Ma nekeʼxjach li junkabʼal ebʼ laj Testiiw malaj nekeʼxbʼaanu naq teʼwanq saʼ junajil?

Ebʼ laj testiiw re li Jehobʼa naqayal qaqʼe re naq li qajunkabʼal ut ebʼ li junchʼol chi paabʼal teʼwanq saʼ junajil. Oxloqʼ chiqu li junkabʼal xbʼaan naq li Yos kixaqabʼank re (Génesis 2:​21-​24; Efesios 3:​14, 15). Saʼ li Santil Hu natawmank li naʼlebʼ li natenqʼank re naq li junkabʼal teʼwanq saʼ junajil ut saʼ sahil chʼoolejil.

Kʼaru nekeʼxbʼaanu ebʼ laj Testiiw re xkawubʼresinkil li junkabʼal?

Naqayal qaqʼe re xyuʼaminkil li naʼlebʼ li naxkʼe li Santil Hu xbʼaan naq aʼin nokooxtenqʼa re naq chaabʼilaq li qanaʼlebʼ joʼ bʼeelomej, ixaqilbʼej ut naʼbʼej yuwaʼbʼej (Proverbios 31:10-​31; Efesios 5:⁠22–​6:4; 1 Timoteo 5:8). Li Santil Hu naxtenqʼa ajwiʼ ebʼ li junkabʼal li moko juntaqʼeetebʼ ta xpaabʼal (1 Pedro 3:​1, 2). Tzol kʼaru kixbʼaanu jun li ixaqilbʼej ut jun li bʼeelomej naq li xsumʼaatin kiʼok joʼ aj testiiw re li Jehobʼa:

• «Li xbʼeen waqibʼ chihabʼ re li qasumlajik moko sa ta qachʼool xbʼaan naq junelik naqachoqi qibʼ. Abʼan naq li xʼIvete kiʼok joʼ aj Testiiw kixtzol li rahok ut li kuyuk ut chi joʼkan kixkol li qasumlajik» (Laj Clauir, re Brasil).

• «Naq laj Chansa, linbʼeelom kiʼok joʼ aj Testiiw inkʼaʼ xwulak chiwu xbʼaan naq ninkʼoxla naq ebʼ laj Testiiw nekeʼxjukʼ li junkabʼal. Abʼan xinkʼe reetal naq li Santil Hu xooxtenqʼa saʼ li qasumlajik» (Li xʼAgness, re Zambia).

Naq nokoopuktesink naqakʼut rehebʼ li qechkabʼal chanru li Santil Hu natenqʼank saʼ li naʼlebʼ aʼin:

• Chanru taakawresi aawibʼ wi taawaj sumlaak

• Chanru tatwanq saʼ usilal rikʼinebʼ laakomon

• Chanru roksinkil li tumin

• Kʼaru teebʼaanu re naq teekanabʼ xchoqinkil eeribʼ

• Chatkuyuq maak

• Chanru xtijbʼalebʼ li kokʼal

Ma naxkʼam chaq chʼaʼajkilal naq naxjal xpaabʼal jun rehebʼ li sumal?

Wank sut joʼkan nakʼulmank. Li molam Sofres li kixtzʼil rix aʼin saʼ li chihabʼ 1998 kixye naq saʼ xyanq junmay li sumsukebʼ jun rehebʼ kixtaw xchʼaʼajkilal naq li xsumal kixjal xpaabʼal.

Li Jesús kixye naq wank sut ebʼ li xtzolom teʼxtaw li chʼaʼajkilal saʼ li xjunkabʼal (Mateo 10:32-​36). Laj Will Durant li naxtzʼil rix li kikʼulmank chaq kixye, chalen chaq naq ebʼ li kristiʼaan «keʼok xpaabʼankil li Kriist xeʼxkʼul naabʼal li chʼaʼajkilal saʼ li xjunkabʼal».a Wankebʼ li kristiʼaan li nekeʼxye naq joʼkan ajwiʼ nekeʼxbʼaanu ebʼ laj Testiiw saʼebʼ li qakutan. Abʼan, ma yaal aʼin?

Naq kiraqok aatin chirix aʼin, li Nimla Raqlebʼaal li wank Europa li naxkol li xkʼulubʼebʼ li kristiʼaan kixye naq li chʼaʼajkilal naxkʼam chaq li kristiʼaan li inkʼaʼ naraj wank joʼ aj Testiiw «xbʼaan naq moko naxkʼulubʼa ta naq li xkomon wank xkʼulubʼ chi xyuʼaminkil li paabʼal li naraj». Li Raqlebʼaal kixye ajwiʼ: «Wank li chʼaʼajkilal naq li bʼeelomej ut li ixaqilbʼej moko juntaqʼeetebʼ ta xpaabʼal».b Usta joʼkan nakʼulmank ebʼ laj testiiw re li Jehobʼa nekeʼxyuʼami li naʼlebʼ aʼin: «Maaʼani chereeqajun wiʼ li raaxiikʼ rikʼin raaxiikʼ […]. Wi naru xbʼaanunkil, chexwanq saʼ usilal rikʼinebʼ chixjunil» (Romanos 12:17, 18, Li Santil Hu, Sociedad Bíblica de Guatemala, SBG).

Kʼaʼut naq ebʼ laj Testiiw nekeʼsumlaak kaʼajwiʼ rikʼinebʼ li rech aj paabʼanel?

Xbʼaan naq li Santil Hu naxye naq kaʼajwiʼ toosumlaaq «joʼ naraj li Qaawaʼ» li naraj xyeebʼal, kaʼajwiʼ rikʼin li qech aj paabʼanel (1 Corintios 7:​39, SBG). Li taql aʼin naxkʼam chaq rusilal saʼ li qayuʼam. Li hu Journal of Marriage and Family li kiʼelk saʼ li chihabʼ 2010 kixye «naq ebʼ li sumal li juntaqʼeetebʼ xpaabʼal» sahebʼ saʼ xchʼool saʼ xsumlajik.c

Abʼanan ebʼ laj Testiiw moko nekeʼxye ta re li rech aj paabʼanel naq tixkanabʼ li xbʼeelom malaj li rixaqil wi maawaʼ aj Testiiw. Li Santil Hu naxye: «Wi junaq aj paabʼanel wank rixaqil maakʼaʼ xpaabʼaal ut aʼin naxkʼul ru wank rikʼin, mixkanabʼ li rixaqil. Ut wi junaq ixq wank xbʼeelom maakʼaʼ xpaabʼaal ut aʼin naxkʼul ru wank rikʼin, mixkanabʼ li xbʼeelom» (1 Corintios 7:​12, 13, SBG). Laaʼo ajwiʼ naqayuʼami li chaqʼrabʼ aʼin.