Laj Pablo ut laj Timoteo

Laj Timoteo aʼan jun li saaj aj paabʼanel re li chʼuut re Listra. Li xyuwaʼ aj Griego, ut li xnaʼ aj Judiiy. Li xʼEunice aʼan li xnaʼ, ut li xLoida aʼan li xnaʼchin. Aʼanebʼ keʼxkʼut chiru laj Timoteo chirix li Jehobʼa chalen saʼ xkachʼinal.

Naq laj Pablo kiwulak Listra, aʼin li xkabʼ sut naq xkoho chi puktesink, aran kixkʼe reetal naq laj Timoteo naxra tzʼaqal ebʼ li hermaan ut junelik naraj xtenqʼankilebʼ. Joʼkan naq laj Pablo kixbʼoq laj Timoteo chirix. Saʼ xnumikebʼ ru li kutan, laj Pablo kixkawresi laj Timoteo re naq tixtzol kʼutuk chiʼus ut xpuktesinkil li chaabʼil esil chirix li Yos.

Li santil musiqʼej naxkʼut xbʼe laj Pablo ut laj Timoteo yalaq bʼar nekeʼxik. Saʼ jun qʼoqyink, laj Pablo kiril jun li moy u. Kiril naq jun li winq yook xyeebʼal re, naq txik Macedonia chi xtenqʼankilebʼ. Joʼkan naq laj Pablo, laj Timoteo, laj Silas ut laj Lucas xkohebʼ aran chi puktesink ut chi xxaqabʼankil ebʼ li chʼuut.

Saʼ li tenamit Macedonia re Tesalonica, naabʼal ebʼ li winq ut ebʼ li ixq keʼok choʼq aj paabʼanel. Abʼan wankebʼ laj Judiiy nekeʼxkaqali laj Pablo ut ebʼ li ramiiw. Keʼxchʼutubʼ naabʼal li poyanam li maaʼusebʼ xnaʼlebʼ ut keʼxjukuki ebʼ li hermaan rikʼinebʼ li wankebʼ xwankil saʼ li tenamit. Ebʼ laj Judiiy japjokebʼ re chi xyeebʼal: «Ebʼ li winq aʼin xikʼ nekeʼril li xʼawabʼejilal li tenamit Roma!». Li xyuʼam laj Pablo ut laj Timoteo wank saʼ chʼaʼajkilal, joʼkan naq keʼelelik ut xkohebʼ Berea chiru qʼoqyink.

Ebʼ li wankebʼ Berea nekeʼraj chaq rabʼinkil li chaabʼil esil chirix li Yos, ut naabʼalebʼ laj Griego ut ebʼ laj Judiiy keʼok chi paabʼank. Abʼan wankebʼ laj Judiiy re Tesalonica keʼchalk chi yoobʼank chʼaʼajkilal. Joʼkan naq, laj Pablo xkoho Atenas. Laj Timoteo ut laj Silas keʼkanaak Berea chi xkawresinkil xchʼool ebʼ li hermaan. Moqon chik, laj Pablo kixtaqla wiʼ chik laj Timoteo saʼ li tenamit Tesalonica re xtenqʼankil ebʼ li hermaan chi xkuybʼal li rahobʼtesink li yook chi kʼulmank aran. Chirix chik aʼan, laj Pablo kixtaqla laj Timoteo chi rulaʼaninkil ut xkawresinkil naabʼalebʼ li chʼuut.

Laj Pablo kixye re laj Timoteo: «Li teʼraj kʼanjelak chiru li Jehobʼa teʼrahobʼtesiiq». Laj Timoteo kirahobʼtesiik ut kikʼeheʼk ajwiʼ saʼ tzʼalam saʼ xkʼabʼaʼ li xpaabʼal. Abʼan laj Timoteo sa chaq saʼ xchʼool xbʼaan naq chi joʼkan tixkʼutbʼesi naq inkʼaʼ naxtzʼeqtaana li Jehobʼa.

Laj Pablo kixye rehebʼ laj Filipenses: «Tintaqla eerikʼin laj Timoteo. Aʼan tixkʼut cheeru chanru texwanq junelik saʼ xbʼehil li yaal ut chanru texpuktesinq». Laj Pablo naxnaw naq laj Timoteo tixbʼaanu chiʼus li xkʼanjel. Chiru naabʼal chihabʼ keʼkʼanjelak saʼ wiibʼal chiru li Yos ut keʼwank saʼ amiiwil.