Chanru tixkʼe saʼ chʼaʼajkilal li Internet laasumlajik
Li Internet naru naxtenqʼahebʼ li sumsukebʼ. Jun eetalil, naru nekeʼroksi re naq teʼaatinaq wulaj wulaj chiribʼilebʼ ribʼ joʼ ajwiʼ naxtenqʼahebʼ re naq teʼnachʼoq chiribʼilebʼ ribʼ.
Abʼanan wi inkʼaʼ nekeʼxnaw roksinkil chiʼus li Internet naru naq:
Tixmaqʼ li xhoonalebʼ li teʼruuq raj roksinkil re aatinak chiribʼilebʼ ribʼ.
Teʼxkʼam li xkʼanjel saʼ ochoch ut teʼoq chi kʼanjelak aran naq moko aajel ta ru.
Moko paabʼajelaq ta chik li raatin chiribʼilebʼ ribʼ ut teʼxtikʼtiʼi li xsumʼaatin.
LI TENTO XNAWBʼAL
LI HOONAL LI NEKEʼXNUMSI SAʼ WIIBʼAL
Laj Michael naxye: «Naq li wixaqil ut laaʼin wanko saʼ ochoch chanchan tawiʼ naq maaʼani aran. Laatzʼ ru chi rilbʼal li xselular ut naxye “Chaakuy inmaak, moko xwank ta inhoonal re rilbʼal ebʼ li esil toj anaqwan”». Laj Jonathan, jun li bʼeelomej naxye: «Jun li sumal naru nawank saʼ jun li ochoch abʼan chanchan tawiʼ naq wankebʼ saʼ jalan jalanq li naʼajej».
KʼOXLA AʼIN: Ma rajlal yookin chi aatinak saʼ selular malaj xtaqlankil ebʼ li esil naq naru raj twoksi li hoonal aʼin re aatinak rikʼin linbʼeelom malaj wixaqil? (EFESIOS 5:33).
LI KʼANJEL
Xbʼaan li kʼanjel li nekeʼxbʼaanu wankebʼ naʼajmank chiruhebʼ naq teʼxsume li xselular maakʼaʼ naxye kʼaru hoonal usta wankebʼ saʼ ochoch. Junchʼol chik usta ebʼ li xkʼanjel moko naʼajmank ta naq junelik yooqebʼ xsumenkil li xselular, nachʼaʼajkoʼk chiruhebʼ xkanabʼankil naq wankebʼ saʼ ochoch. Laj Lee naxye: «Naq yookin xnumsinkil inhoonal rikʼin li wixaqil nachʼaʼajkoʼk chiwu inkʼaʼ rilbʼal ebʼ li esil malaj xsumenkil li bʼoqom re linkʼanjel». Li xJoy naxye: «Ninkʼanjelak saʼ ochoch joʼkan naq nachʼaʼajkoʼk chiwu xkanabʼankil linkʼanjel. Tento tinyal inqʼe re rilbʼal kʼaru tinbʼaanu wulaj wulaj».
KʼOXLA AʼIN: Naq yook chi aatinak laabʼeelom malaj laawixaqil, ma nakaakʼe aachʼool chi rabʼinkil? (LUCAS 8:18).
MATBʼALAQʼINK
Naabʼalebʼ li sumsukebʼ nekeʼxye naq nekeʼxchoqi ribʼebʼ xbʼaan naq jun rehebʼ kixtaqsi junaq li naʼlebʼ saʼ Internet. Wankebʼ nekeʼxye naq xeʼxtaqsi junaq li naʼlebʼ saʼ Internet chirix li xjolom li rixaqil malaj li xbʼeelom.
Joʼkan peʼ nayeemank naq li Internet «xuwajel ru choʼq rehebʼ li sumsukebʼ» ut aʼin naxbʼaanu naq moko chʼaʼajkaq ta chiruhebʼ xmuxbʼal li xsumlajik. Joʼkan naq, li wankebʼ xnawom chirix li jachok ibʼ nekeʼxye naq li wank saʼ Internet naxbʼaanu naq naabʼalebʼ li sumsukebʼ teʼxraq li xsumlajik.
KʼOXLA AʼIN: Ma nakaamuq chiru laasumʼaatin naq yookat chi aatinak rikʼin li maawaʼ aawixaqil malaj aabʼeelom? (PROVERBIOS 4:23, TNM).
LI TATRUUQ XBʼAANUNKIL
CHʼOLCHʼOOQ CHAAWU LI TAABʼAANU
Naq jun li kristiʼaan inkʼaʼ naxkʼe reetal kʼaru naxtzeka naru nayajerk. Joʼkan ajwiʼ, wi junaq li kristiʼaan inkʼaʼ naxkʼe xhoonal re wank rikʼin li rixaqil malaj xbʼeelom twanq chʼaʼajkilal saʼ li xsumlajik (Efesios 5:28, 29).
LI NAʼLEBʼ LI NAXKʼE LI SANTIL HU: «Chʼolchʼooq cheeru li wank tzʼaqal xwankil» (FILIPENSES 1:10, TNM).
Tzʼilomaq rix ebʼ li naʼlebʼ aʼin li texruuq xyuʼaminkil malaj tzʼiibʼahomaq li nekeekʼoxla li texruuq xbʼaanunkil re naq li Internet inkʼaʼ tixchʼaʼajki leesumlajik.
Cheʼxwaʼaq saʼ wiibʼal junsutaq chiru li kutan.
Xaqabʼahomaq junaq li hoonal bʼarwiʼ inkʼaʼ teʼroksi leekʼanjelobʼaal.
Sikʼ ut bʼaanu junaq li naʼlebʼ bʼarwiʼ taakʼut laarahom re laasumʼaatin.
Chupomaq leeselular chi qʼeq ut meekanabʼ cheekʼatq.
Rajlal kutan xaqabʼahomaq 15 kʼasal re aatinak chi maakʼaʼ leeselular eerikʼin.
Xaqabʼahomaq junaq li hoonal bʼarwiʼ inkʼaʼ teʼroksi li Internet.