Wank xwankil li xsumenkil
Kʼaʼut wank xwankil xnawbʼal ma wank jun laj Yobʼtesinel? Xbʼaan naq, wi chʼolchʼo chaawu naq wank li Nimajwal Yos, maare taawaj xnawbʼal ma rikʼin chalenaq li Santil Hu. Ut wi nakaapaabʼ li Santil Hu, taataw aʼin.
Qʼaxal taataw xsahil li yuʼam
LI SANTIL HU NAXYE: Li Yos «toj saʼ choxa naxtaqla chaq li habʼ ut li ru leerawimq saʼ xqʼehil, ut naxkʼojobʼ eechʼool rikʼin tzekemq ut sahil chʼoolej» (Hechos 14:17).
KʼARU NARAJ XYEEBʼAL? Chixjunil li yobʼtesinbʼil aʼan jun xmaatan li Yos. Taataw rusilal ebʼ li maatan aʼin naq taakʼe reetal saʼ li Santil Hu naq aʼan naxkʼe xchʼool chaawix.
Taataw li chaabʼil naʼlebʼ li naru nakatxtenqʼa anaqwan
LI SANTIL HU NAXYE: «Taanaw ajwiʼ xyaalal li tiikil chʼoolej ut li yaal, ut taataw ru kʼaru li chaabʼilal» (Proverbios 2:9).
KʼARU NARAJ XYEEBʼAL? Xbʼaan naq li Yos aʼan laj Yobʼtesinel aawe, naxnaw kʼaru naʼajmank re naq sahaq saʼ laachʼool. Naq taatzol li naxye li Santil Hu taataw naabʼal li naʼlebʼ li tatxtenqʼa saʼ laayuʼam.
Taataw xsumenkil laapatzʼom
LI SANTIL HU NAXYE: «Taanaw ru Aʼan chi yaal» (Proverbios 2:5).
KʼARU NARAJ XYEEBʼAL? Xnawbʼal naq wank jun laj Yobʼtesinel tatxtenqʼa chi xtawbʼal xsumenkil ebʼ li xninqal ru patzʼom aʼin, kʼaru xyaalal li yuʼam, kʼaʼut naq wank li rahilal, kʼaru nekeʼxkʼul li kristiʼaan li ak kamenaqebʼ chik. Taataw xsumenkil saʼ li Santil Hu.
Wank laawoybʼenihom choʼq re li kutan chalk re
LI SANTIL HU NAXYE: «Laaʼin wank saʼ inchʼool kʼaru tinbʼaanu choʼq eere: twaj texwanq saʼ tuqtuukilal ut inkʼaʼ saʼ rahilal, re naq toxeetaw xsahil eechʼool chi junelik. Laaʼin, li Qaawaʼ, ninyehok re aʼin» (Jeremías 29:11).
KʼARU NARAJ XYEEBʼAL? Li Yos naxye naq trisi chixjunil li maaʼusilal, li rahilal ut li kamk. Wi nakaapaabʼ li naxyeechiʼi li Yos, tatruuq xqʼaxbʼal li chʼaʼajkilal li taataw saʼ li junjunq chi kutan.