TZOLOM 1

Tikibʼ chiʼus laakʼanjel

Hechos 17:22

WIIBʼ OXIBʼ LI AATIN: Li aatin li taawoksi saʼ xtiklajik tento tkʼanjelaq re naq teʼraj rabʼinkil li esil, re xkʼutbʼal chiʼus li naʼlebʼ li tat-aatinaq wiʼ ut re xkʼutbʼal kʼaʼut tento teʼrabʼi aʼin.

CHANRU XBʼAANUNKIL

Bʼaanu naq teʼraj rabʼinkil li esil. Sikʼ junaq li patzʼom, li naʼlebʼ, li eetalil chirix li xkʼulmank malaj li esil li teʼraj rabʼinkil.

Xbʼeenwa kʼoxla chiʼus kʼaru nawulak chiruhebʼ malaj kʼaru naʼok wiʼ xkʼaʼuxebʼ li yookebʼ chaawabʼinkil, ut chirix chik aʼan naru taakʼe li naʼlebʼ aʼin saʼ xyanq li aatin li taawoksi saʼ xtiklajik.
Kʼut chiʼus li naʼlebʼ. Kʼe reetal naq li aatin li taawoksi saʼ xtiklajik tixkʼut chiʼus chirix kʼaru yookat chi aatinak ut li taawaj xtawbʼal chirix aʼin.
Kʼe chi naweʼk kʼaʼut wank xwankil li naʼlebʼ. Li taaye tento tixchap ribʼ rikʼin li tkʼanjelaq chiruhebʼ. Tento naq teʼxtaw ru chiʼus naq li taaye rehebʼ tixtenqʼahebʼ saʼ li xyuʼam.

Naq yookat xkʼubʼankil junaq li seeraqʼ, kʼoxla aʼin: «Kʼaru ebʼ li chʼaʼajkilal nekeʼxkʼul ebʼ li wech aj paabʼanel saʼ linchʼuut?». Chirix chik aʼan, taakʼe li naʼlebʼ aʼin saʼ xyanq li aatin li taawoksi saʼ xtiklajik.