Nekeʼxchap li Jesus

Li Jesus ut ebʼ li Apostol xkohebʼ saʼ li tzuul Olivo ut keʼnumeʼk junpakʼal li haʼ Cedron. Ak xqʼax ru xyiijachil li qʼoqyink ut yook chi xorok li po. Naq keʼwulak saʼ li naʼaj Getsemani, li Jesus kixye: «Kanaqex arin ut mexwark». Tojaʼ naq li Jesus kinajtoʼk bʼayaq chiruhebʼ ut kixwiqʼibʼ ribʼ. Kʼajoʼ li xkʼaʼuxl ut kitijok chiru li Jehobʼa: «Chiʼuxq laawajom». Tojaʼ naq li Jehobʼa kixtaqla jun li anjel re xkawresinkil xchʼool. Moqon chik, li Jesus kisutqʼiik bʼarwiʼ wank oxibʼ rehebʼ li Apostol ut kixtawebʼ chi wark. Joʼkan naq kixye rehebʼ: «Waklinqex! Aʼin moko xhoonalil ta wark. Xwulak xhoonalil re naq tinqʼaxtesiiq saʼ ruqʼebʼ li xikʼ nekeʼilok we».

Saʼ li hoonal ajwiʼ aʼan kiwulak laj Judas, rochbʼen jun chʼuut chi winq li wankebʼ rikʼin jutzʼchʼiichʼ ut cheʼ. Naxnaw bʼar tixtaw xbʼaan naq naabʼal sut kiwulak rochbʼen li Jesus ut ebʼ li Apostol saʼ li naʼaj aʼin. Laj Judas ak kixye rehebʼ laj puubʼ naq tixkʼut chiruhebʼ ani li Jesus. Tiik xkoho bʼarwiʼ wank li Jesus ut kixye re: «Sa laachʼool, Tzolonel», ut xtzʼubʼ ru. Li Jesus kixye re: «Judas, ma rikʼin xtzʼubʼal wu nikinaaqʼaxtesi?».

Li Jesus kixkʼe jun xyok chiru ut kixpatzʼ rehebʼ li winq: «Ani nekeesikʼ?». Aʼanebʼ keʼxye re: «Aʼ li Jesus laj Nazaret». Aʼan kixye rehebʼ: «Laaʼin». Tojaʼ naq, ebʼ li winq keʼqʼajk chirixebʼ ut keʼtʼaneʼk chiru chʼochʼ. Li Jesus kixpatzʼ wiʼ chik rehebʼ: «Ani nekeesikʼ?». Ut ebʼ aʼan keʼxye wiʼ chik: «Aʼ li Jesus laj Nazaret». Li Jesus kixye rehebʼ: «Ak xinye eere naq laaʼin. Joʼkan naq kanabʼomaqebʼ chi xik ebʼ li winq aʼin».

Naq laj Pedro kiril li yook chi kʼulmank, kirisi jun li chʼiichʼ ut kixchʼot li xxik laj Malco, xmoos li xyuwaʼil aj tij. Abʼan li Jesus kixchʼeʼ li xxik ut kixkʼirtasi. Ut kixye re laj Pedro: «Xok laachʼiichʼ. Xbʼaan naq wi tatyaloq rikʼin chʼiichʼ, rikʼin chʼiichʼ tatkamq». Ebʼ laj puubʼ keʼxchap li Jesus ut keʼxbʼakʼ li ruqʼ, ut ebʼ li Apostol keʼelelik. Moqon chik, ebʼ li poyanam keʼxkʼam li Jesus rikʼin laj Anas, li xbʼeenil aj tij. Aʼan kixbʼaanu ebʼ li patzʼom re li Jesus ut kixtaqla saʼ rochoch laj Caifas, li xyuwaʼil aj tij. Abʼan, kʼaru kikʼulmank rikʼinebʼ li Apostol?