Li Tzolok saʼ Galaad nokooxtenqʼa chiqajunilo

Rajlal chihabʼ, naabʼalebʼ laj kʼanjel chiru li Jehobʼa li nekeʼxkʼe chixjunil li xhoonal ut wankebʼ saʼ chixjunil li ruuchichʼochʼ nekeʼxik saʼ li Tzolok re Galaad Watchtower, li nabʼaanumank saʼ li Nimla tzolebʼaal Watchtower li wank Patterson (Nueva York).a Saʼ li tzolebʼaal aʼin nekeʼkawresiik re xbʼaanunkil chi chaabʼil ebʼ li xkʼanjel li kʼebʼil rehebʼ saʼ xmolam li Jehobʼa. Ut nekeʼkawresiik li xpaabʼal re naq teʼxtenqʼa ebʼ li chʼuut ut li qamolam saʼ chixjunil li ruuchichʼochʼ.

Naabʼal rehebʼ li nekeʼwulak saʼ li tzolebʼaal Galaad chalenaqebʼ saʼ chixjunil li ruuchichʼochʼ. Jun eetalil, saʼ li tzolebʼaal 147 li keʼxkʼul ribʼ saʼ li chihabʼ 2019, 56 rehebʼ chalenaqebʼ saʼ 29 chi tenamit. Saʼ xyanqebʼ aʼin wankebʼ li nekeʼkʼanjelak saʼ Betel, li nekeʼtaqlaak chi puktesink saʼ jalan chik tenamit, li nekeʼxbʼaanu 130 hoonal ut ebʼ li nekeʼulaʼanink chʼuut.

Nekeʼok xkawresinkil li tzolok aʼin naq toj maajiʼ natiklaak. Jun eetalil, li nekeʼxkʼubʼ li kʼanjel re bʼihajik saʼ li qamolam nekeʼxloqʼ chi rubʼelaj ebʼ li pasaaj re li avión choʼq rehebʼ li keʼbʼoqeʼk saʼ li tzolebʼaal aʼin. Ebʼ li xeʼwank saʼ li tzolebʼaal 147, li xtzʼaq li xpasaajebʼ li junjunq re xik ut chalk saʼ Patterson aʼan 1,075 dólar. Ebʼ li xeʼchalk saʼ Islas Salomón, xeʼxjal kaahibʼ sut li avión re naq teʼwulaq ut oxibʼ sut naq keʼsutqʼiik. Keʼbʼihajik 35,400 kilometros (22,000 millas). Li xtzʼaq li xpasaaj li junjunq aʼan 2,300 dólar. Re naq inkʼaʼ teʼxsach naabʼal li tumin li chʼuut li naxkʼubʼ li kʼanjel re bʼihajik nekeʼroksi jun li naʼlebʼ re xtawbʼal li pasaaj li kubʼenaq xtzʼaq. Ut usta ak xpatzʼmank toj nekeʼxkʼe xchʼool xsikʼbʼal li kubʼenaq xtzʼaq chiru wiibʼ oxibʼ xamaan malaj po. Li chʼuut li naxkʼubʼ li kʼanjel re bʼihajik nekeʼroksi ajwiʼ li maatan li nekeʼkʼeheʼk re, re naq inkʼaʼ teʼxtoj junaq li bʼihaj.

Re naq teʼoq Estados Unidos naʼajmank naq teʼwanq xvisa. Joʼkan naq li nekeʼxkol li qamolam chiru li chaqʼrabʼ saʼ li xmolam li Jehobʼa natenqʼank rehebʼ re naq teʼkʼeheʼq re li xvisa re tzolok. Re li junjunq nasachmank kachʼin chik ma 510 dólar.

Kʼaru rusilal naqataw naq nekeʼtzoleʼk ebʼ li qech aj paabʼanel aʼin? Laj Hendra Gunawan aʼan jun li cheekel winq saʼ jun li chʼuut re Asia bʼarwiʼ wank jun sumal li kitzolok saʼ Galaad. Naxye: «Junxil maakʼaʼebʼ li nekeʼkʼamok bʼe saʼ li puktesink. Abʼan naq kikʼulunk li sumal aʼin, aʼanebʼ xeʼxwaklesi xchʼool ebʼ li junchʼol re naq teʼoq chi kʼanjelak joʼ aj kʼamolbʼe saʼ li puktesink. Ut moqon chik jun rehebʼ li qahermaan ixq li wank saʼ li qachʼuut xwank saʼ li Tzolok chirix li Xʼawabʼejilal li Yos».

Laj Sergio Panjaitan nakʼanjelak rikʼin oobʼ li hermaan li xeʼelk chaq Galaad saʼ li qamolam aran Asia. Aʼan naxye: «Li xeʼxtzol ebʼ li hermaan aʼin, aʼan jun osobʼtesihom choʼq qe ut choʼq rehebʼ aʼan. Naabʼal xeʼxtzol! Usta joʼkan, inkʼaʼ nekeʼxnimobʼresi ribʼebʼ, nekeʼxwotz bʼan li xtzolbʼalebʼ. Aʼin nokooxtenqʼa re xwaklesinkil qachʼool chiqibʼil qibʼ».

Chanru li qamolam naxtoj li tzolok aʼin? Rikʼin li tenqʼ tumin li nekeʼxkʼe ebʼ li hermaan saʼ chixjunil li ruuchichʼochʼ. Nabʼaanumank rikʼin ebʼ li naʼlebʼ li wank saʼ donate.jw.org. Bʼanyox li tenqʼ li nekeekʼe chi anchal eechʼool. Saʼ xkʼabʼaʼ li tenqʼ tumin nabʼaanumank li tzolok aʼin.