TZOLOM 20
Chanru kʼubʼkʼu li xtenamit li Jehobʼa
Li Jehobʼa nakʼanjelak chi tustu ru (1 Corintios 14:33). Joʼkan naq tustu ajwiʼ nakʼanjelak li xtenamit. Chanru kʼubʼkʼukebʼ laj Testiiw? Ut chanru tootenqʼanq re naq us t-elqʼ chixjunil?
1. Ani najolomink xchʼuut ebʼ laj Testiiw?
«Li Kriist aʼan xjolomil li Iklees» malaj li chʼuut (Efesios 5:23). Li Jesús naxjolomi chixjunil li naxbʼaanu li xtenamit li Jehobʼa. Joʼkan naq kixxaqabʼ «li moosej tiik xchʼool ut wank xnaʼlebʼ» malaj li Nekeʼjolomink re Xmolam li Jehobʼa (yaabʼasi Mateo 24:45-47). Joʼ nekeʼxjolomi chaq li chʼuut ebʼ li apóstol saʼ Jerusalén joʼkan ajwiʼ nekeʼxbʼaanu ebʼ li Nekeʼjolomink re Xmolam li Jehobʼa (Hechos 15:2). Ebʼ li winq aʼin nekeʼxbʼeresi li xmolam li Jehobʼa abʼan moko nekeʼraj ta wank choʼq reqaj li Jesús. Nekeʼxsikʼ bʼan li xtenqʼ li Jehobʼa saʼ li Raatin ut nekeʼxbʼaanu li naxye li Jesús.
2. Anihebʼ li cheekel winq ut kʼaru nekeʼxbʼaanu?
Aʼanebʼ kawebʼ xpaabʼal, nekeʼxkʼe xnaʼlebʼ li rechpaabʼanel rikʼin li Santil Hu, nekeʼxwaklesi xchʼoolebʼ ut nekeʼxtenqʼahebʼ. Moko tojbʼilebʼ ta xbʼaan li xkʼanjel. Nekeʼxbʼaanu bʼan joʼ naxye li taql aʼin: «Chi anchalaq bʼan eechʼool joʼ naraj li Yos; moko re ta xsikʼbʼal eetumin, saʼ eechʼool bʼan chiʼalaaq» (1 Pedro 5:1, 2). Wankebʼ ajwiʼ li winq saʼ li chʼuut li nekeʼkʼanjelak joʼ aj tenqʼanel rehebʼ li cheekel winq, ebʼ aʼan moqon naru nekeʼxaqabʼaak joʼ cheekel winq.
Li Nekeʼjolomink re Xmolam li Jehobʼa nekeʼxsikʼ ani txaqabʼaaq joʼ cheekel winq li naʼulaʼanink chʼuut. Ebʼ li hermaan aʼin nekeʼrulaʼani jalan jalanq li chʼuut re xtenqʼankilebʼ ut xwaklesinkilebʼ xchʼool. Li cheekel winq li naʼulaʼanink chʼuut naxtzʼil rix li naxye li Santil Hu re xnawbʼal ma truuq xxaqabʼankil junaq li hermaan joʼ cheekel winq malaj joʼ aj tenqʼanel (1 Timoteo 3:1-10, 12; Tito 1:5-9).
3. Kʼaru tenebʼanbʼil saʼ xbʼeen li junjunq chi aj testiiw re li Jehobʼa?
Chixjunilebʼ saʼ li chʼuut nekeʼxterqʼusi «xkʼabʼaʼ li Qaawaʼ» naq nekeʼtzʼaqonk rikʼin sumenk, bʼichank malaj jalan chik li kʼanjel joʼ ajwiʼ puktesink joʼ naxkʼe ribʼ chiruhebʼ (yaabʼasi Salmo 148:12, 13).
QASIKʼAQ XCHAMAL LI NAʼLEBʼ
Qilaq chanru xnaʼlebʼ li Jesús naq najolomink ut chanru nekeʼxkʼam re ebʼ li cheekel winq rikʼin. Chanru tooruuq abʼink chiru li Jesús ut kʼanjelak saʼ junajil rikʼinebʼ li cheekel winq.
4. Li Jesús aʼan jun chaabʼil aj jolominel
Li Jesús naxye qe li chaqʼal ru aatin aʼin. Cheeyaabʼasi Mateo 11:28-30 ut chexʼaatinaq chirix ebʼ li patzʼom aʼin:
Chanru xnaʼlebʼ li Jesús naq najolomink? Ut chanru naraj naq tqekʼa qibʼ?
Chanru nekeʼxkʼam re ebʼ li cheekel winq rikʼin li Jesús? Cheerilaq li BʼIDEO.
Li Santil Hu naxye chi chʼolchʼo ru chanru teʼkʼanjelaq ebʼ li cheekel winq.
Cheeyaabʼasi Isaías 32:2 ut 1 Pedro 5:1-3 ut chexʼaatinaq chirix ebʼ li patzʼom aʼin:
Li Jesús kixkʼojobʼ xchʼoolebʼ li qas qiitzʼin. Chanru nakaawekʼa naq nakaawil naq ebʼ li cheekel winq nekeʼxyal xqʼe chi xbʼaanunkil aʼin?
Kʼaru chik nekeʼxbʼaanu ebʼ li cheekel winq re xkʼambʼal re rikʼin li Jesús?
5. Ebʼ li cheekel winq nekeʼxbʼaanu li nekeʼxye
Kʼaru naraj li Jesús naq teʼxkʼoxla ebʼ li cheekel winq chirixebʼ li xkʼanjel? Cheerilaq li BʼIDEO.
Li Jesús kixye chanru teʼnaʼlebʼaq ebʼ li cheekel winq li nekeʼxbʼeresi li chʼuut. Cheeyaabʼasi Mateo 23:8-12 ut chexʼaatinaq chirix ebʼ li patzʼom aʼin:
Joʼ naxye li Santil Hu, chanru teʼnaʼlebʼaq ebʼ li cheekel winq? Ma taaye raj naq ebʼ li nekeʼbʼeresink re ebʼ li junchʼol chi paabʼal joʼkan nekeʼnaʼlebʼak?
Ebʼ li cheekel winq nekeʼxkawubʼresi li xpaabʼal ut rehebʼ ajwiʼ li xjunkabʼal.
Ebʼ li cheekel winq nekeʼxkʼe xchʼool chirixebʼ li rechpaabʼanel.
Ebʼ li cheekel winq nekeʼpuktesink.
Ebʼ li cheekel winq nekeʼkʼutuk ut nekeʼtenqʼank ajwiʼ chi saabʼesink.
6. Nokooʼabʼink chiruhebʼ li cheekel winq
Li Santil Hu naxye qe kʼaʼut aajel ru naq tooʼabʼinq chiruhebʼ li cheekel winq. Cheeyaabʼasi Hebreos 13:17 ut chexʼaatinaq chirix ebʼ li patzʼom aʼin:
Kʼaʼut naxye qe li Santil Hu naq tento tooʼabʼinq chiruhebʼ li cheekel winq? Ma wank tawiʼ xyaalal aʼin? Kʼaʼut?
Cheeyaabʼasi Lucas 16:10 ut chexʼaatinaq chirix li patzʼom aʼin:
Kʼaʼut naq junelik tooʼabʼinq chiruhebʼ li cheekel winq, usta wank sut tqakʼoxla naq moko aajel ta ru?
WIIBʼ OXIBʼ NEKEʼXYE: «Moko aajel ta ru naq tootzʼaqonq saʼ junaq li paabʼal».
Kʼaru rusilal naqataw naq naqaloqʼoni ru li Yos saʼ li chʼuut?
LI AK XQATZOL
Li Jesús aʼan li najolomink re li chʼuut. Ebʼ li cheekel winq wankebʼ rubʼel xwankil li Jesús ut laaʼo nokooʼabʼink chiruhebʼ xbʼaan naq nokooʼeʼxtenqʼa ut nekeʼxkʼam qabʼe.
Qajultikaq
Ani najolomink re li xchʼuut ebʼ laj testiiw re li Jehobʼa?
Chanru nekeʼtenqʼank ebʼ li cheekel winq saʼ li chʼuut?
Kʼaru tenebʼanbʼil saʼ xbʼeen li junjunq chi aj paabʼanel?
SIKʼ XKOMON LI NAʼLEBʼ
Kʼe reetal chanru li Nekeʼjolomink re Xmolam li Jehobʼa ut ebʼ li cheekel winq nekeʼxkʼe xchʼool chirixebʼ li rechpaabʼanel.
Nekeʼxkawresi xchʼool li rechpaabʼanel naq yookebʼ chi rahobʼtesiik (4:22)
Il kʼaru xkʼanjelebʼ li cheekel winq li nekeʼulaʼanink chʼuut.
Li xwanjik jun li cheekel winq li naʼulaʼanink chʼuut saʼ jun li kʼalebʼaal (4:51)
Tzol kʼaru li xkʼanjel li ixq saʼ li xtenamit li Yos.
Tzol chanru ebʼ li cheekel winq nekeʼxkʼe xchʼool chi xtenqʼankilebʼ li rechpaabʼanel.
«Ebʼ li cheekel winq ebʼ aj kʼanjel chirix li xsahil qachʼool» (Laj Kʼaakʼalehom, 15 re enero 2013)