Kʼaʼut naq li Yos inkʼaʼ narisi li rahilal?

KʼARU NAREKʼA LI YOS NAQ NARIL NAQ WANKO SAʼ RAHILAL?

Michelle: Chanru wankat Sofía? Nasahoʼk inchʼool chaawilbʼal.

Sofía: Sa ajwiʼ inchʼool chaawilbʼal.

Michelle: Naq xinkʼulunk xooʼaatinak chirix kʼaru narekʼa li Yos naq naril naq wanko saʼ rahilal. Laaʼat xaaye we naq nakaakʼoxla ajwiʼ li patzʼom aʼan ut nakaabʼaanu li patzʼom aʼin chalen naq xtochʼ ribʼ laanaʼ. Yalaq ajwiʼ, chan chik ru wank laanaʼ?

Sofía: Wank kutan sa narekʼa ribʼ ut wank sut inkʼaʼ, abʼan anaqwan sa xchʼool.

Michelle: Us nawabʼi. Chʼaʼaj tana naq sahaq laachʼool naq yookat xnumsinkil li rahilal joʼ aʼan.

Sofía: Joʼkan, wank sut ninkʼoxla joʼkʼihal chik li rahilal tqakʼul.

Michelle: Moko maak ta kʼoxlak chi joʼkan. Saʼ li junsut naq xooʼaatinak, xinkanabʼ aawe li patzʼom kʼaʼut naxkanabʼ li Yos naq toj wank li rahilal wi wank xwankil re risinkil.

Sofía: Heeheʼ, jultik we.

Michelle: Tqil li naxye li Santil Hu, abʼan xbʼeenwa qajultikaq li xqaye naq xooʼaatinak.

Sofía: Us.

Michelle: Xqatzol naq jun chaabʼil winq li wank resil saʼ li Santil Hu kixpatzʼ ajwiʼ kʼaʼut naq li Yos naxkanabʼ naq tqakʼul li rahilal, abʼan li Yos moko kixchʼila ta chi moko kixye re naq moko kaw ta li xpaabʼal.

Sofía: Yaal, aʼin inkʼaʼ raj ninnaw.

Michelle: Xqatzol ajwiʼ naq li Jehobʼa inkʼaʼ nawulak chiru naq wanko saʼ rahilal. Li Santil Hu naxye naq junxil naq kiril li xrahilal li xtenamit «kiyotʼeʼk xchʼool li qaawaʼ xbʼaan li rahilal li yookebʼ chi xkʼulbʼal».a Peʼyaal naq naxkʼojobʼ qachʼool xnawbʼal naq nayotʼeʼk xchʼool li Yos chiqix?

Sofía: Yaal.

Michelle: Joʼkan bʼiʼ, xqatzol naq li Yos nim xwankil ut yalaq joqʼe naru risinkil li rahilal.

Sofía: Wi li Yos wank xwankil, kʼaʼut inkʼaʼ narisi li rahilal? Inkʼaʼ nintaw ru aʼin.

ANI YOOK CHAQ XYEEBʼAL LI YAAL?

Michelle: Tqatikibʼ rilbʼal li naxye Génesis, li xbʼeen tasal li Santil Hu. Ma aawabʼihom chirix laj Adán, li xʼEva ut li ru li cheʼ li kiyeheʼk re naq inkʼaʼ teʼxchʼeʼ?

Sofía: Heeheʼ, joʼkan xeʼxkʼut chiwu. Xeʼyeheʼk re naq inkʼaʼ teʼxlow ru li cheʼ, abʼan aʼanebʼ inkʼaʼ xeʼabʼink.

Michelle: Abʼan qilaq kʼaʼut naq inkʼaʼ keʼabʼink, ma taawaj rilbʼal li naxye Génesis 3:1 toj 5, Li Santil Hu, Sociedad Bíblica de Guatemala, SBG? Aʼin naxchap ribʼ rikʼin li rahilal li naqakʼul.

Sofía: Us, naxye: «Li kʼantiʼ qʼaxal chik wank xnaʼlebʼ chiru chixjunilebʼ li xul kixyoobʼtesi li Qaawaʼ Yos. Ut aʼan kixye re li ixq: “Ma yaal naq li Yos xye eere naq inkʼaʼ naru teelow ruhebʼ li cheʼ li wankebʼ saʼ xnaʼaj li awimq?”. Kichaqʼok li ixq ut kixye: “Naru tqalow ruhebʼ li cheʼ li wankebʼ saʼ xnaʼaj li awimq. Kaʼajwiʼ li ru li cheʼ li wank saʼ xyi, kixye li Yos: «Meelow chi moko teechʼeʼ, xbʼaan naq wi teebʼaanu aʼan, texkamq»”. Kixye ut li kʼantiʼ re li ixq: “Inkʼaʼ. Moko texkamq ta. Naxnaw chi us li Yos naq saʼ li kutan teelow wiʼ li ru li cheʼ aʼan taatehonq xsaʼ leeru. Joʼkaqex chik li Yos; teenaw chik kʼaru li us ut li inkʼaʼ us”».

Michelle: Bʼanyox. Qatzʼilaq rix bʼayaq ebʼ li raqal aʼin. Xbʼeenwa naxye naq jun li kʼantiʼ kiraatina li xʼEva. Saʼ jalan chik xtasal li Santil Hu naxkʼut naq li kʼantiʼ aʼan laj Tza.b Laj Tza kixbʼaanu naq li kʼantiʼ t-aatinaq ut tixpatzʼ re li ixq kʼaru li chaqʼrabʼ kixkʼe li Yos chirix li cheʼ li kixye naq inkʼaʼ teʼxlow. Kʼaru kixye li Yos naq teʼxkʼul wi teʼxlow ru li cheʼ?

Sofía: Naq teʼkamq.

Michelle: Joʼkan tzʼaqal. Chirix chik aʼin, laj Tza kixyoobʼ jun li nimla tikʼtiʼ chirix li Yos. Il li kixye: «Inkʼaʼ. Moko texkamq ta». Kixqʼabʼa li Yos joʼ aj tikʼtiʼ!

Sofía: Aʼin maajunwa wabʼihom.

Michelle: Naq kixye naq aj tikʼtiʼ, laj Tza kixbʼaanu jun li patzʼom li elajik ttaweʼq ru xsumenkil. Ma nakaanaw kʼaʼut?

Sofía: Mmm... Moko ninnaw ta.

Michelle: Qakʼehaq jun eetalil. Qakʼoxlaq naq saʼ jun kutan ninye aawe naq kaw inmetzʼew chaawu. Chanru taakʼutbʼesi naq moko yaal ta aʼin?

Sofía: Maare tqayal qametzʼew.

Michelle: Joʼkan tzʼaqal. Naru tqapaqo junaq li kʼaʼaq re ru li aal ut chi joʼkan tqakʼutbʼesi ani kaw ribʼ.

Sofía: Nintaw ru.

Michelle: Abʼanan, kʼaru tkʼulmanq wi moko kaʼaj tawiʼ tinye naq kaw wibʼ, tinye bʼan naq laaʼin maawaʼin aj tikʼtiʼ joʼ laaʼat? Peʼyaal naq jalan li naʼlebʼ aʼin?

Sofía: Heeheʼ.

Michelle: Li xchaabʼilal qanaʼlebʼ inkʼaʼ naqakʼutbʼesi rikʼin xkawilal qametzʼew.

Sofía: Yaal nakaaye.

Michelle: Moko saʼ junpaat ta taakʼutbʼesi naq chaabʼil laanaʼlebʼ saʼ xnumikebʼ li kutan ebʼ li junchʼol teʼxkʼe reetal chanru nakatnaʼlebʼak.

Sofía: Yaal aʼan.

Michelle: Qilaq wiʼ chik li naxye Génesis. Ma kixye laj Tza naq jwal kaw ribʼ chiru li Yos?

Sofía: Inkʼaʼ.

Michelle: Moko kichʼaʼajkoʼk ta raj chiru li Yos xkʼutbʼesinkil naq kaw ribʼ chiru laj Tza. Abʼan laj Tza kixye naq li Yos aj tikʼtiʼ. Chanchan tawiʼ naq kixye re li xʼEva: «Laaʼin yookin xyeebʼal aawe li yaal ut aʼan inkʼaʼ».

Sofía: Mas wiʼ chik kixye laj Tza.

Michelle: Xbʼaan naq wank xnaʼlebʼ li Yos, naxnaw naq tento tixkanabʼ naq teʼnumeʼq li kutan re xkʼutbʼesinkil ani yook chi tikʼtiʼik.

JUN LI NAʼLEBʼ LI WANK XWANKIL

Sofía: Abʼan naq kikamk li xʼEva kinawmank naq moko yook ta chi tikʼtiʼik li Yos, peʼyaal?

Michelle: Naru naqaye naq joʼkan. Abʼan moko kaʼaj tawiʼ chirix aʼin kiʼaatinak laj Tza, qilaq wiʼ chik li raqal 5. Kʼa chik ru kixye laj Tza re li xʼEva?

Sofía: Wi teʼxlow ru li cheʼ ttehonq saʼebʼ li ru.

Michelle: Yaal ut kixye ajwiʼ «joʼkaqex chik li Yos; teenaw chik kʼaru li us ut li inkʼaʼ us». Rikʼin aʼin yook xyeebʼal naq li Yos yook xrambʼal chiruhebʼ li kristiʼaan jun chaabʼil naʼlebʼ.

Sofía: Nintaw ru.

Michelle: Ut chirix chik aʼin yook ajwiʼ xqʼabʼankil li Yos.

Sofía: Chanru aʼan?

Michelle: Laj Tza kixye re li xʼEva naq us t-elq wi inkʼaʼ t-abʼinq chiru li Yos ut joʼkan ajwiʼ naraj naq ebʼ li poyanam teʼxkʼoxla. Li Yos naxnaw naq re xkʼutbʼesinkil naq laj Tza aj tikʼtiʼ tento tixkanabʼ naq laj Tza t-awabʼejinq saʼ xbʼeen li Ruuchichʼochʼ chiru jun kʼamokaq. Joʼkan naq wank naabʼal li chʼaʼajkilal xbʼaan naq laj Tza yook chi jolomink re li ruuchichʼochʼ ut maawaʼ li Yos.c Abʼan wank jun chik li chaabʼil esil li tinye aawe.

Sofía: Chaabʼil esil?

Michelle: Heeheʼ, li Santil Hu naxkʼut jun li chʼinaʼusil naʼlebʼ chirix li Yos. Naxye naq wank chiqakʼatq naq naqakʼul li chʼaʼajkilal. Qilaq li kixtzʼiibʼa li awabʼej David saʼ Salmo 31:8. Laj David kʼajoʼ li rahilal kixnumsi saʼ li xyuʼam. Abʼan, il li kixye re li Yos. Ma taawaj rilbʼal li raqal?

Sofía: Us, naxye: «Chisahoʼq linchʼool, chisahoʼq li waanm saʼ xkʼabʼaʼ xnimal laarahom. Laaʼat xawil naq qʼaxal xtoqʼobʼaal wu ut xanaw chixjunil li xrahil li waanm».

Michelle: Joʼkan bʼiʼ, usta laj David kixnumsi naabʼal li rahilal, kikʼojlaak xchʼool naq li Jehobʼa kixkʼe reetal chixjunil li xrahilal. Ut laaʼat, ma naxkʼojobʼ aachʼool xnawbʼal naq li Jehobʼa naril ut naxtaw ru chixjunil laarahilal usta ebʼ li junchʼol inkʼaʼ nekeʼxtaw ru?

Sofía: Kʼajoʼ naxkʼojobʼ inchʼool.

Michelle: Li Santil Hu naxye naq li Yos moko junelik ta tixkanabʼ naq tqakʼul li rahilal. Joʼkan ajwiʼ, naxkʼut naq chi seebʼ tixsach li xʼawabʼejilal laj Tza ut trisi li maaʼusilal li naxkʼam chaq. Joʼ li rahilal li xaakʼul laaʼat ut laanaʼ. Ma taawaj naq tinsutqʼiiq chaq saʼ li jun chik xamaan? Nawaj raj xkʼutbʼal chaawu kʼaʼut naq paabʼajel naq li Yos chi seebʼ trisi li rahilal.d

Sofía: Twulaq raj chiwu.