Laj Jehoiada inkʼaʼ naxuwak

Li xJezabel kiwank jun xkoʼ li naxkʼabʼaʼi Atalia ut maaʼus xnaʼlebʼ joʼ li xnaʼ. Li xʼAtalia kisumlaak rikʼin li awabʼej re Juda. Naq li awabʼej kikamk, li ralal kiʼok chi awabʼejink. Naq kikamk li ralal, li xʼAtalia kikanaak rikʼin li awabʼejilal re Juda. Re naq maaʼani tmaqʼoʼq chiru, kixyal xkamsinkil ebʼ li ralal xkʼajol li awabʼej ut chixjunilebʼ li teʼruuq raj chi kanaak rikʼin li awabʼejilal. Kixkamsi ajwiʼ ebʼ li ri! Joʼkan naq, nekeʼxxuwa ru.

Laj Jehoiada, li xyuwaʼil aj tij, ut li xJehoseba, li rixaqil, nekeʼxnaw naq nimla maak li yook xbʼaanunkil li xʼAtalia. Joʼkan naq, usta teʼkamsiiq xbʼaan li xʼAtalia, keʼxmuq jun rehebʼ li ri, li kʼuulaʼal aʼin aʼan laj Jehoas. Keʼxkʼirisi saʼ rochoch li Yos.

Naq laj Jehoas wank wuqubʼ chihabʼ re, laj Jehoiada kixchʼutubʼ chixjunilebʼ li xjolomil ebʼ laj kʼaakʼalenel ut ebʼ laj Levi. Kixye rehebʼ: «Kʼaakʼalehomaq li rokebʼaal li rochoch li Yos. Maaʼani teekanabʼ chi ok». Chirix chik aʼan, laj Jehoiada kixkʼe li koroon saʼ xjolom laj Jehoas re naq t-oq choʼq awabʼej re Juda. Tojaʼ naq ebʼ laj Juda keʼxjap re chi xyeebʼal: «Chiwanq taxaq xyuʼam li awabʼej!».

Li xʼAtalia, li awabʼej, kirabʼi xyaabʼ xkuxebʼ li poyanam ut xkoho saʼ aanil saʼ rochoch li Yos. Naq kiril li akʼ awabʼej, kixjap re: «Xinbʼalaqʼiik! Xinbʼalaqʼiik!». Ebʼ laj kʼaakʼalenel keʼxchap li ixq, keʼxkʼam ut keʼxkamsi chaq. Li xʼAtalia moko kixkanabʼ ta jun chaabʼil eetalil re li tenamit. Kʼaru raj tkʼulmanq?

Laj Jehoiada kixtenqʼa li tenamit chi xbʼaanunkil jun li sumwank rikʼin li Jehobʼa. Rikʼin li sumwank aʼin, keʼxye re li Jehobʼa naq junes aʼan chik teʼxloqʼoni ru. Laj Jehoiada kixbʼaanu naq tjukʼmanq rochoch laj Baal ut teʼxpukʼi ebʼ li pechʼbʼil yos. Kixxaqabʼebʼ aj tij ut aj Levi chi kʼanjelak saʼ rochoch li Jehobʼa re naq ebʼ li poyanam teʼruuq xloqʼoninkil wiʼ chik aran. Kixkʼe ajwiʼ aj kʼaakʼalehom re li rochoch li Yos re naq li tzʼajebʼ ru xyuʼam inkʼaʼ teʼoq. Chirix chik aʼan, laj Jehoiada ut ebʼ li xjolomil ebʼ laj kʼaakʼalenel keʼxkʼam laj Jehoas saʼ rochoch li awabʼej ut keʼxchunubʼ saʼ li kʼojaribʼaal. Ebʼ laj Juda kʼajoʼ naq keʼsahoʼk saʼ xchʼool! Anaqwan teʼruuq chik kʼanjelak chiru li Jehobʼa, maaʼani chik li xʼAtalia ut li loqʼonink Baal. Ma nakaaye naq laj Jehoiada inkʼaʼ naxuwak? Ma nakaakʼe reetal naq saʼ xkʼabʼaʼ aʼin kixtenqʼa naabʼal li poyanam?