Laj Juan naril ebʼ li moy u

Naq li Apostol Juan wank chaq saʼ tzʼalam saʼ Patmos, li naʼaj li sutsu chi haʼ, li Jesus kixkʼut chiru 16 li moy u malaj li kʼutbʼesink chirix li kutan chaalel. Aran laj Juan kiril chanru tsantobʼresiiq li xkʼabʼaʼ li Jehobʼa, chanru tchalq li Xʼawabʼejilal ut chanru t-uxq li rajom arin saʼ Ruuchichʼochʼ joʼ saʼ choxa.

Saʼ jun li moy u, laj Juan naril li Jehobʼa saʼ li xkʼojaribʼaal aran saʼ choxa. Saʼ xsutam wank 24 chi cheekel winq. Wank saqi tʼikr chirixebʼ ut sutsu chi oor li xjolomebʼ. Saʼ li kʼojaribʼaal naʼelk chaq chanchan ruqʼ raqʼ kaaq ut li xyaabʼ chanchan kaaq. Ebʼ li 24 chi cheekel winq nekeʼxwiqʼibʼ ribʼ chiru li Jehobʼa ut nekeʼxloqʼoni ru. Saʼ jun chik li moy u, laj Juan naril jun tuubʼ chi poyanam re chixjunil ebʼ li tenamit, kʼalebʼaal ut aatinobʼaal, li naxloqʼoni li Jehobʼa. Li Jesus li karneer narilebʼ ut naxkʼamebʼ saʼ xhaʼil li yuʼam. Moqon chik, naril naq li Jesus naʼok chi jolomink joʼ awabʼej saʼ choxa rochbʼen li 24 chi cheekel winq. Saʼ li jun chik moy u, laj Juan naril naq li Jesus yook chi yalok u rikʼin laj Tza li nimla kʼantiʼ, ut ebʼ li maaʼus aj musiqʼej. Li Jesus narisihebʼ saʼ choxa ut naxkutebʼ saʼ Ruuchichʼochʼ.

Chirix chik aʼan, laj Juan naril jun li chʼinaʼusil moy u chirix li Karneer ut li 144.000 xaqxokebʼ saʼ li tzuul Sion. Naril ajwiʼ naq jun li anjel yook chi xikʼank saʼ chixjunil li ruuchichʼochʼ ut naxye: «Teeloqʼoni li Yos ut teekʼe xloqʼal».

Saʼ jun chik li moy u, naril li yalok u Armagedon. Saʼ li yalok aʼin, li Jesus ut ebʼ li rochbʼen nekeʼxqʼax li ruuchichʼochʼ li naxjolomi laj Tza. Saʼ raqik, laj Juan kiril naq chixjunilebʼ saʼ choxa ut saʼ ruuchichʼochʼ wankebʼ saʼ junajil ut saʼ tuqtuukilal. Kiril ajwiʼ li rosoʼjik laj Tza ut li nekeʼtaqenk re. Saʼ choxa ut saʼ ruuchichʼochʼ, chixjunilebʼ nekeʼril joʼ saant li xkʼabʼaʼ li Jehobʼa ut kaʼajwiʼ aʼan nekeʼxkʼe xloqʼal.