Xeʼxsume chixjunil linpatzʼom rikʼin li Santil Hu

LI XINKʼUL CHAQ:

Xinyoʼlaak saʼ Galicia, jun li kʼalebʼaal re España. Linnaʼ xwank waqxaqibʼ li xkokʼal, laaʼin li xka ut sa chaq saʼ qachʼool. Saʼebʼ li kutan aʼan ak re naq jun rehebʼ li junkabʼal ttzoloq rikʼinebʼ laj katoolk. Saʼ li qajunkabʼal oxibʼ qe xootzʼaqonk rikʼinebʼ.

Naq wank 13 chihabʼ we xkohin saʼ xyanqebʼ li moonj bʼarwiʼ wank chaq linchaqʼ saʼ Madrid. Chʼaʼaj li wanjik aran xbʼaan naq moko naru ta naq wank laawamiiw, junes tijok taabʼaanu ut ak xaqabʼanbʼil li chaqʼrabʼ li tento taapaabʼ. Rajlal eqʼla nokooxik saʼ li iklees re kʼoxlak chirix li Yos, abʼan laaʼin saʼ junpaat naxik inchʼool chirix junaq chik li naʼlebʼ. Moqon nokoobʼichank ut nokooxik saʼ li miix. Maakʼaʼ nintaw ru xbʼaan naq nabʼaanumank saʼ li aatinobʼaal latín, xwekʼa naq najt wank li Yos wikʼin. Aran inkʼaʼ naru nokooseeraqʼik. Naq naqataw qibʼ rikʼin linchaqʼ, kaʼajwiʼ naqaye oxibʼ li aatin re xkʼebʼal xloqʼal li xMaría. Kaʼajwiʼ naru nokooʼaatinak mero hoor. Jalan linwanjik arin chiru naq xinwank chaq saʼ li wochoch! Junelik ninyaabʼak.

Naq wank 17 chihabʼ we, xinkʼe li waatin ut xinʼok joʼ moonj, usta najt nawekʼa wibʼ rikʼin li Yos. Xinbʼaanu aʼin xbʼaan naq maakʼaʼ chik xjalenkil, abʼan xinʼok xkʼoxlankil ma relik chi yaal xsikʼeʼk wu xbʼaan li Yos re naq tinʼoq joʼ jun li moonj. Ebʼ li junchʼol chik chi moonj nekeʼxye naq li nawiibʼank xchʼool txik saʼ xbʼalbʼa! Abʼan, laaʼin toj yook inkʼaʼuxl. Ninnaw naq li Jesús inkʼaʼ narisi ribʼ xjunes, junelik yook xyeebʼal li yaal ut xtenqʼankilebʼ li junchʼol (Mateo 4:23-25). Naq wank 20 chihabʼ we moko chʼolchʼo ta chik chiwu wi tinwanq joʼ jun li moonj. Li moonj li nataqlank saʼ qabʼeen kixye naq wi toj nawiibʼank laachʼool, li us taabʼaanu aʼan xkanabʼankil li naʼaj ut aʼan xinbʼaanu. Kiʼok tana xxiw naq tinjal xnaʼlebʼ ebʼ li junchʼol.

Linnaʼ linyuwaʼ sa xineʼxkʼul, abʼan xbʼaan naq maakʼaʼ li kʼanjel aran, xkohin Alemania occidental, bʼarwiʼ wank chaq jun li wiitzʼin. Aʼan wank saʼ jun li chʼuut rehebʼ aj España li xeʼqʼaxonk Alemania. Sa nawekʼa wank saʼ xyanqebʼ xbʼaan naq nekeʼxsikʼ naq sa teʼileʼq ebʼ laj kʼanjel ut naq juntaqʼeet teʼileʼq li ixq. Joʼkan naq xintzʼaqonk saʼ xyanqebʼ, moqon xinsumlaak rikʼin jun rehebʼ. Sa nawekʼa wibʼ xbʼaan naq ninjekʼi ebʼ li hu ut ninʼelk chi bʼeek saʼ bʼe re aatinak chirix li chʼuut aʼin.

Abʼan, inkʼaʼ chik sa nawekʼa wibʼ rikʼinebʼ xbʼaan naq xinkʼe reetal naq inkʼaʼ nekeʼxyuʼami li nekeʼxkʼut. Toj joʼkan nawekʼa wibʼ naq wiibʼ oxibʼ li saaj saʼ li qachʼuut xeʼxkʼat li consulado español saʼ Fráncfort, Alemania. Xeʼxbʼaanu aʼin xbʼaan naq inkʼaʼ nekeʼwulak chiru chanru yook chi taqlank li awabʼej re España. Ninkʼoxla naq moko joʼkan ta raj xeʼxkʼutbʼesi naq yookebʼ xjosqʼil.

Naq xyoʼlaak li xbʼeen linyum, xinye re linbʼeelom naq inkʼaʼ chik tinxik saʼ li chʼuut. Injunes xwekʼa wibʼ, xbʼaan naq maaʼani xʼulaʼanink we rochbʼen linyum. Xinʼok xkʼoxlankil, kʼaru aj e naq wanko arin? Ma wank tawiʼ rusilal xchaabʼilobʼresinkil li ruuchichʼochʼ aʼin?

CHANRU KIXJAL LINYUʼAM LI SANTIL HU:

Saʼ li chihabʼ 1976, jun sumal laj testiiw re li Jehobʼa re España xineʼrulaʼani saʼ wochoch ut xeʼxkanabʼ wiibʼ oxibʼ ebʼ li xtasal hu. Naq xeʼsutqʼiik wiʼ chik, xinbʼaanu naabʼal li patzʼom rehebʼ, xsach inchʼool chi rilbʼal naq xeʼxsume chixjunil linpatzʼom rikʼin li Santil Hu. Saʼ li hoonal ajwiʼ aʼan xinkʼulubʼa xtzolbʼal li Santil Hu rikʼinebʼ.

Xinʼok chi tzolok, yal re xnawbʼal kʼaru nekeʼxbʼaanu, abʼan aʼin kijalaak naq rochbʼen linbʼeelom xooʼok chi xik saʼebʼ li chʼutam rehebʼ laj Testiiw. Saʼ li hoonal aʼan ak wiibʼ chik li qakokʼal. Ebʼ laj Testiiw nekeʼnumeʼk qaxokbʼal re xik saʼebʼ li chʼutam ut nokooʼeʼxtenqʼa chi rilbʼal ebʼ li qakokʼal. Sa chik nawekʼa wibʼ wank saʼ xyanqebʼ.

Toj naʼok inkʼaʼuxl chirix li paabʼal. Saʼ jun kutan naq xkohin rulaʼaninkil ebʼ linyuwaʼ saʼ España, jun rehebʼ li wikan, aj kʼamolbʼe rehebʼ laj katoolk, kixyal inqʼunbʼesinkil re naq tinkanabʼ xtzolbʼal li Santil Hu rikʼinebʼ, abʼan ebʼ laj Testiiw li wankebʼ aran xineʼxtenqʼa. Xeʼnaʼlebʼak joʼ xeʼxbʼaanu ebʼ li rech aj paabʼanel li wankebʼ Alemania. Naq xinsutqʼiik saʼ wochoch xinʼok wiʼ chik xtzolbʼal li Santil Hu. Usta linbʼeelom kixkanabʼ, laaʼin inkʼaʼ. Saʼ li chihabʼ 1978 xkubʼeek inhaʼ joʼ aj testiiw re li Jehobʼa.

KʼARU RUSILAL XINTAW:

Rikʼin xtzolbʼal li Santil Hu xintaw xyaalal linyuʼam. Jun eetalil, 1 Pedro 3:1-4, Li Santil Hu, Sociedad Bíblica de Guatemala, naxye rehebʼ li ixaqilbʼej naq teʼroxloqʼi ebʼ li xbʼeelom, xbʼaan naq «aʼan qʼaxal loqʼ chiru li Yos». Li naʼlebʼ aʼin ut jalan chik xinxtenqʼa re naq chaabʼilaqin joʼ ixaqilbʼej ut naʼbʼej.

Ak xnumeʼk 35 chihabʼ wokik joʼ aj testiiw re li Jehobʼa. Nasahoʼk saʼ inchʼool xloqʼoninkil ru li Jehobʼa rochbʼenebʼ li wechpaabʼanel saʼ chixjunil li ruuchichʼochʼ ut naq kaahibʼ rehebʼ linkokʼal yookebʼ ajwiʼ chi kʼanjelak chiru li Jehobʼa.