Li Jesus naxkʼut tijok chiruhebʼ li xtzolom

Chixjunil li nekeʼxbʼaanu chaq laj Pariseey nekeʼxbʼaanu yal re xnimankil ribʼebʼ chiruhebʼ li poyanam. Nekeʼxbʼaanu li us yal re, naq teʼileʼq. Joʼ naq nekeʼtijok saʼebʼ li bʼe re naq chixjunilebʼ teʼiloq rehebʼ. Nekeʼxtzol ebʼ li tij najt roq ut nekeʼxye saʼebʼ li chʼutlebʼaal ut saʼebʼ li bʼe re naq teʼabʼiiq. Joʼkan naq ebʼ li poyanam keʼsachk xchʼool naq li Jesus kixye: «Mattijok joʼebʼ laj Pariseey. Aʼanebʼ nekeʼxkʼoxla naq tsachq xchʼool li Yos wi nekeʼroksi naabʼal li aatin, abʼan aʼin moko yaal ta. Li tijok aʼan naq tat-aatinaq laaʼat ut li Jehobʼa. Moko yal jun ta chi aatin yalyoqat xyeebʼal. Li Jehobʼa naraj naq taaye re chi tzʼaqal chanru nakaawekʼa aawibʼ».

Li Jesus inkʼaʼ kixkanabʼ xchʼolobʼankil chanru teʼtijoq: «At Qayuwaʼ li wankat saʼ choxa, santobʼresinbʼil taxaq laakʼabʼaʼ. Chichalq ta Laanimajwal Awabʼejilal. Chiʼuxq ta laawajom, joʼ naʼuxk saʼ choxa, arin ajwiʼ saʼ Ruuchichʼochʼ». Chirix chik aʼan li Jesus kixye naq teʼtijoq chirix li tzakahemq re li kutan ut chirix li maak, ut chirix jalan chik li naʼlebʼ.

Joʼkan ajwiʼ, li Jesus kixye: «Maakanabʼ tijok. Maakanabʼ xpatzʼbʼal re Laayuwaʼ, Jehobʼa, naq tixkʼe aawe li us. Chixjunilebʼ li naʼbʼej yuwaʼbʼej nekeʼraj xkʼebʼal li us rehebʼ li ralal xkʼajol. Wi laawalal tixpatzʼ xwa aawe, ma taakʼe re junaq pek? Ut wi tixpatzʼ xkar, ma taakʼe re junaq kʼantiʼ?».

Tojaʼ naq li Jesus kixchʼolobʼ kʼaru tooruuq xtzolbʼal chirix li tojaʼ tixye: «Wi laaʼat nakaanaw xkʼebʼal chaabʼil maatan rehebʼ laakokʼal, chanru naq Laayuwaʼ, Jehobʼa, inkʼaʼ tixkʼe aawe li santil musiqʼej! Kaʼajwiʼ taatzʼaama chiru ut tixkʼe aawe». Ma nakaabʼaanu li kixye li Jesus? Kʼaru nakaapatzʼ re li Jehobʼa naq nakattijok?