naq jun laj Testiiw ak xkubʼeek xhaʼ ut namaakobʼk chiru li Yos naru naʼisiik saʼ li chʼuut. Abʼanan, toj natzʼilmank rix ma t-isiiq malaj inkʼaʼ. Wi jun li poyanam xkʼay chi xqʼetbʼal li Santil Hu ut inkʼaʼ naxyotʼ xchʼool, t-isiiq saʼ li chʼuut, ut ebʼ li hermaan maajunwa chik teʼaatinaq rikʼin. Li Santil Hu naxye chi tzʼaqal re ru: «Tento teerisi saʼ eeyanq li winq [...] li yook chi maakobʼk» (1 Corintios 5:13, Li Santil Hu, Wycliffe Bible Translators).
Kʼaru tkʼulmanq wi jun li winq xʼisiik saʼ li chʼuut, abʼan li rixaqil ut ebʼ li xkokʼal toj wankebʼ choʼq aj testiiw re li Jehobʼa? Usta li bʼeelomej inkʼaʼ chik naru naʼaatinak rikʼin li xjunkabʼal chirix li Yos, li rahok chiribʼilebʼ rikʼin li xsumʼaatin ut rikʼinebʼ li xkokʼal inkʼaʼ najalaak.
Li nekeʼisiik saʼ li chʼuut naru nekeʼwulak saʼebʼ li chʼutam ut, wi nekeʼraj, teʼxkʼul li xtenqʼankil rikʼinebʼ li cheekel winq. Ut aʼin naru natenqʼank rehebʼ chi xbʼaanunkil li naʼajmank re naq teʼoq wiʼ chik choʼq aj testiiw re li Jehobʼa. Wi li poyanam li xʼisiik saʼ li chʼuut, naʼok xtzʼeqtaanankil li tzʼaj aj naʼlebʼ chirix li muxuk ut naʼok xkʼutbʼesinkil naq relik chi yaal naraj xyuʼaminkil li naxkʼut li Santil Hu, truuq chi wank wiʼ chik choʼq aj Testiiw.