Bʼar nachalk xtuminal li xkʼanjelebʼ laj testiiw re li Jehobʼa?

Li xkʼihalil li tumin li naʼoksimank re xbʼaanunkil li xkʼanjel li Yos saʼ chixjunil li Ruuchichʼochʼ nachalk rikʼinebʼ laj Testiiw re li Jehobʼa.a Li xkaaxil li tumin natawmank bʼarwiʼ naqachʼutubʼ qibʼ ut li jalan jalanq chi naʼlebʼ chirix li kubʼsink natawmank saʼ li qanaʼaj re jw.org bʼarwiʼ naxye Tenqʼ tumin. Ak xnaʼaj xnaʼaj li junjunq chi tenqʼ re naq li poyanam tixsikʼ saʼ kʼaru kaaxil tixkʼe li xtenqʼ aʼ yaal ma chirix li kʼanjel li nabʼaanumank saʼ chixjunil li Ruuchichʼochʼ, chirix li xsachomq li chʼuut malaj choʼq re xkabʼichal li kʼanjel.

Moko tenebʼanbʼil ta saʼ xbʼeenebʼ laj testiiw re li Jehobʼa xkʼebʼal li xlajeetqil li xtojbʼalebʼ chi moko xaqabʼanbʼil ta joʼkʼihal li tumin tento teʼxkʼe (2 Corintios 9:7). Maajunwa nokoopatzʼok tumin chi moko naqapatzʼ xtuminal ebʼ li chʼutam chi moko ebʼ li nekeʼxbʼeresi li chʼutam nekeʼxpatzʼ xtuminal li kubʼsink haʼ, li seeraqʼ li nekeʼxkʼe naq nawank li kamk, li sumlaak malaj junaq chik. Inkʼaʼ nokookʼayink tibʼelwa malaj junaq chik re xmolkʼankil li tumin. Chi moko naqabʼaanu li bʼuulinbʼil bʼatzʼunk, li bʼuulinbʼil maatan, li ninqʼe, li waʼak, malaj junaq chik re tawok tumin chi moko naqatzʼaama rehebʼ li qas qiitzʼin. Maajunwa nayeemank xkʼabʼaʼebʼ li nekeʼkubʼsink (Mateo 6:2-4). Joʼkan ajwiʼ, maajun rehebʼ li qanaʼaj saʼ Internet ut ebʼ li tasal hu naxkʼam ta chaq li esil re tawok tumin.

Saʼebʼ li xchʼutam ebʼ laj testiiw re li Jehobʼa nakʼemank chi naweʼk rajlal po joʼnimal li tumin nasachmank ut joʼnimal li tumin nakanaak ut moko muqmu ta chiru li komonil. Chi rajlal li junjunq chi chʼuut naxtzʼil rix li tumin li naʼok re naq t-oksimanq chiʼus li tenqʼ tumin (2 Corintios 8:20, 21).

Jalan jalanq li naʼlebʼ chirix li kubʼsink

• Xkaaxil li tenqʼ tumin: Naru nakaakʼe laatenqʼ tumin malaj li cheke saʼ li xkaaxil li tumin aʼ yaal ma saʼ li Chʼutlebʼaal Kabʼl, saʼ li nimla chʼutam malaj saʼ junaq chik li naʼaj.

• Li tenqʼ tumin saʼ Internet: Saʼ naabʼal li tenamit naru nakaawoksi li qanaʼaj saʼ Internet bʼarwiʼ naxye «Li kubʼsink choʼq rehebʼ laj testiiw re li Jehobʼa» ut tatruuq roksinkil li tarjeta re crédito, re débito, xnumsinkil laatumin saʼ xkʼabʼaʼ li qamolam ut jalan chik li naʼlebʼ saʼ Internet.b Wankebʼ laj Testiiw nekeʼxxok «bʼayaq xtuminebʼ» rajlal po re naq teʼruuq chi kubʼsink ut nekeʼroksi jun rehebʼ li naʼlebʼ aʼin (1 Corintios 16:2).

  

• Li kubʼsink li kʼubʼanbʼil chiʼus: Wank jalan jalanq li naʼlebʼ chirix li kubʼsink li kʼubʼanbʼil chi rubʼelaj malaj joʼ naxye li chaqʼrabʼ. Saʼ xkʼabʼaʼ aʼin naru nakatrusila li molam li naxkʼula xtuminal li tenamit. Naabʼalebʼ li poyanam nekeʼxtaw rusilal naq nekeʼxtzʼil rix chiʼus kʼaru teʼxsi naq toj yoʼyokebʼ malaj li tbʼaanumanq rikʼinebʼ li xjunkabʼlal naq teʼkamq. Bʼoqon saʼ li molam rehebʼ laj testiiw re li Jehobʼa li wank saʼ laateep re xtawbʼal xkomon li naʼlebʼ ut wi nakaawaj xkʼebʼal:

  • li xaaxok saʼ li kʼulebʼaal tumin

  • li hu li xaatoj chirix laayuʼam ut chirix laacheekelal

  • laajunkabʼlal

  • laatumin li narala ribʼ ut jalan chik

  • li xhuhil li echanink ut li hu re xkʼanjelankil laajunkabʼlal

Re xtawbʼal xkomon li jalan jalanq chi naʼlebʼ chirix li siʼink saʼ laateep sikʼ saʼ li qanaʼaj saʼ Internet «Li kubʼsink choʼq rehebʼ laj testiiw re li Jehobʼa».