Li nimla chʼutam re oxibʼ kutan kinumsimank saʼ tele ut saʼ raay

Li nimla chʼutam re oxibʼ kutan re li chihabʼ 2020, aʼan li xbʼeen nimla chʼutam li kibʼaanumank saʼ internet saʼ chixjunil li ruuchichʼochʼ. Abʼanan, li xkʼihalil ebʼ li hermaan re Malaui ut Mozambique keʼruuk xtawbʼal rusilal li nimla chʼutam aʼin usta moko wank ta li internet. Chanru keʼruuk xbʼaanunkil aʼin?

Li chʼuut li naril li chaqʼrabʼ ut li rahilal ut li naril li natzolmank re li Nekeʼjolomink re Xmolam li Jehobʼa keʼxkʼulubʼa naq saʼ li sut aʼin tnumsimanq li nimla chʼutam saʼ raay ut saʼ kaaxmu. Kʼaʼut kiʼajmank naq joʼweʼ tbʼaanumanq? Saʼ li tenamit Malaui jwal terto xtzʼaq li internet. Joʼkan naq moko naabʼalebʼ ta laj testiiw re li Jehobʼa nekeʼruuk xloqʼbʼal li internet. Laj William Chumbi, jun rehebʼ li natzʼaqonk rikʼin li chʼuut li naril li qakʼanjel saʼ Malaui naxye: «Kaʼajwiʼ saʼ li raay ut saʼ li kaaxmu naru xkʼutbʼal li naʼlebʼ li naxkawresi li xpaabʼal ebʼ li qechpaabʼanel». Laj Luka Sibeko, jun chik rehebʼ li natzʼaqonk saʼ li chʼuut li naril li qakʼanjel saʼ Malaui, naxye: «Wi maawaʼ raj saʼ xkʼabʼaʼ li raay ut li kaaxmu moko kʼihebʼ ta raj li hermaan xeʼruuk raj xtawbʼal rusilal li nimla chʼutam aʼin». Joʼkan ajwiʼ nakʼulmank aran Mozambique. Moko naabʼalebʼ ta li hermaan nekeʼruuk xtojbʼal jun li chaabʼil kʼanjelobʼaal chi moko xtojbʼal li internet.

Chanru kibʼaanumank?

Saʼ xkʼabʼaʼ li nimla yajel COVID-19 saʼ wiibʼ oxibʼ li naʼaj re li raay ut li kaaxmu ak yookebʼ xnumsinkil li qachʼutam re rajlal xamaan.a Ebʼ li hermaan keʼaatinak rikʼinebʼ laj echal re li raay ut li kaaxmu re naq teʼruuq xnumsinkil li nimla chʼutam.

Saʼ Malaui ebʼ li hermaan keʼxtaw jun li chʼaʼajkilal. Saʼ li raay ut saʼ li kaaxmu kaʼajwiʼ jun hoor xnajtil roq li naʼlebʼ li nanumsimank, xbʼaan naq nekeʼok xkʼaʼuxl naq wi jwal tbʼayq teʼtitzʼq ut inkʼaʼ chik teʼraj rilbʼal chi moko rabʼinkil. Abʼanan, kiyeemank rehebʼ naq li qakʼanjel naxtenqʼa ebʼ li poyanam li wankebʼ saʼ li teep. Jun eetalil, usta tzʼaptzʼokebʼ li poyanam saʼebʼ li rochoch laaʼo naqatenqʼahebʼ re naq teʼxtaw li yaal li wank saʼ li Santil Hu. Aweʼ natenqʼank rehebʼ re naq chaabʼilaqebʼ joʼ poyanam ut re naq sahaqebʼ saʼ xchʼool saʼebʼ li xjunkabʼal. Naq ebʼ laj echal re li raay ut li kaaxmu keʼrabʼi li xchʼolobʼamank chiruhebʼ aʼanebʼ keʼxkʼulubʼa xkʼebʼal xtzʼaqobʼ xhoonal ebʼ li hermaan.

Saʼ Malaui, jun xnaʼaj li raay ut jun re li kaaxmu keʼxnumsi li nimla chʼutam re oxibʼ kutan. Chi miyon ebʼ li qas qiitzʼin nekeʼroksi li wiibʼ chi kʼanjelobʼaal aʼin. Ut saʼ li tenamit Mozambique 85 xnaʼaj li raay ut jun xnaʼaj li kaaxmu keʼxnumsi li nimla chʼutam.

Kisachmank 28,227 dólarb re xnumsinkil li nimla chʼutam saʼ li kaaxmu ut kachʼin chik ma 20,000 dólar re xnumsinkil saʼ li raay saʼebʼ li wiibʼ chi tenamit. Re xnumsinkil li nimla chʼutam saʼ raay kitojmank 15 malaj 2,777 dólar, aʼ yaal toj bʼar nawulak xnajtil.

Ebʼ li hermaan keʼxnaw roksinkil chiʼus li tenqʼ tumin. Jun eetalil, saʼ Malaui keʼxsikʼ chanru xbʼaanunkil re naq teʼxkubʼsi xtzʼaq li naʼaj. Jun sut keʼxkubʼsi 30% li xtzʼaq. Chi joʼkan kikolmank rix 1,711 dólar. Saʼ wiibʼ oxibʼ li naʼaj re Mozambique keʼxkubʼsi xtzʼaq saʼ xkʼabʼaʼ naq nawbʼil naq ebʼ laj testiiw re li Jehobʼa inkʼaʼ nekeʼelqʼak ut tzʼaqal saʼ xhoonalil nekeʼtojok.

Ebʼ li hermaan nekeʼbʼanyoxink

Ebʼ li hermaan xeʼxbʼanyoxi naq xeʼruuk rilbʼal malaj rabʼinkil li nimla chʼutam saʼebʼ li kʼanjelobʼaal aʼin. Laj Patrick, jun li cheekel winq re Malaui, kixye: «Naqabʼanyoxi re li Nekeʼjolomink re Xmolam li Jehobʼa naq keʼxbʼaanu li naʼlebʼ aʼin chiru li nimla yajel». Laj Isaac, jun chik li hermaan re Malaui, kixye: «Maakʼaʼ jalan chik qakʼanjelobʼaal. Joʼkan naq jwal naqabʼanyoxi naq xooruuk rabʼinkil li nimla chʼutam re oxibʼ kutan saʼ li raay. Aʼin jun li loqʼlaj maatan li kixkʼe qe li xmolam li Jehobʼa. Saʼ xkʼabʼaʼ aʼin, chixjunil linjunkabʼal kixtaw rusilal li nimla chʼutam. Aʼin kixkʼutbʼesi chiqu naq li Jehobʼa naxra li xtenamit».

Saʼ li chihabʼ 2020 jun aj puktesinel re Mozambique kiwulak xbʼeen sut saʼ li nimla chʼutam re oxibʼ kutan. Aʼan kixye: «Rilbʼal li nimla chʼutam saʼ li kaaxmu kixkʼutbʼesi chiwu naq li Jehobʼa aʼan li Yos li jwal wank xwankil. Li COVID-19 moko kixram ta chiru li Jehobʼa xkʼebʼal li naʼlebʼ li naxkawresi li qapaabʼal usta wanko saʼ li qochoch. Xwil chi tzʼaqal re ru naq ebʼ laj kʼanjel chiru li Jehobʼa qʼaxal nekeʼxra ribʼ ut chʼolchʼo chiwu naq aweʼ li tzʼaqal paabʼal».

Laj Wyson jun li cheekel winq naxye: «Nawaj xbʼanyoxinkil re li moosej tiik xchʼool ut wank xnaʼlebʼ naq jwal kixkʼe xchʼool chiqix saʼ li nimla yajel. Bʼabʼay ajwiʼ li kʼaru wank qe ut wanko saʼ jun li teep bʼarwiʼ jwal wank li nebʼaʼil. Abʼan, xqataw rusilal li nimla chʼutam xbʼaan naq xooruuk rilbʼal ut rabʼinkil saʼ kaaxmu ut saʼ raay».

Li chʼuut li naril li chaqʼrabʼ ut li rahilal ut li naril li natzolmank kixkʼulubʼa naq tnumsimanq wiʼ chik li nimla chʼutam saʼ li kaaxmu ut saʼ raay saʼ wiibʼ oxibʼ li naʼajej. Chanru natojmank aʼin? Rikʼin li tenqʼ tumin li nakʼemank saʼ li kʼanjel re chixjunil li ruuchichʼochʼ rikʼin li jalan jalanq chi naʼlebʼ li natawmank saʼ donate.jw.org. Naqabʼanyoxi eere li tenqʼ tumin li nekeekʼe chi anchal eechʼool.