TZOLOM 2

Aatinan joʼ nakaabʼaanu rajlal kutan

2 Corintios 2:17

WIIBʼ OXIBʼ LI AATIN: Aatinan joʼ nakaabʼaanu rajlal kutan ut chi anchal aachʼool. Chi joʼkan taakʼutbʼesi li nakaawekʼa chirix li naʼlebʼ ut chirixebʼ li yookebʼ chaawabʼinkil.

CHANRU XBʼAANUNKIL

Tijon ut kʼubʼ aawibʼ chiʼus. Ye re li Jehobʼa naq tatxtenqʼa chi xkʼebʼal aachʼool chirix li naʼlebʼ li taakʼe re naq inkʼaʼ tatxuwaq. Wanq saʼ laachʼool li xnimal ru naʼlebʼ li taawaj xkʼutbʼal. Maaye joʼ chanru wank chi tzʼiibʼanbʼil. Taaye bʼan rikʼin laawaatin.

Wi taayaabʼasi li naxye li Santil Hu malaj junaq chik li hu, kʼe aachʼool chi xnawbʼal ru chiʼus li naxye re naq taayaabʼasi chiʼus. Wi wank aran li kixye junaq li poyanam, taayaabʼasi chi anchal aachʼool, abʼan maaqʼax wiʼ chik ru.
Aatinan chi anchal aachʼool. Kʼoxla kʼaʼut ebʼ li poyanam nekeʼraj rabʼinkil li esil. Kʼe aachʼool chirixebʼ. Wi taabʼaanu, tatruuq xkʼutbʼal naq yookat chi aatinak chi anchal aachʼool ut saʼ tuulanil ut teʼril aʼin rikʼin chanru nakatxaqliik, nakaawekʼasi laawuqʼ ut laawu.

Aatinan joʼ nakaabʼaanu rajlal kutan abʼan maawoksi yalaq kʼaru chi aatin. Wi taayaabʼasi chiʼus ebʼ li aatin ut taaye chi chʼolchʼo ru, yookat xkʼebʼal xwankil li esil.
Ilebʼ li yookebʼ chaawabʼinkil. Wi inkʼaʼ taatochʼebʼ xchʼool, taawilebʼ li yookebʼ chaawabʼinkil. Naq taakʼe junaq li seeraqʼ, inkʼaʼ raj taawil chixjunilebʼ, xbʼeenwa naru taawil junaq li poyanam, moqon taawil junaq chik ut joʼkan yooqat xbʼaanunkil.