Li abʼink chanchan naq nakattoʼonink saʼ li bʼanko. Naq nakattojok naru teʼxkʼe xkomon «laatoʼ» tumin.
CHOʼQ REHEBʼ LI SAAJ
10 Paabʼajelaq laawaatin
KʼARU NARAJ XYEEBʼAL?
Li kristiʼaan li paabʼajel raatin naroxloqʼi li nekeʼxye re, naxbʼaanu li naxyeechiʼi ut junelik naxye li yaal. Chi joʼkan li xnaʼ xyuwaʼ, ebʼ li ramiiw ut li xpatron naru nekeʼxkʼojobʼ xchʼool rikʼin.
KʼAʼUT WANK XWANKIL?
Tento taakʼutbʼesi naq paabʼajel laawaatin re naq tatruuq xbʼaanunkil li nakaawaj.
«Re naq laanaʼ laayuwaʼ teʼxkʼojobʼ xchʼool aawikʼin maakʼuulaʼali aawibʼ, junelik taabʼaanu li nekeʼxye aawe ut moko kaʼaj tawiʼ naq wankebʼ aawikʼin» (Sarahi).
LI NAʼLEBʼ LI NAXKʼE LI SANTIL HU: «Yalomaq eerix» (2 Corintios 13:5).
KʼARU TATRUUQ XBʼAANUNKIL?
Qilaq ebʼ li naʼlebʼ li truuq aatenqʼankil re naq laanaʼ laayuwaʼ teʼxkʼojobʼ xchʼool aawikʼin.
Ye li yaal. Wi nakat-tikʼtiʼik ebʼ li kristiʼaan inkʼaʼ chik teʼxpaabʼ li nakaaye. Abʼan wi nakaaye li yaal usta xatpaltoʼk ebʼ li junchʼol teʼxkʼe reetal naq naru teʼxkʼojobʼ xchʼool aawikʼin.
«Moko chʼaʼaj ta xyeebʼal li yaal naq us choʼq aawe, abʼan wi taaye li yaal usta taakʼe aawibʼ saʼ chʼaʼajkilal aʼin tixbʼaanu naq ebʼ li junchʼol teʼxkʼojobʼ xchʼool aawikʼin» (Caiman).
LI NAʼLEBʼ LI NAXKʼE LI SANTIL HU: «Naqaj xbʼaanunkil chixjunil chi chaabʼil» (Hebreos 13:18).
Bʼaanu li nekeʼxye aawe. Naq keʼxpatzʼ rehebʼ li nekeʼsikʼok re, ebʼ laj kʼanjel saʼ jun li molam saʼ Estados Unidos, li xkʼihalil keʼxye naq «jun rehebʼ li naʼlebʼ li naʼajmank re naq taataw junaq laakʼanjel aʼan naq taabʼaanu li nekeʼxye aawe». Wi taakʼaytesi aawibʼ chi xbʼaanunkil li nekeʼxye aawe moko tchʼaʼajkoʼq ta chaawu naq tat-ixqiloʼq malaj tatwinqiloʼq.
«Wi saʼ junpaat ninbʼaanu li nekeʼxye we, linnaʼ linyuwaʼ nekeʼxkʼe reetal. Naq junelik ninʼabʼink qʼaxal nekeʼxkʼojobʼ xchʼool wikʼin» (Sarah).
LI NAʼLEBʼ LI NAXKʼE LI SANTIL HU: Kʼojkʼo linchʼool aawikʼin xbʼaan naq: «Ninnaw naq qʼaxal naabʼal chik taabʼaanu chiru li nintzʼaama aawe» (Filemón 21).
Wanq aakuyum. Moko chʼaʼaj ta xkʼebʼal reetal naq junaq li kristiʼaan najalaak li xjunxaqalil, abʼan chʼaʼaj xkʼebʼal reetal ma ak chʼolchʼo chiru li naraj.
«Naq laanaʼ laayuwaʼ ut ebʼ li junchʼol nekeʼxkʼe reetal naq nakaabʼaanu li nakaaye, timil timil nekeʼok xkʼojobʼankil xchʼool aawikʼin» (Brandon).
LI NAʼLEBʼ LI NAXKʼE LI SANTIL HU: «Tiqibʼomaq bʼiʼ eeribʼ rikʼin» kuyum (Colosenses 3:12).