XKOMON LI NAʼLEBʼ
Li Jesus Aʼan li Sikʼbʼil Ru
LI Jehobʼa kixkʼe naabʼal li eetalil rehebʼ li keʼtzʼiibʼank re li Santil Hu re naq teʼxnaw ani laj Kolonel malaj li Sikʼbʼil Ru. Li Jehobʼa kiʼaatinak chirix li xyoʼlajik, li xkʼanjel ut li xkamik, joʼkan naq moko kichʼaʼajkoʼk ta chiruhebʼ xnawbʼal ani li Sikʼbʼil Ru. Naq tqatzol chirix li xyoʼlajik ut chirix li xkachʼinal li Jesus tqakʼe reetal naq aʼan li Sikʼbʼil Ru. Chixjunil li kixye li Yos chirix li Jesus kitzʼaqlok ru.
Laj Isaias, laj kʼanjel chiru li Yos, kixye naq li Sikʼbʼil Ru tchalq saʼ xyanqebʼ laj David (Isaías 9:7). Joʼkan tzʼaqal kikʼulmank joʼ kixye laj Isaias; li Jesus kichalk saʼ xyanq li xxeʼ xtoonal laj David, li awabʼej (Mateo 1:1, 6-17).
Laj Miqueas, jun chik laj kʼanjel chiru li Yos, kixye naq li Jesus tyoʼlaaq ‹Belén Efrata› ut twanq choʼq awabʼej (Miqueas 5:2). Naq kiyoʼlaak li Jesus saʼ Ruuchichʼochʼ, saʼ Israel kiwank wiibʼ li tenamit xkʼabʼaʼ Belen. Jun rehebʼ li tenamit aʼin kiwank nachʼ rikʼin Nazaret ut li jun chik kiwank Juda nachʼ rikʼin Jerusalen. Li tenamit li kiwank chixkʼatq Jerusalen kixkʼabʼaʼi Efrata ut aran tzʼaqal kiyoʼlaak li Jesus. Chi joʼkan kitzʼaqlok ru li kiyeemank chirix li Jesus (Mateo 2:1).
Li Santil Hu kixye ajwiʼ naq li Yos tixbʼoq li ralal re naq t-elq chaq saʼ li tenamit «Ejiipt». Toj kachʼin li Jesus naq kikʼameʼk Egipto ut naq kikamk laj Herodes li awabʼej, li Jesus ut li xnaʼ xyuwaʼ keʼsutqʼiik saʼ li xtenamit. Ut chi joʼkan kitzʼaqlok ru li kixye ajwiʼ li Jehobʼa (Oseas 11:1; Mateo 2:15).
Saʼ li kaaxukuut bʼarwiʼ naxye «Li kiyeemank chirix li Jesus», naxkʼut naq «kitzʼaqlok» ru chixjunil li «kiyeemank» chaq chirix li Jesus. Wi taasikʼ chixjunil li raqal li Santil Hu li wank arin, taakʼe reetal naq yaal naxye li Raatin li Yos.
Naq taatzʼil ebʼ li raqal aʼin taakʼe reetal naq chixjunil li keʼxye chaq ebʼ li propeet chirix li Jesus kitzʼiibʼamank chaq naq toj maajiʼ nayoʼlaak li Jesus arin saʼ Ruuchichʼochʼ. Joʼkan naq li Jesus kixye: «Tento naq taatzʼaqloq ru chixjunil li tzʼiibʼanbʼil chiwix saʼ li xChaqʼrabʼ laj Moisés, saʼ xHuhebʼ li Propeet ut saʼebʼ li Saalm» (Lucas 24:44). Wi taatzʼil xsaʼ Laasantil Hu taakʼe reetal naq kitzʼaqlok ru chixjunil li kiyeemank chaq chirix li Jesus.