Wi chʼolchʼo chaawu anihat tatruuq xqʼaxbʼal yalaq kʼaru chi chʼaʼajkilal.
CHOʼQ REHEBʼ LI SAAJ
9 Anihat
KʼARU NARAJ XYEEBʼAL?
Xkʼutbʼesinkil anihat, moko kaʼaj tawiʼ nanawmank rikʼin laakʼabʼaʼ malaj laawilobʼaal, nanawmank bʼan rikʼin laachaabʼil bʼaanuhom, laapaabʼal ut laanaʼlebʼ.
KʼAʼUT WANK XWANKIL?
Naq chʼolchʼo chaawu anihat, inkʼaʼ nakaatzʼeqtaana laachaabʼil naʼlebʼ ut moko nakaabʼaanu ta li nekeeraj laawechsaajilal.
«Naabʼalebʼ li kristiʼaan chanchanebʼ li ninqi muñeek li wankebʼ saʼebʼ li kʼayibʼaal, xbʼaan naq nekeʼxkanabʼ naq jalan taayehoq rehebʼ kʼaru li tʼikr teʼxkʼe chirix» (Adrian).
«Usta chʼaʼaj chiwu xintzol xkolbʼal rix li chaabʼilal. Ninnaw anihebʼ tzʼaqal li wamiiw naq nawil li xbʼaanuhomebʼ ut chanru ninnaʼlebʼak naq wankin rikʼinebʼ» (Courtney).
LI NAʼLEBʼ LI NAXKʼE LI SANTIL HU: «Meekʼam eere rikʼin li ruuchichʼochʼ aʼin, chejal bʼan leeyuʼam, cheʼakʼobʼresi» (Romanos 12:2).
KʼARU TATRUUQ XBʼAANUNKIL?
Re naq taanaw anihat anaqwan ut chanruhaq laayuʼam naq ttzʼaqloq ru laachihabʼ tzʼil rix li nakaanaw xbʼaanunkil, li nachʼaʼajkoʼk chaawu ut li nakaapaabʼ. Naru taakʼoxla rix ebʼ li patzʼom aʼin.
Li nakaanaw xbʼaanunkil: «Ma seebʼ inchʼool chi xbʼaanunkil junaq li kʼanjel? Kʼaru ninnaw xbʼaanunkil chiʼus? Ma ninnaw xkuybʼal wibʼ? Ma kaw ninkʼanjelak? Ma ninwulak saʼ li hoonal li ak xaqabʼanbʼil? Ma nawulak chiwu sihink?».
LI TATRUUQ XBʼAANUNKIL: Wi nachʼaʼajkoʼk chaawu xnawbʼal bʼar wank laachaabʼil naʼlebʼ, patzʼ laatenqʼ re laanaʼ laayuwaʼ malaj re junaq laawamiiw.
LI NAʼLEBʼ LI NAXKʼE LI SANTIL HU: «Li junjunq chixkʼehaq reetal chanru li xbʼaanuhom; chi joʼkan wank kʼaru tixnima wiʼ ribʼ xjunes ut inkʼaʼ yal chirix jalan chik» (Gálatas 6:4).
Li nachʼaʼajkoʼk chaawu: «Ma wank junaq linnaʼlebʼ li tento xchaabʼilobʼresinkil? Joqʼe nachʼaʼajkoʼk chiwu xbʼaanunkil li us? Joqʼe naʼajmank naq tinkuy wibʼ?».
LI NAʼLEBʼ LI NAXKʼE LI SANTIL HU: «Wi naqaye naq maakʼaʼ qamaak, yooko chi xbʼalaqʼinkil qibʼ ut moko wank ta li yaal qikʼin» (1 Juan 1:8).
Li nakaapaabʼ: «Kʼaru li chaabʼil naʼlebʼ ninyuʼami ut kʼaʼut? Ma ninpaabʼ naq wank jun li Yos? Kʼaru naxkʼutbʼesi naq wank jun li Yos? Kʼaru nawekʼa naq nawil jun li naʼlebʼ li inkʼaʼ us ut kʼaʼut? Kʼaru ninkʼoxla chirix li kutan chalkebʼ re?».
LI NAʼLEBʼ LI NAXKʼE LI SANTIL HU: «Li seebʼal kʼaʼuxl ut li chaabʼil nawok tatxkʼaakʼale ut tatxkol» (Proverbios 2:11).