Yalaq Bʼar Kipuktesimank li Chaabʼil Esilal

NAQ laj Pablo kiʼok choʼq aj paabʼanel, kixkʼe xchʼool chi xpuktesinkil li chaabʼil esilal chirix li Xʼawabʼejilal li Yos. Abʼan aʼan chik tixkuy li rahobʼtesiik. Li Apostol kixbʼeeni najtil naʼajej re xkʼeebʼal resil li awabʼejilal li tixbʼaanu li kiraj li Yos choʼq rehebʼ li poyanam chalen chaq saʼ xtiklajik.

Saʼ li xbʼeen sut naq xkoho, laj Pablo kiwulak Listra ut kixkʼirtasi jun li winq yeq roq chalen saʼ xyoʼlajik. Ebʼ li keʼilok rehebʼ, keʼok xchajbʼal rehebʼ chi xyeebʼal naq laj Pablo ut laj Bernabe wiibʼebʼ chi yos. Chi raasa keʼruuk xbʼaanunkil naq inkʼaʼ teʼmayejaaq ru. Abʼanan, wankebʼ li poyanam keʼxpaabʼ rehebʼ li xikʼ nekeʼilok, ut keʼxteni chi pek. Abʼan laj Pablo inkʼaʼ kikamk, kixkuy bʼan li teniik. Moqon chik, kisutqʼiik re xkawresinkil xchʼool ebʼ li xtzolom li Jesus.

Chirix chik aʼan, wankebʼ aj Judiiy yookebʼ xminbʼalebʼ li rech aj paabʼanel li maawaʼebʼ aj Judiiy re naq teʼxyuʼami wiibʼ oxibʼ rehebʼ li Xchaqʼrabʼ laj Moises. Tojaʼ naq laj Pablo kixkanabʼ li chʼaʼajkilal aʼin saʼ ruqʼebʼ li Apostol ut ebʼ li cheekel winq re Jerusalen. Naq ebʼ li winq aʼin ak keʼxtzʼil li Santil Hu ut ak keʼxtzʼaama li xsantil musiqʼej li Yos, keʼxtzʼiibʼa xhu ebʼ li chʼuut ut keʼxye rehebʼ naq inkʼaʼ teʼxloqʼoni li pechʼbʼil yos, inkʼaʼ teʼxtzaka li kikʼ chi moko teʼxtzaka li tibʼ li inkʼaʼ isinbʼil xkikʼel ut inkʼaʼ teʼkoʼbʼeetaq yumbʼeetaq. Chixjunil aʼin aajel ru «xbʼaanunkil», abʼan moko naraj ta xyeebʼal naq tento teʼxyuʼami li Xchaqʼrabʼ laj Moises (Hechos 15:28, 29).

Saʼ xkabʼ sut naq xkoho, laj Pablo kiwulak Berea, li naʼaj aʼin wank saʼ li tenamit Grecia. Arin ebʼ laj Judiiy keʼxkʼulubʼa li chaabʼil esilal. Joʼkan naq wulaj wulaj keʼxtzʼil xsaʼ li Santil Hu re rilbʼal ma yaal li yookebʼ xtzolbʼal. Moqon chik, laj Pablo kiʼelelik chiruhebʼ li xikʼ nekeʼilok, ut naq kiwulak Atenas kixkʼe jun li seeraqʼ rehebʼ li nimebʼ xtzolbʼal, abʼan kixbʼaanu saʼ tuulanil ut saʼ xyaalal.

Ak xsutqʼiik saʼ rox sut naq laj Pablo xkoho Jerusalen. Naq xʼok saʼ Rochoch li Yos, aran kiyaleʼk xkamsinkil xbʼaanebʼ li xikʼ nekeʼilok chaq re. Abʼan ebʼ laj puubʼ re Roma keʼxchʼik ribʼ ut keʼxkʼam re naq tixsume wiibʼ oxibʼ li patzʼom. Saʼ xkʼabʼaʼ naq laj Pablo aj Roma keʼxkʼulubʼa naq laj Felix, li awabʼej, traqoq aatin saʼ xbʼeen. Ebʼ laj Judiiy inkʼaʼ keʼruuk xkʼutbʼesinkil naq laj Pablo wank xmaak. Usta laj Festo, li reeqaj laj Felix, naxnaw aʼin, kixye naq tixqʼaxtesi saʼ ruqʼebʼ laj Judiiy. Abʼan laj Pablo kixye: «Nintzʼaama naq tinʼabʼiiq xbʼaan [laj Cesar] li awabʼej». Tojaʼ naq laj Festo, kixye: «Rikʼin [laj Cesar] li awabʼej tatxik» (Hechos 25:11, 12).

Saʼ Roma kiraqmank raj aatin saʼ xbʼeen. Laj Pablo kikʼameʼk saʼ li tenamit Italia, abʼan li jukubʼ kijukʼeʼk xbʼaan xkawil roq li palaw. Joʼkan naq kixnumsi li habʼalqʼe saʼ li naʼaj Malta. Naq kiwulak Roma, wiibʼ chihabʼ kikanaak saʼ tzʼalam saʼ jun toʼoninbʼil ochoch. Usta tzʼaptzʼo, maajunwa kixkanabʼ xkʼeebʼal resil li Xʼawabʼejilal li Yos rehebʼ li keʼwulak chi rilbʼal.

(Isinbʼil chaq saʼ Hechos 11:22–28:31.)