Keʼisiik saʼ li Chʼinaʼusil Naʼajej arin saʼ Ruuchichʼochʼ

AK NAABʼAL chihabʼ xyoobʼtesinkilebʼ li anjel naq li Yos kixyoobʼtesi li winq. Saʼ xkʼabʼaʼ naq ebʼ li anjel musiqʼejebʼ inkʼaʼ nekeʼilmank ru. Jun rehebʼ li anjel aʼin kixkʼe ribʼ choʼq aj Tza naq kixqʼet ribʼ chiru li Yos, ut kixbʼalaqʼi li xʼEva re naq tixlow ru li cheʼ li keʼyeheʼk rehebʼ naq inkʼaʼ teʼxchʼeʼ.

Laj Tza kixbʼaanu naq li kʼantiʼ t-aatinaq rikʼin li xʼEva re xbʼalaqʼinkil: kiraj naq tixkʼoxla naq saʼ xkʼabʼaʼ li Yos aʼan ut li xbʼeelom inkʼaʼ nekeʼxnaw bʼar wank li us. Kixye ajwiʼ re, naq inkʼaʼ teʼkamq wi teʼxlow ru li cheʼ: kiraj naq tixkʼoxla naq li Yos aj tikʼtiʼ. Laj Tza kiruutzʼuʼuji chiʼus li raatin re naq tpaabʼaaq li xtikʼtiʼ. Kixye naq wi teʼxqʼet ribʼ chiru li Yos, teʼruuq xtawbʼal xnaʼlebʼ ut teʼruuq xbʼaanunkil chixjunil li nekeʼraj. Abʼan chixjunil aʼin, moko yaal ta. Chi joʼkan kitiklaak chaq li tikʼtiʼik arin saʼ ruuchichʼochʼ. Li maaʼus aj musiqʼej aʼin kixkʼe saʼ chʼaʼajkilal li Yos naq kixye: Ma wank xwankil re xjolominkil li choxachʼochʼ? Ma tzʼaqal tiik ru li xchaqʼrabʼ? Ma us tooʼelq wi tqapaabʼ?

Li xʼEva kitʼaneʼk saʼ li xtikʼtiʼ laj Tza. Kiʼok ratawankil ru li cheʼ, toj reetal naq kixlow. Chirix chik aʼan kixkʼe re li xbʼeelom ut aʼan ajwiʼ kixlow ru li cheʼ. Wi wank junaq li poyanam tixkʼoxla naq moko maak ta keʼxbʼaanu, moko yaal ta. Naq keʼxqʼet li xchaqʼrabʼ li Yos aran keʼmaakobʼk. Chʼolchʼo chiru laj Adan ut xʼEva naq yookebʼ xqʼetbʼal ribʼebʼ chiru laj Yoobʼtesihom rehebʼ. Aʼan kixkʼe rehebʼ chixjunil li nekeʼraj, joʼ xtzʼaqalil ru xyuʼamebʼ.

Li Yos kixye kʼaru teʼxkʼul li keʼxqʼet ribʼ chiru. Xbʼeenwa kixye naq saʼ li kutan chaalel, tixtaqla chaq jun li ralal re naq tixsach li kʼantiʼ malaj laj Tza. Chirix chik aʼan kixtenebʼ li kamk saʼ xbʼeen laj Adan ut xʼEva, abʼan kiril xtoqʼobʼaal ruhebʼ li xkokʼal li teʼyoʼlaaq chaq. Joʼkan naq, moko keʼkamk ta saʼ junpaat toj kixkanabʼebʼ chi wank. Kʼaru li maatan teʼxkʼul raj ebʼ li ralal xkʼajol? Li Jehobʼa kixye naq li ralal li tixtaqla chaq t-isinq re li chʼaʼajkilal li kitiklaak chaq saʼ li naʼajej Eden. Abʼan, ani raj laj Kolonel, ut chanru tixbʼaanu re naq ttzʼaqloq ru li Rajom li Yos? Li xsumenkil li patzʼom kiʼok chi kutanoʼk ru saʼ xnumikebʼ li chihabʼ naq yook chaq chi tzʼiibʼaak li Santil Hu.

Chirix chik aʼan, li Yos kirisihebʼ saʼ li Chʼinaʼusil Naʼajej. Keʼok xkʼanjelankil li chʼochʼ ut keʼxkʼe xqʼe chi kʼanjelak chi kaw re naq teʼruuq chi waʼak. Ut moqon chik kiyoʼlaak laj Cain, li xbʼeen xyum li xʼEva. Kiʼok ajwiʼ chi wank chixjunilebʼ li ralal xkʼajol ut saʼ xyanqebʼ wank laj Abel ut laj Set, li xxeʼtoonil laj Noe.

(Isinbʼil chaq saʼ Genesis tasal 3-5 ut saʼ Apocalipsis 12:9.)