Anihebʼ tzʼiibʼanbʼil li xkʼabʼaʼ saʼ «xhuhil li yuʼam»?

Li naxsume li Santil Hu

Saʼ «xhuhil li yuʼam» malaj saʼ li tasal hu rehebʼ li patzʼbʼilebʼ natawmank li xkʼabʼaʼebʼ li kristiʼaan li teʼxkʼul li junelik yuʼam (Apocalipsis 3:5, Li Santil Hu, Sociedad Bíblica de Guatemala, SBG; 20:12; Malaquías 3:16). Saʼ li hu aʼan li Yos naxtzʼiibʼa li xkʼabʼaʼebʼ li kristiʼaan li maajunwa xeʼtzʼeqtaanank re (Juan 3:16; 1 Juan 5:3).

Bʼar wank li hu aʼan? «Chalen chaq saʼ xkʼojlajik li ruuchichʼochʼ» li Yos naxjultika ebʼ laj kʼanjel chiru li maajunwa xeʼtzʼeqtaanank re ut chanchan tawiʼ yook xtzʼiibʼankil li xkʼabʼaʼebʼ saʼ jun li hu (Apocalipsis 17:8, SBG). Chanchan naq li xkʼabʼaʼ laj Abel, aʼan li xbʼeen kʼabʼaʼej li kitzʼiibʼak saʼ xhuhil li yuʼam (Hebreos 11:4). Abʼanan, aʼin moko naraj ta xyeebʼal naq maakʼaʼ nekeʼok wiʼ li kʼabʼaʼej li kixtzʼiibʼa, xbʼaan naq li xhuhil li yuʼam naxkʼutbʼesi naq li Jehobʼa aʼan jun li Yos li qʼaxal narahoʼk ut «naxnaw ruhebʼ li re» (2 Timoteo 2:19, SBG; 1 Juan 4:8).

Ma naru naq t-isiiq junaq li kʼabʼaʼej saʼ «xhuhil li yuʼam»?

Heeheʼ, naru. Saʼ jun kutan naq ebʼ laj Israel xeʼxqʼet ribʼ chiru li Yos, aʼan kixye: «Li xmaakobʼk chiwu, aʼan li tinsach xkʼabʼaʼ saʼ linhu» (Éxodo 32:33, SBG). Abʼanan, chixjunilebʼ li inkʼaʼ nekeʼtzʼeqtaanaak re inkʼaʼ trisi li xkʼabʼaʼebʼ saʼ «xhuhil li yuʼam» (Apocalipsis 20:12, SBG).