XNUMTAAK LI CHʼAʼAJKILAL

1 | Kol laakawilal

KʼAʼUT WANK XWANKIL?

Ebʼ li chʼaʼajkilal yalaq chanru naxchʼaʼajki laakawilal.

Naq nakʼulmank junaq li chʼaʼajkilal ebʼ li kristiʼaan nekeʼnumtaak xkʼaʼuxl ut li junelik yook xkʼaʼuxl saʼ junpaat nayajerk.
Naq nakʼulmank junaq li rahilal, saʼ junpaat nekeʼnujak li bʼanlebʼaal ut naʼosoʼk li bʼan.
Wank sut, maakʼaʼeb xtumin li kristiʼaan re xloqʼbʼal li tzekemq ut li bʼan.

Ma nakaanaw?

Naq junaq li kristiʼaan wank jun li xnimla yajel ut nanumtaak xkʼaʼuxl moko nakʼoxlak ta chik chiʼus ut inkʼaʼ chik naxnaw kʼaru xbʼaanunkil. Ut aʼin naru tixbʼaanu naq tnimanq xyajel.
Wi inkʼaʼ nakaakʼe aachʼool chi xbʼanbʼal aawibʼ tnimanq laayajel ut naru taakʼe saʼ xiwxiwal laayuʼam.
Wi kawat, taanaw kʼaru xbʼaanunkil naq yooqat xnumsinkil junaq li chʼaʼajkilal.
Maakʼaʼ naxye ma wank aatumin malaj maakʼaʼ, naru taabʼaanu jalan jalanq li naʼlebʼ re xkolbʼal laakawilal.

Kʼaru tatruuq xbʼaanunkil?

Li kristiʼaan li nanaʼlebʼak chiʼus naril li chʼaʼajkilal ut naxsikʼ kʼaru xbʼaanunkil re xkolbʼal ribʼ chiru. Joʼkan naq, wi nakaawaj xkolbʼal aawibʼ chiruhebʼ li yajel malaj inkʼaʼ nakaawaj yajerk, tento taasaabʼesi aawibʼ ut taasaabʼesi li wank saʼ laasutam. Xbʼaan naq jwal us naq taawil aawibʼ chiru naq tatyajerq.

«Saʼ xkʼabʼaʼ naq naqasaabʼesi qibʼ ut naqasaabʼesi li qochoch, naqakol bʼayaq li qatumin xbʼaan naq moko junelik ta yooko chi xik saʼ bʼanlebʼaal ut inkʼaʼ nokooloqʼok bʼan» (Laj Andreas).a

a Maawaʼ tzʼaqal xkʼabʼaʼebʼ.

CHANRU XQʼAXBʼAL RU? Wiibʼ oxibʼ li naʼlebʼ

Re xkolbʼal laajunxaqalil naq wank li chʼaʼajkilal, bʼaanu ebʼ li naʼlebʼ aʼin

SAABʼESI AAWIBʼ

Saabʼesi aawibʼ

Li Santil Hu naxye: «Li wank xnaʼlebʼ inkʼaʼ naxchʼik ribʼ saʼ li raaxiikʼ naq naril» (Proverbios 22:3). Kol aawibʼ chiru junaq li naʼlebʼ li nakʼamok chaq yajel.

Kʼaytesi aawibʼ chi xchʼajbʼal laawuqʼ rikʼin haʼ ut xaabʼon, qʼaxal wiʼ chik naq ok aawe chi kʼubʼank malaj xatwulak saʼ li tzʼeqlebʼaal.
Rajlal chaasaabʼesi laawochoch qʼaxal wiʼ chik ebʼ li kʼaʼaq re ru li kokʼaj xsaʼ nakaachʼeʼ.
Wi naru, maajunaji aawibʼ rikʼinebʼ li kristiʼaan li naru teʼxletz junaq laayajel.

WAʼ LI TZEKEMQ LI NAKʼEHOK KAWILAL

Waʼ li tzekemq li nakʼehok kawilal

Li Santil Hu naxye: «Maajun wa junaq xikʼ kiril li xtzʼejwal, naxchʼoolani bʼan ut naxra» (Efesios 5:29). Naqakʼutbʼesi naq naqara qibʼ wi naqasikʼ chiʼus kʼaru naqatzeka ut naqukʼ.

Chaawukʼ naabʼal li haʼ.
Chaatzeka jalan jalanq li kiʼil qʼeen ut ru li cheʼkʼaam.
Maawaʼ li tzekemq li kʼajoʼ xmantekil, xʼasukril ut ratzʼamil.
Matmayibʼk, maawoksi li bʼan li nakanobʼresink u ut matkalaak.

«Re naq inkʼaʼ tooyajerq naqawaʼ li tzekemq li nakʼehok kawilal. Wi inkʼaʼ tqabʼaanu aʼin, tqasach li qatumin rikʼin laj bʼanonel. Choʼq qe jwal us xloqʼbʼal li tzekemq li nakʼehok kawilal» (Laj Carlos).

KAWRESI LAAJUNXAQALIL UT HILAN CHIʼUS

Kawresi laajunxaqalil

Li Santil Hu naxye: «Abʼanan qʼaxal us li hilank junpaataq chiru li kawil kʼanjelak, xbʼaan naq aʼin chanchan li chapok iqʼ» (Eclesiastés 4:6). Yaal, aajel ru kʼanjelak abʼan tento ajwiʼ toohilanq.

Ekʼan bʼayaq. Wi rajlal nakatbʼeek kawaq laajunxaqalil. Naru nakaabʼaanu usta cheekat, yajat malaj wank junaq chik xchʼaʼajkilal laajunxaqalil.
Hilan chiʼus

Tento tathilanq chiʼus. Wi inkʼaʼ nakatwark chiru wiibʼ malaj oxibʼaq kutan, tnimanq laakʼaʼuxl ut inkʼaʼ chik tatkʼoxlaq chiʼus. Wi inkʼaʼ nakatwark chiru naabʼal kutan, tatyajerq.
Xaqabʼ junaq li hoonal re xik chi wark ut kʼe aachʼool chi xbʼaanunkil. Yoklan ut waklin wulaj wulaj saʼ li hoonal li ak xaqabʼanbʼil aabʼaan.
Naq ak xatyoklaak maawil li tele chi moko li selular.
Naq xik aawe chi wark matnumwaʼak chi moko taawukʼ li haʼ li ra naxkʼat ut li kape malaj li té.

«Naq sa ninwark, kawin. Wi moko tzʼaqal ta xinwark, narahok linjolom ut linjunxaqalil. Abʼan, naq sa xinwark kawin ut kawresinbʼilin re xbʼaanunkil yalaq kʼaru! Wank inmetzʼew ut moko ninyajajnak ta» (Laj Justin).