Moko junelik ta teʼwanq li chʼaʼajkilal

Ebʼ li chʼaʼajkilal naxchʼina qachʼool, qʼaxal chik wi nekeʼbʼayk. Laj David naxnaw naq li chʼaʼajkilal li yook xkʼulbʼal rikʼin laj Saúl moko junelik ta twanq ut naq aʼan twanq choʼq awabʼej joʼ kixye chaq li Jehobʼa (1Sa 16:13). Li xpaabʼal laj David kitenqʼank re, re naq twanq xkuyum ut re naq troybʼeni naq li Jehobʼa tixtuqubʼ ru li xchʼaʼajkilal.

Naq wanq qachʼaʼajkilal, tento naq wanq qanaʼlebʼ ut tookʼoxlaq chiʼus re naq ttuqlaaq ru (1Sa 21:12-14; Pr 1:4). Abʼanan, wankebʼ li chʼaʼajkilal moko nekeʼelk ta saʼ junpaat usta xqabʼaanu chixjunil li wank saʼ quqʼ ut inkʼaʼ xqaqʼet li Raatin li Yos. Naq tkʼulmanq aʼin, wanq qakuyum ut tqoybʼeni naq li Jehobʼa tixtuqubʼ ru li chʼaʼajkilal. Chi seebʼ, li Jehobʼa trisi chixjunil li qarahilal ut «tixchaqihobʼresi chixjunil» li xyaʼal qu (Ap 21:4, SBG). Maare traqeʼq li qachʼaʼajkilal xbʼaan naq li Jehobʼa t-okenq chirix malaj junaq chik xyaalal, abʼan chʼolchʼooq chiqu aʼin: moko junelik ta twanq ebʼ li chʼaʼajkilal. Naxkʼojobʼ qachʼool xnawbʼal aʼin.

NAQ AK XAAWIL LI BʼIDEO WANKO SAʼ JUNAJIL USTA JACHJO RU LI RUUCHICHʼOCHʼ, TAASUME EBʼ LI PATZʼOM AʼIN:

• Kʼaru ebʼ li chʼaʼajkilal xeʼxkʼul naabʼalebʼ aj Testiiw saʼ jun li naʼajej re Estados Unidos?

• Chanru xeʼxkʼutbʼesi naq wankebʼ xkuyum ut nekeʼrahok?

• Kʼaru li qʼaxal wank chaq xwankil chiruhebʼ li hermaan? (Flp 1:10).