Ma nokooxtenqʼa li Santil Hu naq maakʼaʼ qatumin?

Li naxsume li Santil Hu

Joʼkan tzʼaqal. Arin taataw kaahibʼ li naʼlebʼ li naxkʼe li Santil Hu li naru tatxtenqʼa wi wank aakʼas malaj inkʼaʼ natzʼaqlok laatumin.

1. Tzʼil rix jarubʼ taasach. «Li kʼaru kʼoxlanbʼil rix chi chaabʼil, qʼaxal us naʼelk; aʼut li naʼuxmank saʼ junpaat, taajukʼeʼq chi junwaakaj» (Proverbios 21:5, Li Santil Hu, Sociedad Bíblica de Guatemala, SBG). Maaloqʼ saʼ junpaat junaq li kʼaʼaq re ru xbʼaan naq kubʼenaq xtzʼaq. Kʼubʼ joʼnimal taasach ut bʼaanu.

2. Matkʼasok wi inkʼaʼ aajel ru. «Li wank xtoʼ tumin nakanaak choʼq xmoos li nakʼehok tumin chi toʼ» (Proverbios 22:7, SBG). Wi ak wank aakʼas ut inkʼaʼ nakatruuk xtojbʼal, kʼe aawibʼ saʼ aatin rikʼin li xtoʼonink aawe re naq tatruuq xtojbʼal. Maakanabʼ xtitzʼbʼal. Il li naxye li Santil Hu chirixebʼ li nekeʼxkʼe ribʼ saʼ kʼas chirix junaq chik li poyanam: «Ayu saʼ rochoch, tzʼaaman elajin chiru; matwark ut mathilank toj reetal taayiibʼ ru laachʼaʼajkilal» (Proverbios 6:1-5, SBG). Usta inkʼaʼ xatruuk xtuqubʼankil ru, maakanabʼ xsikʼbʼal chanru taakʼe aawibʼ saʼ aatin rikʼin.

3. Maakʼe xwankil li tumin. «Li pix aj winq narataw bʼihomoʼk chi junpaat, ut inkʼaʼ naxnaw naq saʼ nebʼaʼil toxʼosoʼq» (Proverbios 28:22, SBG). Li kaqalink ut li atawank naru nokooxkʼe saʼ chʼaʼajkilal saʼ li qapaabʼal ut rikʼin li tumin.

4. Sahaq aachʼool rikʼin li kʼaru wank aawe. «Wi wank qatzekemq ut qabʼaatal, kʼojkʼooq qachʼool rikʼin aʼan» (1 Timoteo 6:8, SBG). Li tumin inkʼaʼ naxloqʼ li sahil chʼoolejil. Li poyanam li sahebʼ saʼ xchʼool moko bʼihomebʼ ta. Wankebʼ saʼ amiiwil rikʼin li Jehobʼa, nekeʼraheʼk xbʼaan li xjunkabʼal ut ebʼ li ramiiw (Proverbios 15:17; 1 Pedro 5:6, 7).