Li Yos naxyobʼtesi li xbʼeen winq ut ixq

Li Jehobʼa kixyiibʼ xnaʼaj li uutzʼuʼuj saʼ jun li naʼaj li naxkʼabʼaʼi Eden. Saʼ li naʼaj aʼin wank chaq naabʼal li uutzʼuʼuj, ninqi cheʼ ut xul. Chirix chik aʼan, li Yos kixyobʼtesi laj Adan, li xbʼeen winq. Kixyiibʼ rikʼin chʼochʼ tojaʼ naq kirapu saʼ ruʼuj. Ma nakaanaw kʼaru xkʼulmank moqon? Li winq kiwank xyuʼam. Li Jehobʼa kixye re laj Adan naq tril li naʼaj aʼin ut tixkʼe xkʼabʼaʼ chixjunilebʼ li xul.

Li Jehobʼa kixye re laj Adan jun li nimla naʼlebʼ: «Naru nakaalow li ru yalaq kʼaru chi cheʼ, abʼan jun ajwiʼ inkʼaʼ taachʼeʼ, oxloqʼ ru. Wi taalow ru li cheʼ aʼin, tatkamq».

Moqon chik, li Jehobʼa kixye: «Tinyobʼtesi aj tenqʼahom re laj Adan». Joʼkan naq, kixwartesi ut kiroksi jun rehebʼ li xkostiiy re xyobʼtesinkil li rixaqil. Eva xkʼabʼaʼ. Laj Adan ut xʼEva aʼanebʼ li xbʼeen junkabʼal. Chanru kirekʼa ribʼ laj Adan naq kiril li rixaqil? Kʼajoʼ kisahoʼk saʼ xchʼool ut kixye: «Il li kixbʼaanu li Jehobʼa rikʼin jun rehebʼ linkostiiy! Joʼ nawil, chanchan joʼ laaʼin!».

Li Jehobʼa kixye re laj Adan ut xʼEva naq teʼwanq naabʼal ralal xkʼajol ut teʼxnujobʼresi li Ruuchichʼochʼ. Kiraj naq sahaqebʼ saʼ xchʼool chi xchʼinaʼusinkil li Ruuchichʼochʼ. Chanchan raj xnaʼaj ebʼ li uutzʼuʼuj, joʼ li Eden. Abʼan, moko joʼkan ta xkʼulmank. Kʼaʼut? Tqil saʼ li jun chik tzolom.