Li kanal re televisión rikʼin satélite nawulak toj bʼarwiʼ inkʼaʼ nawulak li internet

Rajlal po yooko roybʼeninkil naq teʼxtaqsi saʼ JW Broadcasting ebʼ li naʼlebʼ ut ebʼ li bʼideo li naxwaklesi qachʼool. Abʼanan, naabʼalebʼ li qechpaabʼanel li wankebʼ África inkʼaʼ nekeʼruuk rilbʼal saʼ internet. Kʼaʼut?

Saʼ li xkʼihalil li tenamit África moko nawulak ta li internet. Ut bʼarwiʼ nawulak moko kaw ta li xmetzʼew malaj terto xtzʼaq. Jun eetalil, saʼ jun kutan jun li cheekel winq li naʼulaʼanink chʼuut aran Madagascar kixkubʼsi li esil li naʼelk rajlal po saʼ JW Broadcasting saʼ jun li kʼayibʼaal kapeʼ bʼarwiʼ tatruuq ajwiʼ roksinkil li internet ut kixtoj 16 dólar.a Aʼin qʼaxal terto wiʼ chik chiru li naxkʼul junaq li kristiʼaan chiru jun xamaan.

Usta wank li chʼaʼajkilal aʼin, chi miyon ebʼ li kristiʼaan aran África nekeʼruuk rilbʼal JW Broadcasting usta maakʼaʼ li internet. Chan put ru naq nekeʼruuk xbʼaanunkil aʼin?

Chalen li chihabʼ 2017, li wankebʼ aran África subsahariana nekeʼruuk rilbʼal JW Broadcasting saʼ li tele saʼ jun li kanal rikʼin satélite malaj anteen. Li naʼaj aʼin nawank chi qʼeq ut chi kutan chiru chixjunil li xamaan saʼ 16 chi aatinobʼaal.

Re xbʼaanunkil aʼin, ebʼ laj testiiw re li Jehobʼa nekeʼxtoʼoni jun li naʼaj saʼ tele re xnumsinkil ebʼ li naʼlebʼ rikʼin satélite. Li xmetzʼew malaj li señal re li anteen nawulak saʼ 35 chi tenamit re África subsahariana ut natojmank 12,000 dólar rajlal po. Wank sut, natojmank chik bʼayaq re roksinkil junaq chik li naʼaj malaj kanal re xnumsinkil junaq li naʼlebʼ li t-ilmanq ajwiʼ saʼ li hoonal aʼan. Saʼ xkʼabʼaʼ aʼin, chi mil li qas qiitzʼin nekeʼruuk rilbʼal li nimla chʼutam ut li xchaabʼilal ru li naʼlebʼ li nawank naq nokoorulaʼani li ruuchil li qamolam.

Naabʼalebʼ laj Testiiw joʼ ajwiʼ li maawaʼebʼ aj Testiiw nekeʼruuk rilbʼal li naʼaj aʼin saʼebʼ li xtele. Abʼanan, naabʼalebʼ li hermaan moko natzʼaqlok ta li xtuminebʼ re xloqʼbʼal chixjunil li kʼanjelobʼaal li naʼokenk chisaʼ. Joʼkan naq xkʼemank li anteen aʼin saʼ 3,670 li Chʼutlebʼaal Kabʼl. Saʼ xkʼabʼaʼ aʼin, ebʼ li hermaan nekeʼruuk chik rilbʼal JW Broadcasting. Wi saʼ junaq li Chʼutlebʼaal Kabʼl ak wank jun li tele malaj jun li kʼanjelobʼaal re rilbʼal chi nim li bʼideo nasachmank 70 dólar re xtaqlankil. Abʼan wi maakʼaʼ, nasachmank 530 dólar re xtaqlankil.

Naabʼalebʼ li hermaan sahebʼ saʼ xchʼool rikʼin li anteen aʼin. Jun li cheekel winq li wank Camerún naxye: «Choʼq re linjunkabʼal li naʼaj aʼin chanchan li maná saʼ li chaqichʼochʼ». Laj Odebode, li wank Nigeria, naxye: «Naqachʼutubʼ qibʼ oxibʼ sut saʼ li xamaan re rilbʼal li naʼaj aʼin. Ebʼ linkokʼal ak yoʼon wankebʼ chi roybʼeninkil li kutan aʼin. Usta maawaʼ li kutan re rilbʼal nekeʼraj naq tqakʼe». Li xRose, li wank ajwiʼ Nigeria, naxye: «Sa inchʼool. Junxil nawulak chiwu rilbʼal li naʼaj bʼarwiʼ naʼelk li esil, abʼanan anaqwan nawulak chiwu li naʼaj JW. Naq nawil ebʼ li esil saʼ junpaat nachalk linjosqʼil ut nataqeʼk linpresión. Abʼan rilbʼal li naʼlebʼ li wank saʼ li naʼaj JW nikinxtenqʼa re naʼlebʼak chiʼus ut naxkʼe xtuqtuukilal linchʼool... Jwal nawulak chiwu li naʼaj aʼin. Aʼin jun xmaatan li Jehobʼa».

Jun li cheekel winq li naʼulaʼanink chʼuut aran Mozambique naxye naq saʼebʼ li Chʼutlebʼaal Kabʼl kikʼemank ebʼ li anteen re naq teʼruuq rilbʼal li kanal JW. Ebʼ li hermaan nekeʼwulak jun hoor rubʼelaj re rilbʼal JW Broadcasting naq toj maajiʼ natiklaak li chʼutam.

Saʼ li nimla chʼutam bʼarwiʼ nekeʼtzʼaqonk naabʼal li tenamit li kiwank chiru li chihabʼ 2019 aran Johannesburgo (Sudáfrica), kiʼoksimank li naʼaj aʼin re xnumsinkil ebʼ li seeraqʼ saʼ bʼeleebʼ chi tenamit, joʼ li nekeʼxkʼe li Nekeʼjolomink re Xmolam li Jehobʼa. Laj Sphumelele, li wank Sudáfrica ut natzʼaqonk saʼ xyanqebʼ li hermaan li nekeʼxkʼanjela li Broadcasting, naxye: «Junxil nanumsimank ebʼ li seeraqʼ saʼ internet. Re xbʼaanunkil aʼin, naʼajmank xloqʼbʼal li internet ut naq chaabʼilaq li xmetzʼew. Abʼan, roksinkil li naʼaj aʼin qʼaxal chaabʼil ut moko naabʼal ta nasachmank».

Saʼ xkʼabʼaʼ li tenqʼ tumin li nekeekʼe chi anchal eechʼool ebʼ li hermaan li wankebʼ África nekeʼruuk chik rilbʼal anaqwan JW Broadcasting rikʼin satélite. Naqabʼanyoxi eere li tenqʼ tumin li nekeekʼe saʼ li kʼanjel saʼ chixjunil li ruuchichʼochʼ saʼ li jalan jalanq chi naʼlebʼ li natawmank saʼ donate.jw.org. donate.jw.org.