Laajunkabʼal ut ebʼ laawamiiw
Naabʼalebʼ nekeʼchʼaʼajkoʼk chiruhebʼ xkʼambʼal ribʼ saʼ usilal rikʼinebʼ li junchʼol. Qatzʼilaq rix wiibʼ oxibʼ li naʼlebʼ li naxkʼe li Santil Hu li naru nokooxtenqʼa chi xkʼambʼal qibʼ saʼ usilal rikʼinebʼ li junchʼol.
MAASIKʼ LI US KAʼAJWIʼ CHOʼQ AAWE
LI NAʼLEBʼ LI NAXKʼE LI SANTIL HU: «Maaʼani chixsikʼ li us kaʼajwiʼ choʼq re xjunes, chixsikʼaq aj bʼan wiʼ choʼq rehebʼ li ras riitzʼin» (Filipenses 2:4).
KʼARU NARAJ XYEEBʼAL. Re xkʼambʼal qibʼ saʼ usilal rikʼinebʼ li junchʼol, inkʼaʼ tqasikʼ li us kaʼajwiʼ choʼq qe, aʼin naraj xyeebʼal, tento t-alaaq saʼ qachʼool kʼehok ut inkʼaʼ kaʼajwiʼ kʼuluk. Li naxsikʼ li us kaʼajwiʼ choʼq re naru naxjukʼ yalaq kʼaru chi wanjik. Jun eetalil, wi junaq li bʼeelomej tixsikʼ li us kaʼajwiʼ choʼq re maare tixkʼat roq li xsumʼaatin. Ut wi junaq li poyanam junelik naʼaatinak chirix li kʼaru re malaj chirix li naxnaw xbʼaanunkil tkanaaq chi maakʼaʼ ramiiw. Joʼ naxye li hu El camino del carácter, li naxkʼoxla ribʼ xjunes maakʼaʼ li chaabʼilal naxkʼam chaq saʼ li xyuʼam.
KʼARU TATRUUQ XBʼAANUNKIL
Tenqʼahebʼ li junchʼol. Jun chaabʼil amiiw paabʼajel raatin ut junelik natenqʼank. Naq kitzʼilmank rix, kitawmank naq li nekeʼxkʼoxla ebʼ li junchʼol moko rajlal ta nekeʼchʼinaak xchʼool ut sa nekeʼril ribʼ.
Taawebʼ ru. Li tawok u naraj xyeebʼal xkʼebʼal qibʼ saʼ xnaʼaj ebʼ li junchʼol ut rekʼankil ebʼ li xrahilal. Wi nakattawok u, inkʼaʼ taaye li aatin re kʼehok saʼ xutaan, li kawil aatin chi moko li aatin li ra nanaq.
Li tawok u nokooxtenqʼa ajwiʼ chi xkuybʼal li naqabʼi. Li tawok u tatxtenqʼa re naq maaʼani taatzʼeqtaana ut tatwanq choʼq ramiiw li jalanebʼ xtenamit ut xwanjik.
Kʼe aahoonal rehebʼ. Re xnawbʼalebʼ ru chiʼus ebʼ li junchʼol tento taakʼe aahoonal re wank rikʼinebʼ. Ut re xtawbʼal li chaabʼil amiiw, tento tat-aatinaq rikʼin chirix li xkʼaʼuxl wiʼ xchʼool malaj li wank xwankil choʼq re. Joʼkan naq, tzol rabʼinkilebʼ laawamiiw ut kʼe aachʼool chirixebʼ li xchʼaʼajkilal. Naq kitzʼilmank rix, kitawmank naq «li nekeʼxkʼe xchʼool chi seeraqʼik nekeʼxtaw li sahil chʼoolejil».
SIKʼ CHIʼUS EBʼ LAAWAMIIW
LI NAʼLEBʼ LI NAXKʼE LI SANTIL HU: «Li inkʼaʼ usebʼ xnaʼlebʼ nekeʼxpoʼ [...] li chaabʼilebʼ xnaʼlebʼ» (1 Corintios 15:33, Li Santil Hu, Wycliffe Bible Translators, [Wy]. Akʼ tzʼiibʼ).
KʼARU NARAJ XYEEBʼAL. Ebʼ li qamiiw naru nokooʼeʼxkelo chi xbʼaanunkil li us malaj li inkʼaʼ us. Li nekeʼtzolok chirix li komonil nekeʼxye naq yaal aʼin. Jun eetalil, nekeʼxye naq wankebʼ nekeʼok chi mayibʼk malaj nekeʼxjach li xsumlajik wi ebʼ li ramiiw nekeʼxbʼaanu aʼin.
KʼARU TATRUUQ XBʼAANUNKIL. Sikʼ choʼq aawamiiw li chaabʼilebʼ xnaʼlebʼ ut li nekeʼxyuʼami li us ut taawaj xkʼambʼal aawe rikʼinebʼ. Joʼebʼ li nekeʼxnaw kʼoxlak, li nekeʼoxloqʼink, li nekeʼsihink ut li nekeʼkʼuluk.
XKOMON LI NAʼLEBʼ LI NAXKʼE LI SANTIL HU
Taawil ebʼ li bʼideo li isinbʼil chaq saʼ li Santil Hu li kʼoxlanbʼil re xtenqʼankilebʼ li sumsu, ebʼ li saaj ut ebʼ li kokʼal.
MAAYE LI AATIN LI RA NANAQ
«Wan li aatin ra nanaqk [...] joʼ naxset li qʼesnal chʼiichʼ» (PROVERBIOS 12:18).
SIHIN CHI ANCHAL AACHʼOOL
«Li ani nawulak chiru sihiink, nabʼal chik taakʼeheqʼ re» (PROVERBIOS 11:25, Wy).
BʼAANU REHEBʼ LI JUNCHʼOL LI TAAWAJ NAQ TEʼXBʼAANU AAWE
«Joʼnimal li teeraj raj naq teʼxbʼaanu eere [...], chebʼaanuhaq ajwiʼ laaʼex rehebʼ aʼan» (MATEO 7:12).