TZOLOM 7

Oksi li naxkʼut li yaal ut paabʼajel

Lucas 1:3, Wy

WIIBʼ OXIBʼ LI AATIN: Oksi li naʼlebʼ li naxye li yaal re xtenqʼankilebʼ chi xtawbʼal ru chiʼus li yookat xkʼutbʼal.

Oksi li naʼlebʼ li nekeʼxye li yaal. Li taaye isinbʼilaq saʼ li Raatin li Yos ut taayaabʼasi li naxye naq truhanq xbʼaanunkil. Wi taaye junaq li naʼlebʼ li xeʼxtzʼil rix ebʼ laj chamalnawom, junaq li esil, junaq li eetalil chirix li xkʼulmank, malaj junaq chik li naʼlebʼ, taatzʼil rix chiʼus naq yaal ut akʼ li naʼlebʼ aʼin.
Oksi chiʼus ebʼ li naʼlebʼ. Naq taachʼolobʼ junaq li raqal, kʼoxla chirix kʼaru yook chi aatinak, li xnimal ru naʼlebʼ li naxkʼut li Santil Hu ut ebʼ li tasal hu li naxkʼe «li moosej tiik xchʼool ut wank xnaʼlebʼ» (Mat. 24:45). Wi taawoksi junaq li hu li inkʼaʼ nachalk saʼ xmolam li Yos, kʼoxla chirix kʼaru yook chi aatinak ut kʼaru kiraj xkʼutbʼal li kitzʼiibʼank chaq re.

Maakʼe xtzʼaqobʼ li xkʼulmank chaq chi moko xkʼihalil. Tento taakʼe reetal chiʼus ut maajal ru ebʼ li aatin, wi tixye «wiibʼ oxibʼ li poyanam» maaye «li xkʼihalil li poyanam», ut «wank sut» rikʼin «junelik» malaj «maare tkʼulmanq» rikʼin «tkʼulmanq».
Tenqʼahebʼ chi naʼlebʼak. Naq ak xaayaabʼasi junaq xraqal li Santil Hu malaj xaaye li xaataw saʼ junaq chik li hu, taabʼaanu ebʼ li patzʼom abʼan maatochʼebʼ xchʼool malaj kʼe junaq li eetalil re xtenqʼankilebʼ chi xtawbʼal ru chiʼus.