Ebʼ li Xchʼutlebʼaal Kabʼl laj Testiiw re li Jehobʼa naxkʼam li xkʼabʼaʼ li Yos. Joʼkan naq oxloqʼ chiqu xsaabʼesinkil ut xyiibʼankil, naqabʼaanu ajwiʼ re xloqʼoninkil ru li Yos. Ut chiqajunilo naru nokooʼokenk.

Nokooʼokenk chi xsaabʼesinkil Rochoch li Yos. Naq naraqeʼk li chʼutam, ebʼ laj paabʼanel winq joʼ ixq sahebʼ saʼ xchʼool chi xsaabʼesinkil li Chʼutlebʼaal Kabʼl. Ut jun sut chiru xamaan, nasaabʼesimank chixjunil li Chʼutlebʼaal Kabʼl. Wankebʼ li cheekel winq malaj aj tenqʼanel nekeʼroksi junaq li hu bʼarwiʼ naxchʼolobʼ chi tustu li kʼanjel li tbʼaanumanq re xsaabʼesinkil li Chʼutlebʼaal Kabʼl. Aʼ yaal chanru xnimal li kʼanjel, wank namesunk, wank namesok tzʼak, wank napuxink, wank naxtus ebʼ li chunlebʼaal, wank nachʼajok re li tzʼeqlebʼaal, wank naxmes ru li lem ut li bʼentaan, wank nakutuk re li mul, namesunk chirix kabʼl malaj naxmesu xnaʼaj li uutzʼuʼuj. Joʼkan ajwiʼ, jun sut chiru li chihabʼ tento xsaabʼesinkil chirix ut chisaʼ li Chʼutlebʼaal Kabʼl. Ut wi naqakʼehebʼ li qakokʼal chi tenqʼank, tqakʼut chiruhebʼ roxloqʼinkil li Rochoch li Yos (Eclesiastes 5:1).

Nokooʼokenk chi xyiibʼankil li napoʼeʼk saʼ Rochoch li Yos. Rajlal chihabʼ naʼilmank chisaʼ ut chirix li Chʼutlebʼaal Kabʼl re xnawbʼal ma wank yiibʼaak naraj. Wi wank yiibʼaak naraj, naqabʼaanu saʼ junpaat re naq inkʼaʼ tpoʼeʼq. Ut wi joʼkan tbʼaanumanq inkʼaʼ tsachmanq naabʼal tumin chirix (2 Cronicas 24:13; 34:10). Aajel ru naq saabʼesinbʼilaq ut chʼinaʼusaq li Chʼutlebʼaal Kabʼl xbʼaan naq aran naqaloqʼoni ru li Yos. Naq nokooʼokenk chi kʼanjelak saʼ li Chʼutlebʼaal Kabʼl, naqakʼutbʼesi naq naqara li Jehobʼa ut naq oxloqʼ chiqu li naʼaj bʼarwiʼ naqaloqʼoni ru (Salmo 122:1). Ut chi joʼkan, us teʼaatinaq chirix li qapaabʼal (2 Corintios 6:3).

• Kʼaʼut inkʼaʼ tqakanabʼ xsaabʼesinkil li Rochoch li Yos?

• Kʼaru tento xbʼaanunkil re naq junelik saqaq li Chʼutlebʼaal Kabʼl?

Ma twulaq raj chaawu xtzʼilbʼal rix junaq li naʼlebʼ re naq tnimanq laanawom chirix li Santil Hu? Ma taawaj raj nawbʼal chirix junaq li poyanam, li naʼaj, li raqal malaj junaq li naʼlebʼ li naxkʼe li Santil Hu? Ma nakaakʼoxla naq li Santil Hu truuq aatenqʼankil naq wanqat saʼ chʼaʼajkilal? Wi nakaakʼoxla naq li Santil Hu natenqʼank cholaawil li Rochochil Hu li wank saʼ li Chʼutlebʼaal Kabʼl.

Nakʼanjelak re xtzʼilbʼal rix junaq li naʼlebʼ. Maare moko wank ta aawikʼin chixjunil ebʼ li tasal hu li nekeʼxtzʼiibʼa saʼ laawaatinobʼaal ebʼ laj Testiiw re li Jehobʼa. Abʼan saʼ li Rochochil Hu li wank saʼ li Chʼutlebʼaal Kabʼl taataw naabʼal ebʼ li hu li tojaʼ ttzʼiibʼamanq xbʼaanebʼ laj Testiiw, ut maare taataw jalan jalanq chi Santil Hu, li tuslebʼaal aatin ut naabʼal chik li tasal hu. Tatruuq roksinkil ebʼ li tasal hu naq toj maajiʼ natiklaak li chʼutam, ut naq ak xraqeʼk li chʼutam. Ut wi wank junaq li ulul chʼiichʼ maare ak xkʼeemank chiru li Watchtower Library. Chisaʼ li kʼanjelobʼaal aʼin wank jalan jalanq li tasal hu ut naru nakaasikʼ junaq li naʼlebʼ, junaq li aatin, malaj junaq raqal li Santil Hu.

Nakʼanjelak chiruhebʼ li nekeʼnumeʼk saʼ li chʼutam Qayuʼam ut Qakʼanjel. Laaʼat naru nakaawoksi li Rochochil Hu li wank saʼ li Chʼutlebʼaal Kabʼl re xkubʼankil laakʼanjel. Li cheekel winq li naxjolomi li chʼutam Qayuʼam ut Qakʼanjel xaqabʼanbʼil chi rilbʼal kʼaru chi tasal hu naʼajmank saʼ li Rochochil Hu ut naq tustuuq chiʼus. Li cheekel winq aʼin malaj li nakʼehok aatzolbʼal naru natenqʼank aawe chi xsikʼbʼal junaq li naʼlebʼ. Abʼanan, moko naru ta naq taakʼam junaq rehebʼ li tasal hu, chi moko taapeji chi moko taatzʼiibʼa ta xsaʼ.

Li Santil Hu naxye naq tento tqakʼe qachʼool chi xsikʼbʼal li tzʼaqal naʼlebʼ li naʼaatinak chirix li Yos, joʼ nasikʼmank li tertookil pek (Proverbios 2:1-5). Li Rochochil Hu li wank saʼ li Chʼutlebʼaal Kabʼl ttenqʼanq aawe chi xsikʼbʼal junaq li naʼlebʼ.

• Kʼaru li kʼanjelobʼaal natawmank saʼ li Rochochil Hu li wank saʼ li Chʼutlebʼaal Kabʼl?

• Ani naru natenqʼank aawe chi xsikʼbʼal junaq li naʼlebʼ saʼ li Rochochil Hu?

Li Jesus kixye rehebʼ li xtzolom: «Chilemtzʼunq leesaqenkil chiruhebʼ li tenamit, re naq teʼril leechaabʼil bʼaanuhom ut teʼxnima xloqʼal leechoxahil Yuwaʼ» (Mateo 5:16). Joʼkan naq, naqoksi ebʼ li kʼanjelobʼaal li wank saʼebʼ li qakutan, li internet aʼan jun rehebʼ li kʼanjelobʼaal aʼin. Li naʼaj jw.org/kek xaqabʼanbʼil xbʼaanebʼ laj Testiiw re li Jehobʼa ut aran wank resil li xpaabʼalebʼ ut li kʼanjel li nekeʼxbʼaanu. Abʼan, kʼaru li esil natawmank chisaʼ?

Naxsume ebʼ li patzʼom chirix li Santil Hu. Laaʼat naru nakaataw xsumenkil ebʼ li patzʼom li nekeʼxbʼaanu naabʼal ebʼ li qas qiitzʼin. Joʼ naxkʼut saʼebʼ li tratado Ma twulaq xqʼehil naq tqakanabʼ xkʼulbʼal li rahilal? ut Ma teʼwanq wiʼ chik xyuʼam ebʼ li kamenaq? Saʼ li qanaʼaj saʼ Internet, naxqʼax 600 li aatinobʼaal li naru wiʼ xkubʼsinkil ebʼ li tratado aʼin. Joʼkan ajwiʼ, naxqʼax 130 li aatinobʼaal li natawmank wiʼ li Santil Hu Traducción del Nuevo Mundo, ut naabʼal ebʼ li tasal hu re xtawbʼal ru li Santil Hu, ut saʼ xyanqebʼ li tasal aʼin taataw li tasal hu Kʼaru tzʼaqal naxchʼolobʼ li Santil Hu? Taataw ajwiʼ ebʼ li tasal hu La Atalaya ut ¡Despertad! Naabʼal rehebʼ li tasal hu aʼin naru taawil malaj taawabʼi saʼ Internet, malaj taakubʼsi saʼebʼ li kʼanjelobʼaal li nawbʼilebʼ ru joʼ MP3, PDF, malaj EPUB. Re naq tatruuq xtenqʼankil junaq li qas qiitzʼin, naru nakaawisi chi huhil wiibʼ oxibʼ perel li hu saʼ li raatinobʼaal. Wank naabʼal ajwiʼ li naʼlebʼ choʼq rehebʼ li inkʼaʼ nekeʼruuk chi aatinak ut chi abʼink. Naru nakaawabʼi ajwiʼ saʼ internet chanru nayaabʼasimank li Santil Hu rikʼin xyaabʼ li son, taawabʼi ebʼ li eetalil li naxkʼe li Santil Hu chirix li kikʼulmank chaq najter, joʼ saʼebʼ li qakutan. Ut re naq sahaq saʼ laachʼool naq yooqat chi hilank, naru nakaawabʼi li chʼinaʼusil bʼich.

Naxye li yaal chirixebʼ laj Testiiw re li Jehobʼa. Naru nakaawil ut nakaawabʼi kʼaru yookebʼ xkʼulbʼal ebʼ laj Testiiw re li Jehobʼa, chanru yookebʼ chi kʼanjelak saʼ chixjunil li Ruuchichʼochʼ ut chanru nekeʼtenqʼank naq nachalk junaq li rahilal. Tatruuq ajwiʼ xnawbʼal joqʼe twanq junaq chik li nimla chʼutam ut chanru taataw xjayalil li xmolamebʼ laj Testiiw.

Chi joʼkan yook chi lemtzʼunk li yaal chirix li Yos saʼ chixjunil li Ruuchichʼochʼ. Li yaal yook chi wulak yalaq bʼar, maakʼaʼ naxye chanru xnajtil junaq li naʼaj, joʼ yook chi kʼulmank saʼ li kehil naʼaj Antartida. Nokootijok chi anchal qachʼool re naq «li Raatin li Qaawaʼ chi puktesiiq chi junpaat» saʼ chixjunil li Ruuchichʼochʼ re xkʼeebʼal xloqʼal li Yos (2 Tesalonicenses 3:1).

• Chanru yook chi tenqʼank li naʼaj jw.org/kek re naq yalaq ani tixnaw li yaal chirix li Yos?

• Kʼaru raj taawulaq chaawu rilbʼal saʼ internet chirixebʼ laj Testiiw re li Jehobʼa?